استانادا پرەزيدەنت قاسىم-جومارت توقاەۆتىڭ توراعالىعىمەن تمد-عا مۇشە مەملەكەتتەر باسشىلارى كەڭەسىنىڭ شاعىن قۇرامداعى وتىرىسى ءوتتى. قاسىم-جومارت توقاەۆ تمد-عا مۇشە مەملەكەتتەر باسشىلارى كەڭەسىنىڭ وتىرىسىنا قاتىسۋ ءۇشىن كەلگەن دەلەگاتسيا جەتەكشىلەرىنە ريزاشىلىعىن ءبىلدىردى.
– ەڭ الدىمەن, قازاقستاننىڭ تمد ۇيىمىنا توراعالىعى اياسىنداعى باستامالارىنا قولداۋ ءبىلدىرىپ, وسى كۇندەرى استانادا ءوتىپ جاتقان حالىقارالىق ءىس-شارالارعا بەلسەندى قاتىسقاندارىڭىز ءۇشىن العىس ايتامىن. بۇگىنگى وتىرىسقا كەڭەس مۇشەسى رەتىندە تۇرىكمەنستان پرەزيدەنتى, قۇرمەتتى سەردار گۋربانگۋلىۇلى بەردىمۇحامەدوۆ العاش رەت قاتىسىپ وتىر. وسى جەردەگى ارىپتەستەردىڭ جانە ءوزىمنىڭ اتىمنان سىزگە قوش كەلدىڭىز دەي وتىرىپ, جاۋاپتى مەملەكەتتىك قىزمەتىڭىزگە تابىس تىلەيمىن. تاۋەلسىز مەملەكەتتەر دوستاستىعىنا قاتىسۋشى مەملەكەت باسشىلارى كەڭەسىنىڭ كەزەكتى وتىرىسىن اشىق دەپ جاريالايمىن. بۇگىن مەملەكەت باسشىلارى كەڭەسىنىڭ قاراۋىنا گۋمانيتارلىق سەرىكتەستىككە, قاۋىپسىزدىككە جانە ىنتىماقتاستىعىمىزدىڭ باسقا دا اسپەكتىلەرىنە قاتىستى ماڭىزدى ماسەلەلەر ۇسىنىلىپ وتىر, – دەدى مەملەكەت باسشىسى.
پرەزيدەنت دوستاستىققا مۇشە ەلدەردىڭ باسشىلارىن قازاقستان بىلتىر سەرىكتەستەرمەن جانە تمد اتقارۋشى كوميتەتىمەن بىرگە اتقارعان كوپجوسپارلى جۇمىستىڭ نەگىزگى قورىتىندىلارى تۋرالى حاباردار ەتتى. مەملەكەت باسشىسىنىڭ ايتۋىنشا, قازاقستان ءوز توراعالىعىنىڭ باسىمدىقتارىنا سايكەس, قازىرگى الەمدىك دامۋ پروتسەستەرىن ەسكەرە وتىرىپ, مۇشە مەملەكەتتەردىڭ كۇش-جىگەرىن كوپتەگەن باعىتتار بويىنشا بىرىكتىرۋگە ۇمتىلدى.
– بىرلەسكەن جۇمىستىڭ ناتيجەسىندە ساۋدا-ەكونوميكالىق ىنتىماقتاستىقتى كەڭەيتۋگە, تىعىز مادەني-گۋمانيتارلىق بايلانىستارىمىزدى ساقتاۋعا, سونداي-اق دوستاستىقتىڭ الەۋەتى مەن حالىقارالىق بەدەلىن ارتتىرۋعا باعىتتالعان بىرقاتار ماڭىزدى باستامالار ىسكە اسىرىلدى. كۇردەلى ەكونوميكالىق جاعدايدا دوستاستىقتىڭ ەكونوميكالىق الەۋەتىن نىعايتۋعا جانە تمد-نىڭ 2030 جىلعا دەيىنگى ەكونوميكالىق دامۋ ستراتەگياسىنىڭ ەرەجەلەرىن ورىنداۋعا ەرەكشە نازار اۋدارىلدى. ءىس-شارالار جوسپارىنىڭ ءبىرىنشى كەزەڭىن تابىستى جۇزەگە اسىرۋ ىسكەرلىك بەلسەندىلىكتى ارتتىرۋعا, ءوزارا ساۋدا كولەمىن ۇلعايتۋعا, ەكونوميكانى پاندەميادان كەيىن قالپىنا كەلتىرۋ ءىسىن جەدەلدەتۋگە مۇمكىندىك بەردى. جاھاندىق جانە وڭىرلىك ەكونوميكانىڭ تۇراقسىزدىعى جاعدايىندا ءبىز تىعىز ساۋدا-ەكونوميكالىق بايلانىستاردى ساقتاۋ ءۇشىن قولدا بار بارلىق الەۋەتتى جۇمىلدىرۋىمىز قاجەت, – دەدى قاسىم-جومارت توقاەۆ.
