استاناداعى ۇلتتىق اكادەميالىق كىتاپحانانىڭ «كىتاپ» مۇراجايىندا كورنەكتى ادەبيەتتانۋشى عالىم, اكادەميك زاكي احمەتوۆتىڭ جازۋ ۇستەلىنەن باستاپ عالىمنىڭ قولجازبالارى, كىتاپحاناسى, قولدانعان زاتتارى ساقتالىپ تۇر. بۇل جادىگەرلەردىڭ الدىن كىتاپ ورداسىنا اكادەميكتىڭ جارى زيا ناسىرقىزى وسىدان 4 جىل بۇرىن تاپسىردى. بيىل ز.احمەتوۆتىڭ تۋعانىنا 90 جىل تولدى. وسىعان وراي جاقسىدان قالعان جادىگەرلەر سانى تولىقتىرىلدى.
«كىتاپ» مۇراجايىنىڭ مەڭگەرۋشىسى ءمولدىر بايماحانبەتوۆانىڭ ايتۋىنشا, باستاپقىدا كىتاپحاناعا عالىمنىڭ قولجازبالارى ساقتالعان 43 پاپكا اكەلىندى. جاقىندا 67 پاپكا تاعى جەتكىزىلدى. اكادەميك كىتاپحاناسىنىڭ قورى دا 850 كىتاپقا جەتتى. بۇلاردىڭ اراسىندا مۇحتار اۋەزوۆ, جيرمۋنسكي, مالوۆ, مانۋيلوۆ, نينا سميرنوۆا سىندى ۇستازدارىنىڭ قولتاڭبالارىمەن بەرىلگەن كىتاپتار بار.
زاكي احمەتوۆ 14 جاسىندا مەكتەپ ءبىتىرىپ, قازمۋ-ءدى 19 جاسىندا اياقتاعان. 1947-1950 جىلدارى لەنينگرادتاعى شىعىستانۋ ينستيتۋتىنىڭ اسپيرانتۋراسىندا وقىدى. 27 جاسىندا «لەرمونتوۆ جانە اباي» تاقىرىبىندا كانديداتتىق ديسسەرتاتسيا قورعادى. 40 جاسقا جەتپەي «قازاقتىڭ ولەڭ قۇرىلىسى» اتتى ديسسەرتاتسيانى قورعاپ, فيلولوگيا عىلىمدارىنىڭ دوكتورى عىلىمي دارەجەسىن يەلەندى.
«عالىمنىڭ كوپ ەڭبەكتەرى قولجازبا كۇيىندە قالدى. گازەت بەتتەرىندە شىققان ءبىراز ماقالاسى دا كىتاپتارىنا ەنبەي قالدى. قازىر شاكىرتتەرى ەڭبەكتەرىن جيناقتاپ, 10 تومدىعىن شىعارۋعا نيەتتەنىپ وتىر, – دەيدى م.بايماحانبەتوۆا.
