استانامەن قۇرداس انسامبل
ەركە ەسىلدىڭ جاعاسىنا ەلوردا قوندىرىلعاندا شاھار مادەنيەتىن باس قالا مارتەبەسىنە ساي بيىك دەڭگەيگە كوتەرۋ ماقساتى قويىلدى. استاناعا جان-جاقتان ەل تانيتىن بىلىكتى, تاجىريبەلى ماماندار شاقىرىلىپ, جاڭا ۇجىمدار قۇرىلا باستادى. باستاپقى كەزەڭدە قۇرىلعان ونەر ۇجىمدارىنىڭ ءبىرى – «سارىارقا» حالىق مۋزىكا ءانسامبلى.
استانانىڭ مەملەكەتتىك اكادەميالىق فيلارمونياسىنا قارايتىن اتالمىش انسامبلگە بيىل استانامەن قاتار 20 جىل تولدى. وسىعان وراي «استانا» كونتسەرت زالىندا «رۋحاني جاڭعىرۋ» باعدارلاماسى اياسىندا «ءان جىرىم «سارىارقا» 20 جىل» اتتى ەسەپ بەرۋ كونتسەرتى ءوتتى.
وسى كۇندەرگە ونەر ۇجىمى اۋىز تولتىرىپ ايتارلىقتاي جەتىستىكتەرمەن جەتتى. قۇرىلعانىنا ءبىر جىل تولار-تولماستان فرانتسيانىڭ ديجون قالاسىندا وتكەن حالىقارالىق شىعارماشىلىق فەستيۆالىنىڭ ءجۇلدەگەرى اتاندى. بۇدان كەيىن قىتاي, تۇركيا, رەسەي, گەرمانيا, ۇلىبريتانيا, بەلگيا, گوللانديا ەلدەرىنە بارىپ, تابىستى ونەر كورسەتتى. «عاسىرلار سازى» اتتى رەسپۋبليكالىق فولكلورلىق ەتنوگرافيالىق انسامبلدەردىڭ فەستيۆال-بايقاۋىندا ءبىرىنشى ورىندى يەلەندى. ءانسامبلدىڭ كوركەمدىك جەتەكشىسى – توعجان جاحين.
«سارىارقانىڭ» سازى ەسكەن بۇل كەشتە تاتتىمبەتتىڭ «سارجايلاۋ», تولەگەن مومبەكوۆتىڭ «سالتانات», كەنەن ازىرباەۆتىڭ «جاسا قازاقستانىم», توعجان جاحيننىڭ «دۋماندى سارىارقا» شىعارمالارى ورىندالدى.
كەشتە وسى ونەر ۇجىمىنىڭ قالىپتاسۋىنا زور ۇلەس قوسقان قازاقستاننىڭ ەڭبەك سىڭىرگەن قايراتكەرى گۇلزيرا بوكەيحان, مادەنيەت سالاسىنىڭ ۇزدىگى نۇراي تاناباەۆ, حالىقارالىق جانە رەسپۋبليكالىق بايقاۋلاردىڭ لاۋرەاتتارى كۇنسۇلۋ تۇرلىبەكوۆا, دانيار مۇقان, نۇرسۇلتان وسپانۇلى, نۇرلان تىلەۋجان, پەريزات تۇراروۆا اندەردى اۋەلەتتى. «شالقىما» حالىق مۋزىكاسى جانە ەسترادا بي انسامبلدەرى مىڭ بۇرالعان بيمەن كونتسەرتتى كوركەمدەدى.