استانادا ەڭبەك كۇنىنە وراي قالالىق ەڭبەك فورۋمى ءوتتى. جاستار تەاترىندا ۇيىمداستىرىلعان شارا بارىسىندا «ەڭبەك جولى» كونكۋرسىنىڭ جەڭىمپازدارى – ۇزدىك ەڭبەك اۋلەتتەرى, جاس ماماندار مەن تالىمگەرلەر ماراپاتتالدى.
ەڭبەككەرلەردىڭ مەرەكەسىنە ارنالعان شارانى اشقان استانا قالاسى اكىمىنىڭ ورىنباسارى اندرەي لۋكين جينالعان قاۋىمدى ەلوردا باسشىسىنىڭ اتىنان قۇتتىقتادى.
– مەملەكەتتىڭ باستى قۇندىلىعى بولىپ تابىلاتىن ەڭبەك ادامىنىڭ بەدەلىن كوتەرۋ ءۇشىن مەملەكەت باسشىسىنىڭ جارلىعىمەن ەڭبەك كۇنى بەكىتىلدى. بۇل مەرەكە ءۇش جىلدان بەرى تويلانىپ كەلەدى. بارشاڭىزدى وسى مەرەكەمەن قۇتتىقتاپ, دەنساۋلىق پەن بار جاقسىلىقتى تىلەيمىن, ارقاشان دا ەلوردامىزدىڭ دامۋى مەن گۇلدەنۋى ءۇشىن ەڭبەك ەتەيىك, – دەدى اندرەي لۋكين.
ەلوردا اكىمىنىڭ ورىنباسارى «ەڭبەك جولى» كونكۋرسىنىڭ «ۇزدىك ەڭبەك اۋلەتى» نوميناتسياسىنداعى جەڭىمپازدارىنا العىس حاتتار مەن سىيلىقتار تابىستادى.
– ومىردە ءبىر ماماندىقتى كاسىپ ەتكەن
وتباسىلار بولادى, ولاردىڭ ءبارى دە ادال ەڭبەك ەتەدى. مۇنداي اۋلەتتەر استانادا وتە كوپ. بۇل كونكۋرستى وتكىزۋ داستۇرگە اينالىپ, ساحناعا شىعاتىن ادامدار سانى ارتا تۇسەدى دەپ ويلايمىن, – دەدى اندرەي لۋكين.
اتالعان نوميناتسيادا مۇقاشەۆتار اۋلەتى ءۇشىنشى, يۆانوۆتار ەكىنشى, بۋياكوۆتار ءبىرىنشى ورىن الدى. بۇل سانات بويىنشا جەڭىمپازدار ءبىر سالادا 81 جىلدان بەرى ەڭبەك ەتىپ كەلەدى.
– اكىمدىككە جانە باسشىلىعىمىزعا العىس ايتامىز. ءبىز دە, بالالارىمىز دا «استانا سۋ ارناسى» كاسىپورنىندا جۇمىس ىستەيمىز. وسىنداي مەرەكە ەلىمىزگە قاجەت دەپ ويلايمىن. وسىلايشا, ادامدار ەڭبەك اۋلەتتەرى تۋرالى كوپ بىلەتىن بولادى, جاستار دا جۇمىسشى ماماندىقتاردى تاڭدايدى, – دەيدى ناتاليا بۋياكوۆا.
سونىمەن قاتار, فورۋم بارىسىندا جاس ماماندارعا دا قۇرمەت كورسەتىلدى. اتاپ ايتقاندا, «STONE HOUSE» جشس مامانى ەرجان سەيىتقوجانوۆ, «استانا سۋ ارناسى» مكك كارىز تازارتۋ قۇرىلىستارى ۋچاسكەسىنىڭ سلەسارى مەدەت قابىكەنوۆ جانە «تۇلپار-تالگو» جشس شەبەرى قۋانىش مۇقىشەۆ ماراپاتتالدى.
جاستاردىڭ تالىمگەرلەرى دە نازاردىن تىس قالعان جوق. №5 قالالىق ەمحانانىڭ الەۋمەتتىك قىزمەتكەرى ءالفيا ەسمۇحانوۆا, قازاق گۋمانيتارلىق زاڭ ۋنيۆەرسيتەتىنىڭ اعا وقىتۋشىسى نازگۇل بولاتبەكوۆا جانە ءبىرىنشى ورىن العان «استانا-رەك» اق جەدەل شاقىرۋ قىزمەتىنىڭ 1-ساناتتاعى تەحنيگى قايرات بەكماعانبەتوۆ تە ماراپاتتارعا يە بولدى. ول ءبىرىنشى دارەجەلى مامانداردى دايىندايدى. «ەلەكتروەنەرگەتيكا – قاۋىپتى ءوندىرىس, ۇلكەن جاۋاپكەرشىلىك جۇكتەلەدى, سوندىقتان جاڭادان كەلگەندەردى وقىتۋدا قاۋىپسىزدىككە باسا نازار اۋدارامىن» دەيدى مامان.
سونداي-اق, جەڭىمپازدار تۋرالى بەينەروليكتەر كورسەتىلىپ, مۋزىكالىق كومپوزيتسيالار ورىندالدى. فورۋمدا كاسىپوداق ۇيىمدارى مەن استانا قالاسىنىڭ كاسىپكەرلەر پالاتاسى دا ماراپاتتالدى.
