مەملەكەت باسشىسى قازاقستان قارجىگەرلەرى كونگرەسىنىڭ قاتىسۋشىلارىنا بەينەۇندەۋ جولدادى. قاسىم-جومارت توقاەۆ بەينەۇندەۋىندە جيىنعا قاتىسۋشىلاردى قازاقستان قارجىگەرلەرى كونگرەسىنىڭ اشىلۋىمەن قۇتتىقتاپ, بۇل ەلىمىز ءۇشىن ايرىقشا ماڭىزدى وقيعا ەكەنىن اتاپ ءوتتى.
«بيىلعى باسقوسۋ ۇلتتىق ۆاليۋتا كۇنى جانە تاۋەلسىزدىگىمىزدىڭ 30 جىلدىعى قارساڭىندا ءوتىپ جاتىر. مۇنىڭ سيمۆولدىق ءمانى زور. ويتكەنى ءتول تەڭگەمىز – ەلدىگىمىز بەن ەگەمەندىگىمىزدىڭ شىنايى بەلگىسى. ءبىز توقسانىنشى جىلداردىڭ باسىندا نەگىزگى نارىقتىق رەفورمالاردى جۇزەگە اسىردىق. قارجى قاتىناستارىن كەشەندى تۇردە قايتا قاراپ, جاڭعىرتتىق. الەمدەگى وزىق تاجىريبەنى ەسكەرە وتىرىپ, بانك سالاسىنا تۇبەگەيلى وزگەرىستەر ەنگىزدىك. ەلىمىزدىڭ تولىققاندى قارجىلىق ينفراقۇرىلىمى جاسالدى. سونىڭ ناتيجەسىندە قور جيناپ, ونى ءتيىمدى جۇمساۋعا مۇمكىندىك تۋدى. سونداي-اق اۋقىمدى ينۆەستيتسياعا جول اشىلدى» دەدى مەملەكەت باسشىسى.
پرەزيدەنتتىڭ ايتۋىنشا, ءبىز سىندارلى مەملەكەتتىك ساياساتتىڭ ارقاسىندا باسەكەگە قابىلەتتى قارجى سەكتورىن قالىپتاستىردىق. «قازاقستاننىڭ قارجى سالاسى وڭىردەگى ەڭ وزىق جۇيە سانالادى. بۇگىندە ونىڭ جيىنتىق اكتيۆى 35 تريلليون تەڭگەدەن اسادى. بۇل – ەلىمىزدىڭ ىشكى جالپى ءونىمىنىڭ تەڭ جارتىسىنان كوپ» دەدى قاسىم-جومارت توقاەۆ.
مەملەكەت باسشىسى وتكەن جىلدىڭ باسىندا كوروناۆيرۋس پاندەمياسى جانە ونىڭ سالدارى الەم ەكونوميكاسىنا وراسان زور زيان كەلتىرەتىنىن ەشكىم كۇتپەگەنىن اتاپ ءوتتى. سونداي-اق نارىقتاردىڭ قۇلدىراۋى كەيىنگى ءجۇز جىلدا بولعان ەڭ ايتۋلى وقيعانىڭ ءبىرى ەكەنىن ايتتى. «مەملەكەتتىك جانە حالىقارالىق ينستيتۋتتاردىڭ قابىلداعان تەڭدەسسىز شارالارى جاعدايدىڭ ودان ءارى شيەلەنىسىپ كەتۋىنە جول بەرمەدى. الايدا شيكىزات, ساۋدا جانە قارجى سالالارىنداعى احۋال ءالى دە قۇبىلمالى بولىپ تۇر. جاھاندىق سىن-قاتەرلەر مەن ۇردىستەردى ەسكەرە وتىرىپ, قارجى سالاسىن ودان ءارى دامىتۋ – مەملەكەتتىڭ باسىم باعىتتارىنىڭ ءبىرى. بۇل رەتتە ەلدىڭ ەكونوميكالىق ءوسىمىن قولداۋ ونىڭ نەگىزگى مىندەتى بولىپ قالا بەرەدى. مەملەكەت قيىن كەزەڭدەردە وتاندىق قارجى سەكتورىن ۇنەمى قولدادى. سونىڭ ارقاسىندا بۇگىندە بانكتەردىڭ جۇمىسى تۇراقتى ءارى ەكونوميكانى نەسيەلەندىرەتىن الەۋەتى جوعارى. سوندىقتان ولار ەكونوميكانى جىلدام قالپىنا كەلتىرۋدە جانە ونى ودان ءارى ءارتاراپتاندىرۋدا نەگىزگى ءرول اتقارۋعا مىندەتتى» دەدى پرەزيدەنت.
قاسىم-جومارت توقاەۆ وتاندىق قور نارىعىن, سونىڭ ىشىندە ەكونوميكانى قارجىلاندىرۋدىڭ تاعى ءبىر ماڭىزدى كوزىنە اينالۋى قاجەت «استانا» حالىقارالىق قارجى ورتالىعىن بەلسەندى دامىتۋ كەرەك ەكەنىن اتاپ ءوتتى. مەملەكەت باسشىسىنىڭ پايىمداۋىنشا, قازىرگى كەزەڭدە جاھاندىق قارجى ينستيتۋتتارىنىڭ قارقىندى دامۋىنا, كورسەتىلەتىن قارجىلىق قىزمەتتەردى بارىنشا تسيفرلاندىرۋعا بايلانىستى مىندەتتەردى دە ەسكەرۋ قاجەت. «بۇل ماسەلەلەر بايىپتى تالقىلاۋدى جانە تەڭگەرىمدى شەشىمدەردى ىزدەستىرۋدى قاجەت ەتەدى. وسى باعىتتاردىڭ دايەكتى دامۋى ەلىمىزدىڭ باسەكەگە قابىلەتتىلىگىن ارتتىرۋعا قوسىمشا جول اشادى. تۇپتەپ كەلگەندە, حالقىمىزدىڭ ءال-اۋقاتىن ارتتىرۋ – مەملەكەتتىك ورگانداردىڭ, قارجى ينستيتۋتتارىنىڭ الدىنداعى ورتاق مىندەت» دەدى مەملەكەت باسشىسى.
قازاقستان پرەزيدەنتى اتالعان جيىن ەلىمىزدىڭ قارجى سالاسىن نىعايتا ءتۇسۋ ءۇشىن ءتيىمدى شارالار ازىرلەۋگە سەپتىگىن تيگىزەتىنىنە سەنەتىنىن جەتكىزدى. بەينەۇندەۋ سوڭىندا قارجى جۇيەسىنىڭ قىزمەتكەرلەرىن تاعى دا كاسىبي مەرەكەسىمەن قۇتتىقتاپ, كونگرەسس جۇمىسىنا تابىس تىلەدى.
