استانا قالاسى كاسىپوداقتار كەڭەسى مەن استانالىق سالالىق كاسىپوداقتارى «نۇر وتان» قالالىق پارتياسىنىڭ قولداۋىمەن ۇزاق جىلدار بويى ۇرپاقتار ساباقتاستىعىن ۇزبەستەن, بۇكىل اۋلەتىمەن تەك ءبىر سالادا تەر توككەن ەڭبەككەر جاندارعا ەرەكشە قۇرمەت كورسەتتى.
«اتادان بالاعا جالعاسقان ءبىر كاسىپپەن اينالىسىپ, الدىڭعى تولقىننىڭ تاجىريبەسىن جاڭا ۇرپاقتىڭ جاڭالىعىمەن جاڭعىرتۋدى داستۇرگە اينالدىرعان ازاماتتاردى دارىپتەۋ ارقىلى ەڭبەك ادامىنىڭ بەدەلىن كوتەرەمىز» دەدى قالالىق كاسىپوداق كەڭەسىنىڭ ءتوراعاسى سارسەنباي مىڭباەۆ ماراپاتتاۋ ساتىندە سويلەگەن سوزىندە. ول ونەگەلى وتباسىلار جايىندا قىسقاشا توقتالىپ ءوتىپ, سىي-سياپات تابىس ەتتى. ولاردىڭ اراسىندا «استانا سۋ ارناسى» مەكەمەسىنىڭ وكىلى دالكەەۆتەر وتباسى, پەداگوگتار اۋلەتىنەن – №40 مەكتەپتىڭ ديرەكتورى ەربول ىرگەباەۆ, دەنساۋلىق ساقتاۋ سالاسىنان بەلوكوبىلوۆتار وتباسى جانە ەلوردا مادەنيەتىنىڭ تانىمال اۋلەتى وسەلباەۆتار مەن تەمىرجولشىلار اۋلەتى – جاپاروۆتاردىڭ وتباسىلارى بار.
جالپى ەڭبەك ءوتىلى 640 جىلدى قۇرايتىن جاپاروۆتار وتباسىن قازاقستان تەمىر جولىنىڭ ماقتانىشى دەپ ايتۋعا بولادى ەكەن. اۋلەتتىڭ تاريحىنا ۇڭىلسەك, 1934 جىلدارى اعايىندى زەينەلعابيدەن مەن بەيسەمباي جاپاروۆتار ءبىرى ديسپەتچەر, ءبىرى جولسەرىك بولىپ تەمىر جول بويىنا جۇمىسقا ورنالاسادى. سودان بەرى بۇل اۋلەتتىڭ كوپتەگەن وكىلدەرى ماشينيست, ينجەنەر, وپەراتور, كاسسير, تاعى باسقا وسى سالانىڭ ءتۇرلى ماماندىقتارىن يگەرگەن. بۇل كۇندە زەينەلعابيدەننىڭ قىزى ساۋلە اۋلەتتىڭ ۇلكەنى رەتىندە اكە جولىن جالعاستىرىپ كەلەدى. داڭقتى اۋلەتتەن شىققان التى ازامات بۇگىندە استانا ستانساسىندا ەڭبەك ەتۋدە.
استانالىق پەداگوگتار وتباسىنىڭ جارقىن وكىلى رەتىندە ىرگەباەۆتاردى ايتۋعا بولادى. ۇستازدىق ەتۋدەن جالىقپاعان ونەگەلى جانۇيادا تاريحشى, ادەبيەتشى, ماتەماتيكا ءپانىنىڭ مۇعالىمدەرى وسكەلەڭ ۇرپاقتى تاربيەلەۋگە اتسالىسۋدا.
ال, وسەلباەۆتار اۋلەتى استانالىقتارعا جاقسى تانىس. اڭ پاتشاسى ارىستاندى قولعا ۇيرەتىپ, دەگەنىنە كوندىرگەن مارقۇم مۇرات وسەلباەۆتىڭ ءىسىن بۇل كۇندە جارى مەن كەلىن-بالاسى, جالعاستىرىپ كەلەدى. تۋنگالاگ وسەلباەۆا ۇيرەتىلگەن ارىستاندارىمەن استانالىق تسيركتىڭ شىمىلدىعىن اشقان ەدى. سيرەك كاسىپ اكەدەن بالاعا قالىپ, جالعاسىن تاپتى. مۇراتتىڭ ۇلى مۇحتار – جاس اڭ ۇيرەتۋشىلەردىڭ ءبىرى.
– بەلگىلى ءبىر مەكەمەدە ءبىر اۋلەتتىڭ وكىلدەرى ەڭبەك ەتىپ, ابىرويعا بولەنۋى سيرەك كەزدەسەدى. بۇل ءبىر جاعىنان كاسىپورىننىڭ ورنىقتىلىعىن بىلدىرەدى. ودان بولەك جۇمىسشىلارعا جاعداي جاسالىپ, ولاردىڭ الەۋمەتتىك قولداۋىن دا قوسۋعا بولادى. ال بۇنىڭ ءبارى وتباسىنداعى بالا تاربيەسىندە كورىنىس تاۋىپ, ولاردىڭ ءومىر جولىن تاڭداۋدا دۇرىس شەشىم جاسايتىنىنا كوزىمىز جەتىپ وتىر, – دەدى رەسپۋبليكالىق مادەنيەت, سپورت جانە اقپارات قىزمەتكەرلەرى كاسىپوداعىنىڭ استانا قالالىق فيليالىنىڭ ءتورايىمى سۆەتلانا يمانقۇلوۆا.
ايگۇل ۋايسوۆا
