قالالىق بيلىك ەلوردالىق جۇمىس بەرۋشىلەر ءۇشىن مۇگەدەكتەرگە ارنالعان جۇمىس ورىندارىنا كۆوتالار بەلگىلەۋدى قاۋلى ەتتى. بۇل تۋرالى قوعامدىق كەڭەستىڭ كەزەكتى وتىرىسىندا ءمالىم بولدى. وتىرىس بارىسىندا 5 نورماتيۆتىك قۇقىقتىق اكتىنىڭ جوباسى قارالدى. «استانا قالاسىنداعى جۇمىس ورىندارىنىڭ كۆوتالارىن بەلگىلەۋ تۋرالى» جوباسى جايلى استانا قالاسى اكىمدىگىنىڭ «جۇمىسپەن قامتۋ ورتالىعى» كمم ديرەكتورى ولجاس ومار بايانداما جاسادى. قاۋلى جوباسىمەن مۇمكىندىگى شەكتەۋلى جانداردى جۇمىس ورنىمەن قامتاماسىز ەتۋ قاراستىرىلعان. ەگەر ۇجىم قۇرامىندا ەلۋ جانە ودان دا كوپ ادام ەسەپتە بولسا, وندا مۇمكىندىگى شەكتەۋلى جانداردىڭ سانى 2%-دى قۇراۋى قاجەت. 101-دەن 250 ادامعا دەيىن – جۇمىسشىلاردىڭ تىزىمدىك سانىنىڭ 3%-ى مولشەرىندە, ەگەر كاسىپورىن ۇجىمى 251 ادامنان جوعارىنى قۇراعان جاعدايدا, مۇگەدەكتەرگە ارنالعان جۇمىس كۆوتاسى جۇمىسشىلار سانىنىڭ 4%-ىن قۇرايدى.
سونىمەن قاتار, جوبادا استانالىق جۇمىس بەرۋشىلەرگە جۇمىس ورىندارىن ۇسىنۋ قاجەت بولاتىن تۇلعالاردىڭ ساناتى كورسەتىلدى. ولاردىڭ اراسىندا باس بوستاندىعىنان ايىرۋ ورىندارىنان بوساعان پروباتسيا قىزمەتىنىڭ ەسەبىندە تۇراتىن ادامدار دا بار. جۇمىس كۆوتاسى جۇمىس ورنىنىڭ جالپى سانىنىڭ 1% مولشەرىندە بەلگىلەندى. جاستاردى جۇمىسپەن قامتۋ ماسەلەسى كورسەتىلدى. كاسىپورىن باسشىلارى ءبىلىم بەرۋ ۇيىمدارىنىڭ بىتىرۋشىلەرى بولىپ تابىلاتىن, اتا-اناسىنان ايرىلعان نەمەسە كامەلەتتىك جاسقا جەتكەنشە ولاردىڭ قامقورلىعىنسىز قالعان جاستار اراسىنان ازاماتتاردى جۇمىسپەن قامتۋ ءۇشىن جۇمىس ورنىنىڭ جالپى سانىنىڭ ءبىر پايىزى مولشەرىندە جۇمىس ورىندارىنىڭ كۆوتاسىن بەلگىلەۋ قاجەت.
astana.gov.kz
