استانادان اۋىلعا دەيىن…
استانا
استانا قالاسىنداعى ءا.مامبەتوۆ كوشەسىندەگى 5-ءۇيدىڭ سىرتقى قابىرعاسى ءا.قاستەەۆ اتىنداعى مۋزەيدەن جينالعان قازاقستاندىق كلاسسيكتەردىڭ تۋىندىلارىمەن تولىقتى. قازىر بۇل ءۇي اشىق اسپان استىنداعى گالەرەياعا ۇقسايدى.
شىعىس قازاقستان وبلىسى
تارباعاتاي اۋدانىنىڭ ەلەكە سازى جايلاۋىنان «التىن ادام» تابىلدى. بۇل شىعىس قازاقستان جەرىنەن تابىلعان بەسىنشى باعالى جادىگەر بولىپ وتىر.
اقتوبە وبلىسى
اقتوبە وڭىرىندەگى ەسەت باتىر كەسەنەسىنە اپاراتىن جول جوندەلدى. قازاقستاننىڭ كيەلى كارتاسىنا ەنگەن ەسەت باتىر كەسەنەسى العا اۋدانىنىڭ بەستاماق اۋىلىندا ورنالاسقان. مۇندا جىل سايىن جۇزدەگەن ادام كەلىپ, زيارات ەتەدى.
اتىراۋ وبلىسى
اتىراۋدا «Samruk-Kazyna Trust» الەۋمەتتىك جوبالاردى قولداۋ قورىنىڭ «ارەكەت» جوباسى اياسىندا ۇەۇ وكىلدەرىن الەۋمەتتىك كاسىپكەرلىككە وقىتۋ باعدارلاماسى اياقتالدى. ناتيجەسىندە وبلىستاعى 16 ۇيىم 500 مىڭ تەڭگەدەن گرانت ۇتىپ الدى. ەندى جەڭىمپازدار 9 اي بويى ءوز جوبالارىن ىسكە اسىرادى.
قىزىلوردا وبلىسى
قىزىلوردادا «قازاقستاننىڭ ۇزدىك تاۋارى» بايقاۋىنىڭ جەڭىمپازدارى انىقتالدى. جەڭىمپازدار الداعى قازان ايىندا استانادا وتەتىن رەسپۋبليكالىق كورمە-بايقاۋعا قاتىسادى.
پاۆلودار وبلىسى
ەرتىس اۋدانىندا وسىمەن ءۇشىنشى جىل قاتارىنان «ۇلى دالا» ەتنوفەستيۆالى ءوتتى. شاراعا قىتاي, موڭعوليا, تاجىكستان, وزبەكستان جانە رەسەي سياقتى الىس-جاقىن شەتەلدەردەن دەلەگاتسيا كەلدى.
ماڭعىستاۋ وبلىسى
ماڭعىستاۋ وبلىسىندا كوركەم گيمناستيكادان ءىى حالىقارالىق «شاعالا» ءتۋرنيرى ءوتتى. جارىسقا وزبەكستان, گرۋزيا, يزرايل ەلدەرىنەن 6-15 جاس ارالىعىنداعى گيمناستشىلار باق سىنادى.