استانادا جاڭعىرعان «دون كيحوت»
«استانا وپەرا» تەاترىنىڭ رەپەرتۋارى تاعى دا ءبىر پرەمەرامەن تولىقتى. الەم ەلدەرىنىڭ ساحناسىنان 150 جىلعا جۋىق ۋاقىت بويى تۇسپەي كەلە جاتقان ايگىلى «دون كيحوت» بالەتى استانادا دا قايتا جاڭعىرىپ, كەشە تۇساۋى كەسىلدى.
«دون كيحوت» – ءداستۇرلى يسپانيالىق قويىلىم. ليۋدۆيگ مينكۋستىڭ مۋزىكاسىنا قويىلعان بالەت الەم تەاترلارىنىڭ رەپەرتۋارىنان تۇسپەي كەلەدى. ونىڭ استاناداعى نۇسقاسىنىڭ قويۋشى بالەتمەيستەرى – رەسەيدىڭ حالىق ءارتىسى مەن «استانا وپەرا» بالەتتىك ترۋپپاسىنىڭ كوركەمدىك جەتەكشىسى التىناي اسىلمۇراتوۆا.
كلاسسيكالىق تۋىندىنى كورەرمەنگە قاز-قالپىندا جەتكىزۋگە ورتاعاسىرلىق كيىمدەر مەن دەكوراتسيالار كومەكتەستى. 147 جىلدىق تاريحى بار «دون كيحوت» بالەتىنە ارناپ ەكى جۇزگە جۋىق كوستيۋم تىگىلدى. ولاردى «وسكار» سىيلىعىنىڭ يەگەرى فرانكا سكۋارچاپينو مەن ەتسيو فريدجەريو بىرلەسىپ ازىرلەدى. يتاليالىق سۋرەتشىلەر كوستيۋمدەردە قارا جانە قانىق قىزىل ءتۇستى كوپتەپ پايدالانىپتى. كيىمنەن بولەك, شەبەرلەردىڭ دەكوراتسيالاردى شىنايى ەتىپ جاساۋى, انيماتسيانى ۇتىمدى قولدانا ءبىلۋى بالەتتىڭ ءبىتىم-بولمىسىن ايشىقتاي ءتۇستى.
بەلگىلى بالەتمەيستەر التىناي اسىلمۇراتوۆانىڭ ايتۋىنشا, بالەت جىلدار بويى بىرنەشە رەت رەداكتسيالانعان. وسى قويىلىمنىڭ ەرەكشەلىگى – سىعان جانە فاندانگو ءبيىنىڭ ەنگىزىلۋىندە. سونداي-اق, بالەت ەكى اكتىگە دەيىن قىسقارىپ, دەكوراتسيالاردىڭ اۋىسۋى جيىلەدى. بۇل بالەتتى تاماشالاعان كورەرمەندى تاڭداي قاقتىرعانى ءسوزسىز.
«دون كيحوت» وقيعاسىنىڭ جەلىسى اركىمگە تۇسىنىكتى, قابىلداۋعا جەڭىل. پانتوميما مەن كەيىپكەرلەردىڭ قاي-قايسىسى دا ماڭىزدى. ەزۋىڭە ەرىكسىز كۇلكى ۇيىرەدى. ماقسات – ساحنانىڭ ءار جەرىندە, ءار بۇرىشىندا ءومىردىڭ قايناپ جاتقان كورىنىسىن بەرۋ» دەيدى ايگىلى بالەرينا.
روماننان ايىرماشىلىعى سول, باستى نازاردا قاھارمان دون كيحوتتىڭ ءوزى ەمەس, كيتري پەن بازيل ەسىمدى عاشىقتار. كيتريدىڭ اكەسى لورەنتسو قىزىن باي دۆوريان گاماشقا ۇزاتپاقشى بولادى. الايدا دون كيحوت وعان توسقاۋىل بولىپ, جاستاردىڭ ماحابباتى ءۇشىن كۇرەسەدى.
ءوز ءرولىن شەبەر ويناپ شىققان ارتىستەردىڭ ەڭبەگىن ەلەمەۋ مۇمكىن ەمەس. كيتريدىڭ ءرولىن قازاقستاننىڭ ەڭبەك سىڭىرگەن قايراتكەرلەرى ءمادينا باسپاەۆا جانە گاۋھار ۋسينا سومداسا, ءبازيلدى باقتيار ادامجان مەن ارمان ورازوۆ ويناپ شىقتى. ساياحاتشى دون كيحوتتىڭ پارتياسى جانىبەك يمانقۇلوۆقا بۇيىردى. كوڭىلدى سانچو پانسانى بوستان قوجابەكوۆ, ال لورەنتسونى ءجانادىل بەيسەمبيەۆ ساحنادا جانداندىردى.
گۇلدانا تالعاتقىزى