ينۆەستيتسيالار الاڭىنداعى مىقتى ويىنشى
كەشە قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كىتاپحاناسىندا مەملەكەت باسشىسى نۇرسۇلتان نازارباەۆ يندۋستريالاندىرۋ باعىتىنا ارنالعان كەڭەس وتكىزدى. كەڭەس بارىسىندا جالپىۇلتتىق تەلەكوپىر ارقىلى ەلباسى ايماقتارداعى بىرقاتار ءوندىرىس وشاقتارىنىڭ جۇمىسىمەن تانىستى. قازاقستاننىڭ ەۋرازيالىق ەكونوميكالىق وداقتىڭ ينۆەستيتسيالىق ورتالىعىنا اينالۋ مۇمكىندىگى مول. باستى ماقسات تا سول. وسىلاي مالىمدەگەن مەملەكەت باسشىسى بۇل رەتتە اتقارىلىپ وتىرعان ىستەرگە توقتالدى.
«ەلىمىزدەگى ينۆەستيتسيالىق احۋال تارتىمدى بولا ءتۇسۋ ءۇشىن بارلىق كۇشىمىزدى سالىپ وتىرمىز. مەنىڭ مامىر ايىنىڭ اياعىندا قىتايعا جاساعان ساپارىمنىڭ قورىتىندىسىندا ەكونوميكامىزعا تاعى 10 ميلليارد دوللار ينۆەستيتسيا قۇيىلاتىن بولدى. بۇل ينۆەستيتسيالاردىڭ ارتىندا تاراز بەن شىمكەنتتەگى, ماڭعىستاۋ, اقتوبە, الماتى وبلىستارىنداعى حيميالىق جانە مۇناي-گاز سالالارىن قامتيتىن جاڭا كاسىپورىندار تۇر. بارلىق اكىمدەر, مينيسترلىكتەر مەن ۆەدومستۆولار ءوز جۇمىستارىندا وسىنى باسشىلىققا الۋلارى كەرەك. ءوندىرىس بەينەسىن يننوۆاتسيالىق, عىلىمي نەگىزدەلگەن جوبالار تۇبەيگەلى وزگەرتەدى. قازاقستان وسى جاعىنان بىرقاتار باسىمدىقتارعا يە. بۇل ارتىقشىلىعىمىز مەملەكەتىمىزدى ينۆەستيتسيالار الاڭىندا مىقتى ويىنشىعا اينالدىرىپ وتىر» دەدى نۇرسۇلتان ءابىشۇلى.
شەتەلدىك ينۆەستورلار كەڭەسىندە ايتقاندارىن پىسىقتاعان ەلباسى گەوەكونوميكالىق تۇرعىدان ءتيىمدى جاعدايىمىز, ساياسي تۇراقتىلىعىمىز, ەكونوميكالىق ءوسۋىمىز, دامىعان ينفراقۇرىلىمىمىز, مەملەكەت دامۋى ستراتەگياسىنىڭ ايقىندىلىعى ينۆەستورلاردى ەلىمىزگە تارتۋعا سەپتەسىپ, ولاردىڭ ۇتىلماۋىنا جاعداي تۋدىرادى.
نۇرسۇلتان نازارباەۆ سونداي-اق, ۇدەمەلى يندۋستريالىق يننوۆاتسيالىق دامۋ باعدارلاماسىنىڭ بيىلعى ءبىرىنشى جارتىجىلدىق قورىتىندىلارىن قامتىعان ۇكىمەتتىڭ ەسەبىن تىڭدادى. بەلگىلى بولعانداي, وسى كەزەڭدە يندۋستريالاندىرۋ كارتاسىنا ەنگەن 21 جوبا ىسكە قوسىلىپ, 2 مىڭ تۇراقتى جۇمىس ورنى اشىلعان. ەكىنشى جارتىجىلدىقتا تاعى 100-گە تارتا جوبا جۇزەگە اسىپ, 8 مىڭ ادامنىڭ ەكى قولىنا جۇمىس تيمەك.
جالپىۇلتتىق تەلەكوپىر ارقىلى وڭىرلەردەگى ءوندىرىس وشاقتارىنىڭ وكىلدەرى ەل پرەزيدەنتىنە ەسەپ بەردى. جۇمىستارىنىڭ ءارى قارايعى باعىتى جونىندە اڭگىمەلەدى. ولاردىڭ اراسىندا اتىراۋداعى دۋالدىق وقىتۋدىڭ حالىقارالىق ستاندارتتارىنا سايكەس كەلەتىن مۇناي-گاز سالاسىنىڭ كادرلارىن دايارلاۋ جانە قايتا دايارلاۋ ءجونىندەگى وڭىرارالىق كاسىبي ورتالىعى, الماتىداعى يندۋستريالىق ايماق, باتىس قازاقستان وبلىسىنداعى اقساي يندۋستريالىق پاركى, ەرەيمەنتاۋداعى قۋاتى 45 مۆت ونەركاسىپتىك جەل پاركىنىڭ قۇرىلىسىنىڭ باسشىلىعى بولدى. نۇرسۇلتان نازارباەۆ بىرقاتار جاڭا كاسىپورىنداردى ىسكە قوستى. اتاپ ايتساق, كەشە «قورعاس – شىعىس قاقپاسى» اەا قۇرعاق پورتى جانە سەمەيدەگى «سولتۇستىك-شىعىس-وڭتۇستىك» ەلەكتر بەرۋ جەلىلەرى ءوز جۇمىستارىن باستادى.
امانعالي شميتۇلى