استانا
ەلورداداعى يانۋشكەۆيچ پەن كەنەسارى كوشەلەرىنىڭ قيىلىسىندا جاڭا قوعامدىق كەڭىستىك قاتارعا قوسىلدى. ول پولشانىڭ مادەنيەت جانە ۇلتتىق مۇرا مينيسترلىگى بولگەن قارجىعا جاسالىپ, استاناعا سىي رەتىندە تارتىلدى. گۇلزاردا پولياك ساۋلەتشىسى ياكۋب ششەسنىدىڭ ينستاللياتسياسى قوندىرىلعان. ەندى قوعامدىق كەڭىستىككە پولياك اقىنى گۋستاۆ زەلينسكيدىڭ ەسىمى بەرىلمەك.
الماتى
وڭتۇستىك مەگاپوليس الداعى جىلىتۋ ماۋسىمىنا دايىندىقتى تولىق اياقتادى. قالادا 12 كم جىلۋ جەلىسى, 23 كم ەلەكتر جەلىسى, 283 كم سۋ قۇبىرى مەن 267 كم كارىز جۇيەسى قايتا جاسالدى. جالپى, بيىل مۇندا 524 كوشە جوندەلگەن, 1400 ەسكى اۋلا جاڭارعان, 300 شاقىرىمدىق ارىق قازىلعان. شاھاردىڭ بارلىق جەراستى وتپەلى جولدارى دا جاڭعىردى.
تۇركىستان وبلىسى
وڭتۇستىك ءوڭىردىڭ ديقاندارى استاناعا 500 توننا ازىق-تۇلىك جەتكىزدى. وبلىستان ەلورداعا قاراي بەت تۇزەگەن كەرۋەنگە 496 توننا اۋىل شارۋاشىلىعى تاۋارلارى تيەلگەن. ولار قىركۇيەك ايىنىڭ 22-23 كۇندەرى وتەتىن تۇركىستان وبلىسى تاۋار وندىرۋشىلەرىنىڭ كەزەكتى جارمەڭكەسىندە شىعارىلادى.
قوستاناي
وبلىس ورتالىعىندا وسى وڭىردە تۇراتىن وزگە ۇلت وكىلدەرىنىڭ قازاق ءتىلىن مەڭگەرۋ دارەجەسىن انىقتاۋعا ارنالعان بايقاۋ ءوتتى. وعان ايماقتىڭ 14 اۋدانى مەن 3 قالاسىنان 9 ۇلتتىڭ وكىلدەرىنەن تۇراتىن 18 مەكتەپ وقۋشىسى قاتىستى. قازىلار القاسى شەشىمىمەن فەدوروۆتىق ماريا چەرنەنكو 1-ورىن, رۋدنىيلىق مارك لي 2-ورىن, اۋليەكولدىك كيريلل بارانوۆ 3-ورىن الدى.
قىزىلوردا وبلىسى
سىر بويىنىڭ سولتۇستىك وڭىرىندەگى قازالى اۋدانىنىڭ كۇرىشتىك القابىنا وراق ءتۇستى. كەشە اۋداننىڭ «قوجاباقى» اۋىلىنداعى «اگرو-وركەن» جشس سالىق جيناۋدى باستاپ كەتتى. وعان قاتىسقان اۋدان اكىمى مۇرات ەرگەشباەۆ ءداستۇرلى «دالا كۇنى» سەمينار-كەڭەسىن وتكىزدى. بيىل اۋدان بويىنشا 6800 گەكتار كۇرىش ەگىلدى.
اتىراۋ
كاسپي تەڭىزى جاعاسىندا قالا كۇنىنە ارنالعان ۆەلوشەرۋ ۇيىمداستىرىلدى. ونى قالالىق دەنە شىنىقتىرۋ جانە سپورت ءبولىمى دەمەۋشى كومپانيالاردىڭ كومەگىنە سۇيەنىپ وتكىزدى. جەڭىمپازدار بەس نوميناتسيا بويىنشا ىرىكتەلىپ, ارنايى دايىندالعان سىيلىقتارمەن ماراپاتتالدى.
پاۆلودار وبلىسى
پاۆلودار وبلىسىنىڭ دەنساۋلىق ساقتاۋ جۇيەسى تۇرعىندارعا تۇماۋعا قارسى ۆاكتسينا ەگۋگە ساقاداي ساي. ەكپە جۇمىستارى قازان ايىنان قولعا الىنادى. وبلىس ەمحانالارى ەكپەنى تەگىن الاتىن تۇرعىندار ساناتىنا قاجەتتى ۆاكتسينا كولەمىن تولىق قابىلداپ العان.
