ەلباسى نۇرسۇلتان نازارباەۆ تۇركىتىلدەس مەملەكەتتەردىڭ ىنتىماقتاستىق كەڭەسى VIII سامميتىنە قاتىسۋشىلارعا بەينەۇندەۋ جاساپ, اتالعان جيىننىڭ نەگىزگى مەسسەدجدەرىن اتادى. «بۇگىننەن باستاپ ءبىزدىڭ بىرلەستىك تۇركى مەملەكەتتەرىنىڭ ۇيىمى دەپ اتالادى.
بۇل قادام ەلدەر اراسىنداعى ىقپالداستىقتى ىلگەرىلەتۋ ءىسىن جاڭا دەڭگەيگە كوتەرىپ, ۇيىمنىڭ مارتەبەلى ميسسياسىن جۇزەگە اسىرۋعا تىڭ سەرپىن بەرەدى دەپ سەنەمىز. وسىلايشا ىستانبۇلدا قابىلداناتىن شەشىمدەر باۋىرلاس مەملەكەتتەردىڭ كوپقىرلى ىنقتىماقتاستىعىن جانداندىرۋعا ەلەۋلى ىقپال ەتۋى ءتيىس» دەگەن نۇرسۇلتان نازارباەۆ بۇل كەزەڭدى تۇركى الەمىنىڭ دامۋىنداعى جاڭا كەزەڭ دەپ اتادى.
«قۇرمەتتى مەملەكەت جانە ۇكىمەت باسشىلارى! بۇگىن تۇركى الەمىنىڭ دامۋ تاريحىندا جاڭا ءداۋىر باستالعالى وتىر. بۇل رەتتە مەنىڭ پىكىرىمشە, وسى باسقوسۋدان بىرنەشە مەسسەدج جولداۋعا بولادى. ءبىرىنشىسى, باۋىرلاس حالىقتارىمىزعا باعىتتالعان. ءبىز ولاردىڭ نازارىن تۇركى وركەنيەتىنىڭ الەمدىك تاريحتا كوپ عاسىردان سوڭ العاش رەت قايتا جاڭعىرىپ جاتقانىنا اۋدارىپ وتىرمىز. تۇركى ەلدەرى بىرىگىپ, جاڭا كۇن ءتارتىبى مەن يدەولوگياسىن قالىپتاستىرۋدا. سونىمەن بىرگە مەملەكەتتەرىمىزدىڭ, اتا-بابالارىمىزدىڭ ورتاق تاريحىن, رۋحاني مۇراسىن قايتا بايىپتاۋ ۇدەرىستەرى ءجۇرىپ جاتىر. باسقاشا ايتقاندا, ءححى عاسىردا تۇركى الەمى قايتا جاندانىپ, كەڭ اۋقىمدى ءارى ەجەلگى تۇركى شاڭىراعىنا جاتاتىن ەلدەردىڭ ءوزارا بەلسەندى جاقىنداسۋ ءۇردىسى جۇرەدى» دەدى ەلباسى.
