اڭقاۋلاردىڭ اۋزىن اڭقيتىپ كەتەتىن الاياقتار كوبەيدى. ەندى ولار الەۋمەتتىك جەلىلەردىڭ مۇمكىندىگىن پايدالانىپ, وڭاي جولمەن اقشا تاۋىپ ءجۇر.
جۋىردا استانالىق پوليتسەيلەر عالامتوردا الاياقتىقپەن اينالىستى دەگەن كۇدىكپەن 23 جاستاعى تاراز قالاسىنىڭ تۇرعىنىن تۇتقىندادى. ءىز كەسۋشىلەردىڭ تۇسىندىرگەنىندەي, الاياق قىز Instagram-دا اككاۋنت اشىپ, تەرى توندار مەن تەرى بۇيىمدارىن ساتاتىنى جونىندە اقپارات بەرىپ وتىرعان. جۇرتتىڭ نازارىن وزىنە اۋدارۋ ءۇشىن تەرى تونداردىڭ باعاسىن نارىقتاعىدان ارزانعا جارنامالاعان.
كۇن سۋىتقاندا نازىك جاندىلاردىڭ تەرى توندارعا ەسى كەتەتىنىن ەسكەرگەن الاياق قىز نەشە ءتۇرلى ادەمى توندار كيگەن قىزداردىڭ سۋرەتتەرىن بەرىپ, ءتىپتى ساۋدا ۇيلەرىنىڭ مەكەنجايلارىنا دەيىن كورسەتىپتى. قۋلىعىنا قۇرىق بويلاتپاعانى سونشالىق, ءوزىنىڭ داۋىسىن ەل تانىپ قويماس ءۇشىن «كليەنتتەرىمەن» WhatsApp ارقىلى حات جازىسقان. ءوز ونىمدەرىن ساتىپ الۋشىلاردى قىزىقتىرا وتىرىپ, تونداردى ۇيىنە جەتكىزىپ بەرەتىنىنە ۋادە ەتەدى. ال تاۋاردىڭ 100 پايىز اقشاسىن الدىن الا Qiwi-اميانعا اۋدارۋدى وتىنەدى.
ال ەندەشە! ومىردە كورىپ-بىلمەگەن ادامنىڭ ايتقانىنا سەنگەندەر 100-دەن 300 مىڭ تەڭگەگە دەيىنگى اقشاسىن الاياقتىڭ شوتتارىنا اۋدارىپ جىبەرىپتى. ءسويتىپ ول اي مەن كۇننىڭ امانىندا ەلوردانىڭ 7 تۇرعىنىن الداپ, 1,5 ملن تەڭگەنى قالتاسىنا باسقان. «ءىس ءبىتتى, قۋ كەتتى» دەگەندەي, ارام اقشانى شىتىرلاتىپ ساناپ العان سوڭ, ءنومىرىن بۇعاتتاپ, اككاۋنتتارىن جاۋىپ, تايىپ تۇرادى. الايدا الاياقتىڭ ارام ويى ىسكە اسپادى. قىراعى قۇقىق قورعاۋشىلار ونىڭ ىزىنە ءتۇسىپ, قولىنا كىسەن سالدى. قازىرگى كەزدە كۇدىكتىگە قاتىستى قر قىلمىستىق كودەكسىنىڭ 190-بابى (الاياقتىق) بويىنشا سوتقا دەيىنگى تەرگەۋ امالدارى جۇرگىزىلىپ جاتىر.
وتكەن اپتادا «kaspi.kz»-كە قاتىستى شىققان شۋ دا جۇرتتى دۇرلىكتىردى. WhatsApp-تان: «بانك باسشىسى ميحايل لومتادزە سالىمشىلاردىڭ قارجىسىن الىپ, شەتەلگە قاشىپ كەتتى» دەگەن اقپارات تاراتىلدى. مۇنداي وسەك-اياڭنىڭ شىعۋىنا 1 قاراشادا «kaspi.kz» موبيلدىك قوسىمشاسىنداعى تەحنيكالىق اقاۋ سەبەپ بولعان ەدى. ءتىپتى باق باسشىلارىنا دا قۇپيا حاتتار جىبەرىلدى. الايدا جالعان اقپاراتتى بانكتىڭ باسقارما توراعاسى ميحايل لومتادزەنىڭ ءوزى جوققا شىعاردى. «مۇنداي حابارلاما بىزگە دە كەلدى. مەنى قازاقستاننان قاشىپ كەتتى دەپ جازىپتى. بىراق مەن ەلدەمىن, ءوز كەڭسەمدە وتىرىپ, جۇمىس ىستەۋدەمىن. 16 قاراشاداعى جالپىحالىقتىق ««kaspi ۇجىمى» مەرەكەسىنە دايىندىق جاساپ جاتىرمىز» دەدى ول رەسپۋبليكالىق ارنالاردىڭ بىرىنە بەرگەن سۇحباتىندا.
