تۇڭعىش پرەزيدەنت – ەلباسى نۇرسۇلتان نازارباەۆتىڭ توراعالىعىمەن «سامۇرىق-قازىنا» ۇلتتىق ءال-اۋقات قورىن باسقارۋ جونىندەگى كەڭەستىڭ وتىرىسى ءوتتى. جيىندا «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامى باسقارماسىنىڭ توراعاسى الماسادام ساتقاليەۆ قوردىڭ بيىلعى توعىز ايداعى قىزمەتىنىڭ قورىتىندىسى جانە نەگىزگى ستراتەگيالىق ماقساتتارى مەن دامۋ باسىمدىقتارى تۋرالى بايانداما جاسادى.
وتىرىسقا قاتىسۋشىلار «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامىنىڭ 2022-2031 جىلدارعا ارنالعان دامۋ ستراتەگياسىن ماقۇلدادى. اتالعان قۇجاتتا قازاقستان ەكونوميكاسىنىڭ ناقتى سەكتورىندا ينفراقۇرىلىمدىق, ەكسپورتقا باعدارلانعان جانە يمپورتتى الماستىراتىن جوبالاردى ىسكە اسىرۋدا ينۆەستيتسيانى ۇلعايتۋ قاراستىرىلعان.
سونداي-اق كەڭەس مۇشەلەرىنە «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامىنىڭ تومەن كومىرتەكتى دامۋعا كوشۋ جونىندەگى تۇجىرىمدامالىق تاسىلدەرى تانىستىرىلدى. وسى تۇرعىدا ەنەرگەتيكالىق جانە ەكولوگيالىق قاۋىپسىزدىك اراسىندا تەڭگەرىمدى ساقتاۋ قاجەتتىگى ايتىلدى. نۇرسۇلتان نازارباەۆ «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامى ۇسىنعان 2060 جىلعا قاراي كومىرتەگى بەيتاراپتىعىنا قول جەتكىزۋ ماقساتتارىن قولدايتىنىن ءبىلدىردى.
سونىمەن قاتار ەلباسى ەنەرگيا جەتكىزۋ تىزبەگىنىڭ بەرىكتىگىن نىعايتىپ, جەرگىلىكتى ۇلەستى ارتتىرۋدىڭ, ەكونوميكانى ءارتاراپتاندىرۋدىڭ, سونىڭ ىشىندە زاماناۋي ءوندىرىس قالىپتاستىرۋ ارقىلى ىشكى نارىقتى تاۋارمەن قامتۋ مەن ەكسپورت ۇلەسىن ۇلعايتۋدىڭ ماڭىزى زور ەكەنىنە توقتالدى.
«سامۇرىق-قازىنا» ۇلتتىق ءال-اۋقات قورىنىڭ شەتەلدىك وزىق تاۋەلسىز ءال-اۋقات قورلارىمەن ىنتىماقتاستىعى ماسەلەسىنە ەرەكشە نازار اۋدارىلدى. بۇل ورايدا ەلباسى بىرىككەن اراب امىرلىكتەرىمەن اراداعى قارىم-قاتىناس جوعارى قارقىنمەن دامىپ كەلە جاتقانىنا توقتالىپ, ولاردىڭ بىرەگەي تاجىريبەسى مەن ينۆەستيتسيالىق مۇمكىندىگى قازاقستان ەكونوميكاسىن جاڭعىرتۋ جولىندا اسا ماڭىزدى ەكەنىن اتاپ ءوتتى.
«حالىقارالىق ارىپتەستىك اياسىندا كۇش-جىگەر جۇمىلدىرۋ «سامۇرىق-قازىنا» ۇلتتىق ءال-اۋقات قورى مەجەلەگەن جاڭعىرۋدى جەدەلدەتىپ, ەكونوميكانى ءتيىمدى ارتاراپتاندىرۋعا سەپتىگىن تيگىزەدى. وسىلايشا جاڭا دامۋ ستراتەگياسىنداعى ماقساتتاردى ىسكە اسىرۋ قوردىڭ نەگىزگى مىندەتى رەتىندە قاراستىرىلىپ وتىر» دەدى تۇڭعىش پرەزيدەنت.
وتىرىس بارىسىندا «قازمۇنايگاز» ۇلتتىق كومپانياسى» اكتسيونەرلىك قوعامى, «قازاتومونەركاسىپ» ۇلتتىق اتوم كومپانياسى» اكتسيونەرلىك قوعامى جانە «قازاقتەلەكوم» اكتسيونەرلىك قوعامى باسشىلارىنىڭ قازىرگى احۋال مەن تاياۋ جىلدارداعى دامۋ بولجامى تۋرالى ەسەبى تىڭدالدى.
