نۇر-سۇلتان قالاسىنىڭ اكىمى التاي كولگىنوۆ تۇركيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ۋفۋك ەكيدجي جانە دۇنيەجۇزىلىك بانكتىڭ قازاقستانداعى تۇراقتى وكىلى جان-فرانسۋا مارتومەن كەزدەستى.
ۋفۋك ەكيدجي مىرزامەن مادەنيەت, ەكونوميكا سالالارىنداعى ىنتىماقتاستىقتى ودان ءارى نىعايتۋ ماسەلەلەرى, ينۆەستيتسيالىق احۋالدى جاقسارتۋ جونىندەگى شارالاردى تالقىلادى. سونىمەن قاتار تۋريزم سالاسىنداعى ىنتىماقتاستىق كەلەشەگى, اتاپ ايتقاندا, ەكى ەلدىڭ استانالارى اراسىنداعى ىنتىماقتاستىقتى كۇشەيتۋ ماسەلەلەرى تالقىلاندى. قالادا تۇرىك كومپانيالارى بىرقاتار ءىرى جوبالاردى ىسكە اسىرۋدا. ونىڭ ىشىندە مەديتسينالىق ماسكالار شىعارۋ, امبەباپ كوپسالالى اۋرۋحانا سالۋ جانە تاعى باسقالارى بار.
وسى ورايدا ا.كولگىنوۆ مەملەكەت باسشىسى قاسىم-جومارت توقاەۆتىڭ حالىققا ارناعان جولداۋىندا ەكونوميكاعا ينۆەستيتسيا تارتۋدىڭ جانە ينۆەستورلارعا كەشەندى سەرۆيستىك قولداۋ كورسەتۋدىڭ ماڭىزدىلىعىن اتاپ وتكەنىن ەسكە سالدى.
دۇنيەجۇزىلىك بانكتىڭ قازاقستانداعى تۇراقتى وكىلى جان-فرانسۋا مارتومەن كەزدەسۋدە ەكولوگيا, كوگالداندىرۋ سالالارىنداعى ىنتىماقتاستىق جوسپارلارى, قاتتى تۇرمىستىق قالدىقتاردى قايتا وڭدەۋ, ەنەرگيا ۇنەمدەۋ تەحنولوگيالارىن ەنگىزۋ جانە تاعى باسقا ماسەلەلەر توڭىرەگىندە اڭگىمە ءوربىدى.
