بۇگىن ەلوردادا كۇزگى ەكولوگيالىق ايلىق اياسىندا «استانا – تازا قالا!» جالپىقالالىق سەنبىلىگى ءوتىپ جاتىر. ءداستۇرلى شاراعا 90 مىڭعا جۋىق ادام قاتىسۋدا. جالپى بۇگىن قالادا 10 مىڭنان استام كوشەت وتىرعىزۋ جوسپارلانعان.
سەنبىلىككە شىققان استانالىقتار الماتى اۋدانىندا قر ۇلتتىق مۋزەيى اۋماعىنا, ەسىل اۋدانىندا «حانشاتىر» سوو اينالاسىنا جانە ەڭبەكشىلەر كوشەسىنەن «تەلمان» تۇرعىن الابىنا دەيىن, سونداي-اق, سارىارقا اۋدانىندا سارىبۇلاق وزەنىنىڭ جاعالاۋىنا اعاش ەكتى.
قالا يگىلىگى ءۇشىن جۇمىلدىرىلعان ورتاق ىسكە 89 مىڭنان استام ادام, سونىڭ ىشىندە كاسىپورىندار مەن ۇيىمداردىڭ 4 مىڭعا جۋىق قىزمەتكەرى, 45 جوعارى جانە ورتا ارنايى وقۋ ورنى, 133 مەكتەپكە دەيىنگى جانە ءبىلىم بەرۋ مەكەمەسى قاتىستى. وعان قوسا, 430 ارنايى تەحنيكا تارتىلدى.
– ەلوردانى كوگالداندىرۋ, بارلىق اۋدانداردا جانە شاعىن اۋدانداردا گۇلباقتار مەن ساياباقتار سانىن ارتتىرۋ – باستى مىندەتتەرىمىزدىڭ ءبىرى. استانادا ءداستۇر بويىنشا جىل سايىن 20 مىڭنان ارتىق كوشەت وتىرعىزىلادى. بيىل بوتانيكالىق باقتىڭ سالىناتىنىن ەسكەرسەك, بۇل كورسەتكىش ەكى ەسەگە ۇلعايادى. وسىنىڭ بارلىعى حالىقتىڭ كۇشىمەن جانە قولداۋىمەن جاسالىپ جاتىر. سەنبىلىكتەر تازالىققا تاربيەلەيدى. وسىلايشا, ءبىز قالامىزعا دەگەن سۇيىسپەنشىلىگىمىزدى جەتكىزىپ, پاتريوتتىق تانىتامىز, – دەدى استانا قالاسىنىڭ اكىمى اسەت يسەكەشەۆ.
ەسىل اۋدانىندا الدىن الا بەلگىلەنگەن سەگىز ايماقتا 120 تەحنيكا, سونىڭ ىشىندە 90 جۇك اۆتوكولىگى, 30 شاقتى تيەۋىش كولىك جۇمىلدىرىلدى. ال «حانشاتىر» اۋماعىندا 330 ءتۇپ جاس تال ەگىلمەك. اۋداندا 2 مىڭنان استام اعاش وتىرعىزۋ جوسپارلانعان.
الماتى اۋدانىن جەتى ايماقتا اعاش وتىرعىزىلىپ جاتىر. ونىڭ ىشىندە ەڭ ۇلكەن ايماق – جاڭا ترياتلون پاركى. وندا 2 مىڭنان استام ءتۇپ اعاش ەگىلۋدە. جالپى اۋداندا 5 مىڭنان استام اعاش وتىرعىزىلادى.
ال سارىارقا اۋدانىندا سارىبۇلاق وزەنىنىڭ بويىندا 400 ءتۇپ اعاش ەگىلدى. بۇل اۋدان بويىنشا 2 مىڭنان استام اعاش وتىرعىزىلىپ جاتىر.
