«نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ ءداستۇرلى «تۋعان ەلگە تاعزىم» ولكەتانۋ-زەرتتەۋ ەكسپەديتسياسى ءوز مارەسىنە جەتتى.
بەس كۇندىك ساپار NIS زياتكەرلەرىنە شالقار شابىت پەن جاڭا يدەيا سىيلادى. ەكسپەديتسيا اياسىندا وقۋشىلار جۇزدەگەن تاريحي-مادەني ورىندارعا, تابيعي مەكەندەر مەن ءوندىرىس وشاقتارىنا, ءبىلىم-عىلىم ۇيىمدارىنا باردى. تۋريستىك جورىق بارىسىندا ەلورداداعى فيزيكا-ماتەماتيكا باعىتىنداعى NIS وقۋشىلارى قازاق رۋحانياتى مەن مادەنيەتىندە ايرىقشا ورنى بار كۇلتەگىن ەسكەرتكىشىنىڭ كوشىرمەسىمەن تانىستى, ال ءور تۇلعا قابانباي باتىر كەسەنەسىنە بارعان حالىقارالىق باكالاۆريات مەكتەبىنىڭ وقۋشىسى ءالي ريناتۇلى Minecraft ويىنىنا كەسەنەنىڭ ماكەتىن ەنگىزگەن.
«بۇل ساياحات ءبىزدى جىگەرلەندىردى, ال باتىردىڭ رۋحى قاناتتاندىردى. قابانباي باتىر كەسەنەسىن زامانداستارىما تانىستىرۋ ماقساتىندا Minecraft ويىنىندا مەموريالدىق كەشەننىڭ ۇلگىسىن جاسادىم, بۇل ءبىر جاعىنان تۋعان ولكەنىڭ تاريحي جەرلەرىن ناسيحاتتاۋعا دا ارنالادى» دەيدى ءالي.
ايتا كەتەيىك, NIS-ءتىڭ «تۋعان ەلگە تاعزىم» ەكسپەديتسياسى 2021 جىلى قاراشا ايىندا وتكىزىلىپ, ەلىمىزدىڭ ءار وڭىرىنەن 800-گە جۋىق زياتكەرگە زەرتتەۋ جۇمىسىن جۇرگىزۋگە مۇمكىندىك بەردى. ەكسپەديتسيا اياسىندا ازىرلەنگەن جوبالار LibGuides پلاتفورماسىندا جاريالانادى, سونداي-اق جەلىلىك جانە رەسپۋبليكالىق عىلىمي جوبالار بايقاۋىنا جولدانادى.
