«استانا» فۋتبول كلۋبى قارت قۇرلىقتىڭ باستى دودالارىنىڭ ءبىرى – ەۋروپا ليگاسىنداعى جورىعىن ءساتتى باستادى. جەرلەستەرىمىز سىرت الاڭدا كيەۆتىڭ «دينامو» كومانداسىمەن سىنعا ءتۇسىپ, 2:2 ەسەبىمەن تەڭ ءتۇستى.
بۇل ويىندا قوس كوماندا تەڭ دارەجەدە ونەر كورسەتتى. ويىننىڭ 11-مينۋتىندا ۆيتالي بۋيالسكيمەن پاس الماسقان ۆيكتور تسىگانكوۆ قاقپانى ءدال كوزدەپ, «دينامونى» العا شىعاردى. دەگەنمەن, ارادا 10 مينۋت وتكەن سوڭ كابانانگانىڭ اۋەلەتە كوتەرگەن پاسىنا ءبىرىنشى بولىپ جەتكەن مارين انيچيچ تارازى باسىن تەڭەستىردى. «استانانىڭ» ەسەپتە العا شىعۋىنا بولار ەدى. بىراق مارين توماسوۆ قاقپاشىمەن ەكى رەت جەكە شىققاندا دا مۇمكىندىكتەرىن پايدالانا المادى.
العاشقى تايمعا بەرىلگەن قوسىمشا ۋاقىتتا تابلوداعى كورسەتكىش تاعى وزگەردى. ۋكراينالىقتار تاعى دا العا شىقتى. بۇل جولى دەنيس گارماش مەرگەندىگىمەن تانىلدى. ول قاقپاشى نەناد ەريچتىڭ ورەسكەل قاتەلىگىن ءتيىمدى پايدالانىپ, ەسەپتى 2:1-گە جەتكىزدى. «دينامونىڭ» باسىمدىعى كەزدەسۋدىڭ سوڭعى مينۋتتارىنا دەيىن جالعاستى. ال قوسىمشا ۋاقىتتا پەدرو ەنريكەنىڭ كوتەرگەن دوبىنا رومان مۇرتازاەۆ ۇلگەرىپ, ەسەپتى 2:2 ەتتى.
«استانا» وسىلايشا توپتىق كەزەڭنىڭ العاشقى ويىنىندا 1 ۇپايعا يە بولىپ, ەكىنشى ورىنعا جايعاستى. جەرلەستەرىمىز ەۋروپا ليگاسىنداعى كەلەسى ويىنىن «استانا-ارەنادا» 4 قازان كۇنى فرانتسيانىڭ «رەنن» كومانداسىمەن وتكىزەدى.
