حالىقارالىق «ازيا جاڭعىرىعى» فەستيۆالى بيىل جەتىنشى رەت شىمىلدىعىن ءتۇردى. بايقاۋ ۇرمەلى اسپاپتار وركەسترىنىڭ سۇيەمەلدەۋىمەن استانا كوشەلەرىندەگى «كاۆالكادا» مەرەكەلىك شەرۋىمەن اشىلدى.
جاقىن جانە الىس شەتەل ارتىستەرىن جينايتىن بايقاۋ جىلدان-جىلعا قۇلاشىن كەڭگە جايىپ كەلەدى. بۇل – ءار ەلدىڭ ارتىستەرى اراسىنداعى ەڭ مىقتىلاردىڭ ونەر دوداسى عانا ەمەس, سونىمەن قاتار, حالىقارالىق قازىلار القاسى ساراپتايتىن ەڭ ءىرى باعالاۋ الاڭى. بيىلعى سايىستا ادەتتەگىدەن اسەرلى جاڭا كورىنىستەر كورەرمەندەرگە تارتۋ ەتىلەدى. فەستيۆالدىڭ باعدارلاماسى جاڭا, قىزىقتى ءارى قاۋىپتى قويىلىمدارعا تولى. ءاربىر قاتىسۋشى ءوز مەملەكەتىنىڭ ۇلتتىق تسيرك ەرەكشەلىكتەرىن ورتاعا سالادى. «استانالىق تسيرك» مانەجىندە رەسەي, قىتاي, موڭعوليا, ۆەتنام, بەلارۋس, ياكۋتيا, ۋكراينا, وزبەكستان جانە قازاقستاننىڭ ارتىستەرى سەگىز كۇن بويى ونەر كورسەتەدى. ولاردىڭ كوبى – بۇكىلالەمدىك فەستيۆال جەڭىمپازدارى مەن لاۋرەاتتارى, ءوز جانرلارىنىڭ حاس شەبەرلەرى, تسيرك اۋلەتىنىڭ ۇرپاقتارى. اسقان شەبەر جونگلەرلەر, اۋە گيمناستشىلارى مەن اكروباتتار, كوڭىلدى سايقىمازاقتار كورەرمەنگە ەرەكشە اسەر قالدىرادى. سونداي-اق, ۇيرەتىلگەن ءتۇرلى جانۋارلاردى تاماشالاۋعا بولادى. بۇل تسيرككە كەلگەن كىشكەنتاي كورەرمەندەرگە تەڭدەسسىز سىي بولارى انىق.
«استانالىق تسيركتىڭ» رەجيسسەرى ليليا كۋدەركونىڭ ايتۋىنشا, فەستيۆالگە قاتىسۋعا ون سەگىز ءوتىنىم ءتۇسىپتى. «العاش رەت ياكۋتيا مەن ۆەتنامنىڭ ونەرپازدارى قاتىسايىن دەپ وتىر. بارلىعى ەرەكشە دايىندىقپەن كەلىپتى. تسيرك ساحناسىنا پونيلەر, اۋعان تازىلارى, ارىستاندار, يتتەر شىعادى. وتكەن جىلداردا بۇل نومەرلەر بولعان جوق» دەيدى. ال, قىتاي تسيركىنىڭ ءارتىسى دجان يۋن حۆەي استاناعا العاش رەت كەلىپتى. «ارنايى دايىنداپ كەلگەن كلاسسيكالىق باعدارلامامىز بار. ەشقانداي دا ساقتانۋ قۇرالدارىن قولدانباي اۋەدە ونەر كورسەتەمىز. قيىن, قىزىق. كورۋگە تۇرارلىق قويىلىم» دەيدى.
بيىلعى فەستيۆالدىڭ تاعى ءبىر ەرەكشەلىگى سايىس تۇرىندە وتكىزىلەدى. الەمدىك ارتىستەردىڭ ونەرىنە حالىقارالىق دەڭگەيدەگى جۇلدىزدار قازىلىق ەتەدى. بايقاۋ 6, 7 ءشىلدەدە جۇرگىزىلىپ, 8 شىلدەدە قورىتىندىلانادى. وعان جۇرتشىلىققا كەڭىنەن تانىمال «استانالىق تسيركتىڭ» باس ديرەكتورى ەرىك جولجاقسىنوۆ – قازىلار توراعاسى, رەسەيلىك «روسگوستسيركتىڭ» باس ديرەكتورى ۆاديم گاگلوەۆ, رەسەي حالىق ءارتىسى, ۆەرنادسكي داڭعىلىنداعى ماسكەۋ ۇلكەن تسيركىنىڭ باس ديرەكتورى ەدگارد زاپاشنىي, نيكۋلين اتىنداعى ماسكەۋ تسيركىنىڭ باس ديرەكتورى ماكسيم نيكۋلين, ۋكراينا مەملەكەتتىك تسيركىنىڭ باس ديرەكتورى يگور حلەبوسولوۆ جانە باسقا دا تۇلعالار تورەلىك ەتەدى.
ەركەجان ساتىمبەك
