استانادا جىل سايىنعى «شابىت» شىعارماشىل جاستاردىڭ حالىقارالىق فەستيۆالىنە قاتىسۋعا وتىنىمدەر قابىلداۋ باستالدى. بيىل بايقاۋ بەس اتالىم, اتاپ ايتقاندا, «كلاسسيكالىق مۋزىكا», «حالىق مۋزىكاسى», «ەسترادالىق ۆوكال», «حورەوگرافيا» جانە «جۋرناليستيكا» بويىنشا وتەدى.
5-9 قاراشا ارالىعىندا بەيبىتشىلىك جانە كەلىسىم سارايىندا وتەتىن بايقاۋدا 16-35 جاستاعى ءۇمىتكەرلەر ونەر جارىستىرادى. ۇيىمداستىرۋ كوميتەتىنىڭ شەشىمىمەن «كلاسسيكالىق مۋزىكا» اتالىمى كەلەسىدەي ىشكى اتالىمدارعا ءبولىنىپ وتىر: «اعاش ۇرمەلى اسپاپتار», «مىس ۇرمەلى اسپاپتار», «سوقپالى اسپاپتار», «كامەرالىق انسامبل».
«حالىق مۋزىكاسى» اتالىمى «قوبىز», «پريما قوبىز», «شەرتەر», «باس شەرتەر», «پريما دومبىرا» بولىپ بولىنسە, «حورەوگرافيا» اتالىمىندا تەك حالىق ءبيىن ورىنداۋشىلار عانا ونەر كورسەتەدى. ال «جۋرناليستيكا» اتالىمىنا ەكى باعىت قوسىلدى – «تەلەۆيدەنيە» جانە «ينتەرنەت رەسۋرستار».
«جۋرناليستيكا» «شابىت» فەستيۆالىنىڭ باعدارلاماسىندا سوڭعى رەت 6 جىل بۇرىن بولعان. بيىل استانانىڭ 20 جىلدىعىن مەرەكەلەۋگە وراي بۇل اتالىم قايتا ەنگىزىلدى. بايقاۋعا مەرەيتويلىق داتاعا جانە ەلورداعا ارنالعان تەلەۆيزيالىق باعدارلامالار, دەرەكتى فيلمدەر (حرونومەتراجى 20 مينۋتتان اسپايدى) جانە ينتەرنەت رەسۋرستارداعى جاريالانىمدار قاتىسادى.
ءار اتالىم بويىنشا تولىق ەرەجە ءححى «شابىت» حالىقارالىق شىعارماشىل جاستار فەستيۆالىنىڭ www.shabyt.astana.kz سايتىندا جانە استانا قالاسى ءمادەنيەت جانە سپورت باسقارماسىنىڭ www.madeniet-sport-astana.kz سايتىندا جاريالانعان. وتىنىمدەردى قابىلداۋ 25 قازانعا دەيىن جالعاسادى.
