ەلوردا سوڭعى جىلدارى الەۋمەتتىك تۇرعىن ءۇي قۇرىلىسى بويىنشا ءوز رەكوردىن جاڭارتىپ كەلەدى. بۇل دەڭگەي ارى قاراي دا ساقتالا بەرەدى. كەلەسى جىلى قولجەتىمدى تۇرعىن ءۇي سالۋ ءۇشىن الدىن الا دايىندىق باستالدى. ەندى ۋچاسكەلەردى, جوبالىق-سمەتالىق قۇجاتتامانى دايىنداۋ, ينجەنەرلىك جەلىلەردى تارتۋ جانە اۋماقتى اباتتاندىرۋ, قۇرىلىس جۇمىستارى جاندانادى.
بۇل تۋرالى ەلوردا اكىمى التاي كولگىنوۆ ءوزىنىڭ الەۋمەتتىك Instagram پاراقشاسىندا: «مەملەكەت باسشىسىنىڭ تاپسىرماسى بويىنشا قولجەتىمدى جەڭىلدىكتى تۇرعىن ءۇي كولەمىن ۇلعايتۋ بويىنشا جۇيەلى جۇمىس جۇرگىزىپ جاتىرمىز. مىسالى, 2022 جىلى كەمىندە 10 مىڭ الەۋمەتتىك پاتەر سالۋدى جوسپارلاپ وتىرمىز. اۋداندار «نۇر-سۇلتان – جايلى قالا» ماستەر-جوسپارىنىڭ تۇجىرىمداماسىنا سايكەس دامىپ جاتىر. وعان سايكەس الەۋمەتتىك نىساندار جاقىن ماڭايعا ورنالاساتىن بولادى. مىسالى, 2018 جىلى 1800 الەۋمەتتىك پاتەر سالىنسا, 2019 جىلعى كورسەتكىش – 2900, ال 2020 جىلى 7 مىڭ الەۋمەتتىك پاتەر سالىندى. بيىل بۇل كورسەتكىشتى 10 مىڭعا جەتكىزەمىز. كەلەسى جىلى دا وسىنداي كولەمدە پاتەر سالامىز. قولجەتىمدى تۇرعىن ءۇي قۇرىلىسىنىڭ كولەمىن ۇلعايتۋمەن قاتار, تۇرعىن ءۇي باعدارلامالارىن جەتىلدىرۋ بويىنشا دا جۇمىس ىستەپ جاتىرمىز: قاتىسۋشىلار ساناتىن ەداۋىر كەڭەيتتىك, تۇرعىن ءۇي سەرتيفيكاتتارىنىڭ مولشەرىن 1 ملن تەڭگەدەن 1,5 ملن تەڭگەگە دەيىن ۇلعايتتىق. سونىمەن قاتار, وسى جىلدىڭ قازان ايىندا جاستارعا ارنالعان ارنايى تۇرعىن ءۇي باعدارلاماسى ىسكە قوسىلدى. جەڭىلدەتىلگەن الەۋمەتتىك نەسيەلەندىرۋدىڭ بۇل باعدارلاماسى ەلوردانىڭ جاس ماماندارىنا (36 جاسقا دەيىن) ارنالعان. سونداي-اق ەلباسىنىڭ باستاماسىمەن قولعا الىنعان «جۇمىس ىستەيتىن جاستارعا جالعا بەرىلەتىن تۇرعىن ءۇي» باعدارلاماسىن جالعاستىرامىز» دەپ جازدى.
