ەلوردا اكىمدىگى مەن قالالىق ينۆەستيتسيا جانە كاسىپكەرلىكتى دامىتۋ باسقارماسىنىڭ مۇرىندىق بولۋىمەن استانادا تمد ەلدەرى جانە قىتايدىڭ دارىگەرلەرى مەن مەديتسينالىق اگەنتتەرىنە ارنالعان اقپاراتتىق تۋر ۇيىمداستىرىلدى. 20 مامىر مەن 1 ماۋسىم ارالىعىندا ەلوردانىڭ جەتەكشى مەديتسينالىق نىساندارىن ارالايتىن شەتەلدىك قوناقتار استانانىڭ مەديتسينالىق الەۋەتىمەن تانىسۋ ءۇشىن شاقىرىلدى. بۇل ءوز كەزەگىندە ەلورداداعى مەديتسينالىق ءتۋريزمدى دامىتۋعا سەپتىك ەتەدى.
تۋر بارىسىندا اتالعان ەلدەردەن كەلگەن مەديتسينا ماماندارىنا قالانىڭ ەڭ ۇزدىك ەمدەۋ مەكەمەلەرى, مەديتسينالىق قىزمەتتەردىڭ نەگىزگى باعىتتارى, سونىمەن قاتار قالانىڭ تۋريستىك ينفراقۇرىلىمى تانىستىرىلدى. اتاپ ايتقاندا, تۋرعا قاتىسۋشىلار «UMC» كورپوراتيۆتىك قورى, ۇلتتىق بالالاردى وڭالتۋ ورتالىعى, ۇلتتىق نەيروحيرۋرگيا ورتالىعى, ۇلتتىق عىلىمي ونكولوگيا ورتالىعى, قر پرەزيدەنتى ءىس باسقارماسى اۋرۋحاناسىنىڭ, حالىقارالىق «UMIT» توموتەراپيا ونكولوگيالىق ورتالىعىنىڭ, Green Clinic, Razzak Residence Clinic, Doctor Dent, Callisto Beauty Clinic, Tulip Medicine سياقتى ۇيىمداردىڭ جۇمىسىن بارىپ كوردى. بۇل مەكەمەلەر ونكولوگيا, كارديوحيرۋرگيا, نەيروحيرۋرگيا باعىتىندا ەمدەۋدىڭ وزىق ادىستەرىن ۇسىنادى جانە بالالاردى وڭالتۋ مەن ەكستراكورپورالدى ۇرىقتاندىرۋ مۇمكىندىكتەرىن كورسەتەدى. وسى قىزمەتتەردىڭ شەتەلدىك ناۋقاستارعا قالاي كورسەتىلەتىنى تۋرالى دا تۋر بارىسىندا تولىق مالىمەت بەرىلدى.
ۇيىمداستىرۋشىلاردىڭ ايتۋىنشا, بىلتىر ەلوردا مەديتسيناسىنا شەتەلدىكتەر تاراپىنان قىزىعۋشىلىق ارتقانى بايقالدى. اسىرەسە, كارديوحيرۋرگيا, نەيروحيرۋرگيا, ستوماتولوگيا, بالالار رەابيليتاتسياسى جانە رەپرودۋكتولوگيا سالالارىنا سۇرانىس وسكەن. ماسەلەن, قىتايدان كەلەتىن ناۋقاستار تاراپىنان ەكۇ باعدارلاماسىنا قىزىعۋشىلىق كوبەيگەن. بۇل مۇنداي قىزمەتكە جاھاندىق اۋقىمدا سۇرانىس جوعارى ەكەنىن جانە وسى باعىتتا استاناداعى مەديتسينالىق قىزمەت كورسەتۋ ساپاسىنا سەنىم ورناعانىن بىلدىرەدى. وسىعان وراي ءتۇرلى ەلدەردىڭ مەديتسينالىق اگەنتتەرى اتالعان باعدارلاماعا قاتىسۋعا بەلسەندى تۇردە شاقىرتىلۋدا. ولاردىڭ ءتۇرلى ەلدەردەن كەلەتىن مەديتسينالىق تۋريستەردىڭ قاجەتتىلىكتەرىن ءتۇسىنۋى مەن ساراپتاۋى استانا قالاسىندا ءتيىستى ەمدى قابىلداۋ ءۇشىن جايلى جانە ءتيىمدى ساياحاتتى قامتاماسىز ەتۋگە مۇمكىندىك بەرەدى.
ۇلتتىق بالالاردى وڭالتۋ ورتالىعىنا كەلگەن كەزدە قوناقتاردىڭ ءبىرى, ازەربايجاندىق مەديتسينالىق اگەنتتىك ديرەكتورى كامالا گۋليەۆا ەلوردا مەديتسيناسىن جوعارى باعالادى.
– ءبىزدى استانا قالاسىنىڭ اكىمدىگى مەن قالالىق ينۆەستيتسيا جانە كاسىپكەرلىكتى دامىتۋ باسقارماسى ارنايى شاقىردى. قازاقستان شەتەلدەن مەديتسينالىق تۋريستەر قابىلداۋعا ايتارلىقتاي دايىن دەپ سانايمىن. ءوزىم ناۋقاستاردى شەتەلدەردە ەمدەلۋگە جىبەرۋمەن اينالىسامىن. ەلورداداعى ەمدەۋ مەكەمەلەرىنىڭ جۇمىسىمەن تانىسۋ بارىسىندا كوبىنىڭ زاماناۋي تالاپتارعا جاۋاپ بەرەتىن تەحنولوگيالارمەن جابدىقتالعانىنا كوزىمىز جەتتى. اسىرەسە, مەن ءسىزدىڭ قالاڭىزداعى ونكولوگيالىق ورتالىق جۇمىسىنىڭ جوعارى دەڭگەيدە ەكەنىن ايتقىم كەلەدى جانە مەنىڭ ويىمشا وسى باعىتتا ناۋقاستاردى جىبەرۋگە ابدەن بولادى, – دەدى ول.
ءىس-شارانىڭ ماقساتى – ەلوردانىڭ مەديتسينالىق تۋريستىك الەۋەتىن تانىستىرۋ عانا ەمەس, سونىمەن قاتار ءتۇرلى ەلدەردىڭ مەديتسينالىق ماماندارى جانە اگەنتتەرىمەن ارادا ىنتىماقتاستىق پەن ارىپتەستىك بايلانىس ورناتۋ.
