اقمولا وبلىسى
«جاستار جىلى» قارساڭىندا «اقمولا جاستارى» باعدارلاماسى قولعا الىنادى. سونىڭ اياسىندا كوكشەتاۋدا 4 تۇرعىن ءۇي سالىنىپ, 400 جاس وتباسى باسپانامەن قامتىلماق.
وسكەمەن
وسكەمەندە قارىزى بار ادامدار مەن قىلمىسكەرلەردى انىقتايتىن باعدارشام ورناتىلدى. «اقىلدى» تەحنيكا جولدان ءوتىپ بارا جاتقان كىسىلەردىڭ ءتۇر-الپەتىن ءىىم بازاسىنداعى ازاماتتارمەن سالىستىرىپ, كۇدىكتىنى تانىعان جاعدايدا پوليتسياعا حابار بەرەدى.
پاۆلودار وبلىسى
كەلەسى جىلى پاۆلودار وبلىسىنا قاراستى ماي اۋدانىنىڭ 10 مىڭداي تۇرعىنى ساپالى اۋىزسۋعا قول جەتكىزەدى. جۇرگىزىلىپ جاتقان سۋ قۇبىرى 16 اۋىلدى باسىپ وتەدى. كەلەشەكتە تاعى 6 اۋىلدى قوسۋ جوسپارلانىپ وتىر.
جامبىل وبلىسى
جاڭا باعىتتاعى قورداي اسۋىنىڭ اينالما جولى ەندى جامبىل وبلىسىنىڭ قورداي اۋدانىنا قاراستى اۋىلدارعا كىرمەي, سىرتىنان اينالىپ وتەتىن بولدى. سونىڭ ارقاسىندا جولدىڭ ۇزىندىعى 20 شاقىرىمعا قىسقاردى.
قىزىلوردا وبلىسى
نۇرتاي جايىقباەۆ اتتى قىزىلوردالىق ونەرتاپقىش ءۇي شارۋاشىلىعىنا ارنالعان امبەباپ قولاربا جاساپ شىعاردى. ونى قىستا قار كۇرەۋگە, كوكتەمدە باقشاداعى ءارامشوپتى وتاپ, جەر قوپارۋعا پايدالانۋعا بولادى.
تۇركىستان وبلىسى
تۇركىستان وبلىسىنىڭ ەمدەۋ مەكەمەلەرى ءبىر ايدىڭ ىشىندە كومپيۋتەرمەن تولىقتاي قامتاماسىز ەتىلەدى. بۇگىنگى تاڭدا وبلىستاعى مەديتسينا ۇيىمدارىنىڭ 69 پايىزى كومپيۋتەرمەن جابدىقتالعان.
ماڭعىستاۋ وبلىسى
ماڭعىستاۋ وبلىسى تۇپقاراعان اۋدانىندا 2 جەل ەلەكتر ستانساسى سالىنۋدا. تۇگەلدەي ينۆەستورلار قاراجاتىنا سوعىلىپ جاتقان ستانسالار كەلەسى جىلدىڭ ماۋسىم ايىندا پايدالانۋعا بەرىلەدى.
اتىراۋ
«اتىراۋ» گازەتىنىڭ 95 جىلدىعىنا وراي ايماقتىق مەديا-مۋزەي اشىلدى. وندا تانىمال تۇلعالاردىڭ قولجازبالارى, ارداگەر جۋرناليستەردىڭ فوتوسۋرەتتەرى مەن قۇرالدارىنان تۇراتىن 400-گە جۋىق جادىگەر قويىلدى.
پەتروپاۆل
پەتروپاۆل قالاسىندا سولتۇستىك قازاقستان وبلىسىنداعى العاشقى پوليتسيا ءبولىمىنىڭ فرونت-كەڭسەسى اشىلدى. ەندى تۇرعىنداردى تەمىر تورلى ەسىكتەر مەن قاتاڭ اتموسفەرانىڭ ورنىنا ىڭعايلى كەڭ زالدار قارسى الىپ, پوليتسيا ماماندارى سول جەردە كەڭەستەر بەرەتىن بولادى.