پرەزيدەنتتىڭ پىكىرىنشە, كليمات ماسەلەسى وزەكتى بولىپ وتىر. مەملەكەت باسشىسى كليماتتىڭ وزگەرۋى تمد-نىڭ بارلىق دەرلىك ەلدەرىندە سۋ رەسۋرستارىمەن قامتاماسىز ەتۋ پروبلەماسىن شيەلەنىستىرە تۇسەتىنىن اتاپ ءوتتى.
وتىرىس بارىسىندا سونداي-اق ازەربايجان پرەزيدەنتى يلحام اليەۆ, ارمەنيا پرەمەر-ءمينيسترى نيكول پاشينيان, بەلارۋس پرەزيدەنتى الەكساندر لۋكاشەنكو, قىرعىزستان پرەزيدەنتى سادىر جاپاروۆ, رەسەي پرەزيدەنتى ۆلاديمير پۋتين, تاجىكستان پرەزيدەنتى ەمومولي راحمون, تۇرىكمەنستان پرەزيدەنتى سەردار بەردىمۇحامەدوۆ جانە وزبەكستان پرەزيدەنتى شاۆكات ميرزيوەۆ ءسوز سويلەدى.
***
قازاقستان پرەزيدەنتىنىڭ توراعالىعىمەن تمد-عا مۇشە مەملەكەتتەر باسشىلارى كەڭەسىنىڭ كەڭەيتىلگەن قۇرامداعى وتىرىسى ءوتتى. مەملەكەت باسشىسى بۇل ءىس-شارا تمد ەلدەرىنىڭ COVID-19 پاندەمياسىنان كەيىنگى العاشقى تولىققاندى ءسامميتى ەكەنىن اتاپ ءوتتى.
– شاعىن قۇرامدا ءبىز ىنتىماقتاستىعىمىزدى ودان ءارى نىعايتۋدىڭ وزەكتى ماسەلەلەرى جونىندە جان-جاقتى پىكىر الماستىق, تاۋەلسىز مەملەكەتتەر دوستاستىعىن دامىتۋدىڭ نەگىزگى باسىمدىقتارىن ايقىندادىق. بۇل COVID-19-دان كەيىنگى تمد-نىڭ وفلاين فورماتتاعى العاشقى تولىققاندى ءسامميتى ەكەنىن اتاپ وتكىم كەلەدى. جالپى, استانامىزدا قايتا باس قوسۋىمىز قۋانىشتى جايت, – دەدى قاسىم-جومارت توقاەۆ.
مەملەكەت باسشىلارى بىردەن رەسمي قۇجاتتارعا قول قويۋ راسىمىنە كوشۋگە كەلىستى.
– قاجەتتى قۇجاتتارعا قول قويىلىپ جاتقاندا ءبىز تمد اتقارۋشى حاتشىسى لاۋازىمىن تمد باس حاتشىسى لاۋازىمىنا وزگەرتۋ تۋرالى ماسەلەنى شاعىن فورماتتا تالقىلاعانىمىزدى جاريالاعىم كەلەدى. اتالعان ماسەلەگە قاتىستى مەن وسىنداي ۇسىنىس جاسادىم. سەبەبى كەشە ءبىز اوسشك اتقارۋشى حاتشىسى لاۋازىمىن باس حاتشى لاۋازىمىنا وزگەرتۋ تۋرالى شەشىم قابىلدادىق. بۇعان دەيىن شىۇ-نىڭ اتقارۋشى حاتشىسى دا باس حاتشى لاۋازىمىنا وزگەرتىلدى. نەگىزىندە, بۇل اتقارۋشى ورگان لاۋازىمىنىڭ مارتەبەسىن ارتتىرۋ ءۇشىن ماڭىزدى, – دەدى پرەزيدەنت.
پرەزيدەنت ءسوزىن قورىتىندىلاي كەلە, وتكىزىلگەن ءسامميتتىڭ ناتيجەلى بولعانىن ايتتى.سونىمەن قاتار جيىندا تمد باس حاتشىسى سەرگەي لەبەدەۆ, رەسەي فەدەرالدىق جينالىسى فەدەراتسيا كەڭەسىنىڭ ءتورايىمى ۆالەنتينا ماتۆيەنكو ءسوز سويلەدى. تمد مەملەكەت باسشىلارى كەڭەسىنىڭ توراعاسى, قازاقستان پرەزيدەنتى قاسىم-جومارت توقاەۆ تاۋەلسىز مەملەكەتتەر دوستاستىعىنىڭ گراموتاسىن مەملەكەتارالىق «مير» تەلەراديوكومپانياسىنىڭ توراعاسى راديك باتىرشينگە تابىس ەتتى.
كەزدەسۋ سوڭىندا تمد-عا مۇشە مەملەكەت باسشىلارى مادەنيەت سالاسىنداعى ىنتىماقتاستىقتى دامىتۋ تۋرالى مالىمدەمەگە قول قويدى. سونداي-اق دوستاستىقتى ودان ءارى دامىتۋعا باعىتتالعان بىرقاتار قۇجات قابىلداندى.
