نۇر-سۇلتان قالاسىنىڭ پوليتسياسى وزىنە جۇكتەلگەن مىندەتتەردى ابىرويمەن اتقارىپ, باس شاھاردىڭ قوعامدىق ءتارتىبىن قامتاماسىز ەتۋدە كۇن دەمەي, ءتۇن دەمەي ەڭبەك ەتۋدە.
سونىڭ ارقاسىندا جىل باسىنان بەرى قىلمىس جاساۋ 5,5%-عا تومەندەدى. سونداي-اق ەسىرتكى قىلمىستارىنا قارسى كۇرەستە ەسىرتكىنى ساتۋ, جارنامالاۋ جانە ەلوردا ارقىلى تاسىمالداۋ فاكتىلەرىن انىقتاۋعا دا باستى نازار اۋدارىلۋدا. زاڭسىز اينالىمنان 169 كگ ەسىرتكى, ونىڭ ىشىندە 2,3 كگ «گەروين» الىندى. ەسىرتكى ازىرلەۋمەن اينالىساتىن ءۇش زەرتحانانىڭ قىزمەتى توقتاتىلىپ, 5 كگ-دان استام «سينتەتيكا» تاركىلەندى.
ۇكىمەتتىك ەمەس ۇيىمدار مەن ەرىكتىلەردىڭ, سپورت مەكەمەلەرىنىڭ قاتىسۋىمەن 248 رەت الدىن الۋ شارالارى وتكىزىلىپ, 40 ەسىرتكى سايتى بۇعاتتالدى. «نۇر-سۇلتان – ەسىرتكىسىز قالا» 2022-2025 جىلدارعا ارنالعان جاڭا باعدارلاما ازىرلەندi.
بۇگىنگى تاڭدا قۇقىق قورعاۋشىلار ءۇشىن قوعاممەن ءوزارا ءىس-قيمىل, پوليتسيا قىزمەتىنىڭ اشىقتىعى, سەرۆيستىك مودەلگە كوشۋ ماسەلەلەرى وزەكتى بولىپ وتىر.
الماتى جانە سارىارقا اۋدانى اۋماعىندا «قازاقستان پوليتسياسىنىڭ سەرۆيستىك مودەلى» پيلوتتىق جوباسى جۇزەگە اسىرىلۋدا.
قوعامدىق ورىنداردا قىزمەتكەرلەردىڭ تۇراقتى قاتىسۋىن قامتاماسىز ەتۋ ماقساتىندا پوليتسيا جۇمىسىنا «جۇرتقا جاقىن پوليتسەي» قاعيداتى ەنگىزىلۋدە.
وتكەن جىلى قالا بويىنشا 10 مودۋلدىك ستاتسيونارلىق پوليتسيا بەكەتى ورناتىلدى. ۋچاسكەلىك پوليتسيا پۋنكتىنىڭ سانى 27-دەن 41-گە كوبەيدى.
پوليتسيانى شۇعىل شاقىرۋ جانە دابىل سيگنالىن بەرۋ ءۇشىن ادامدار كوپ جينالاتىن ورىنداردا 13 «SOS» دابىل باتىرماسى ورناتىلدى.
مەملەكەت باسشىسى 2022 جىلدى «بالالار جىلى» دەپ بەلگىلەدى. وسىعان بايلانىستى مەكتەپ اكىمشىلىگىمەن جانە اتا-انالار كوميتەتتەرىمەن ءوزارا ءىس-قيمىل جۇمىستارى قايتا قارالدى.
1 قاڭتاردان باستاپ مەكتەپ ينسپەكتورلارى لاۋازىمدارى قىسقارتىلدى. ەندى يۋۆەنالدىق پوليتسيا قىزمەتكەرلەرى مەكتەپتەردە وتىرمايدى, ولار بەكىتىلگەن ۋچاسكەلەردە, ونىڭ ىشىندە ءبىلىم بەرۋ مەكەمەلەرىنىڭ اۋماقتارىندا الدىن الۋ جۇمىستارىن قامتاماسىز ەتەدى.
كەيىنگى كەزدە قالادا كولىك قۇرالدارىن ماساڭ كۇيدە جۇرگىزۋ فاكتىلەرى ايتارلىقتاي الاڭداتادى. وسى باعىتتاعى جاۋاپتىلىقتىڭ كۇشەيتىلگەنىنە قاراماستان, 1 892 ماس جۇرگىزۋشى ۇستالىپ, كولىك جۇرگىزۋ قۇقىعىنان ايىرىلسا, 1 382 جۇرگىزۋشى اكىمشىلىك قاماۋعا الىندى. جول-كولىك وقيعاسىن جاساعان 33 جۇرگىزۋشى قىلمىستىق جاۋاپكەرشىلىككە تارتىلدى.
جىل باسىنان بەرى ازاماتتاردى تۇرعىلىقتى جەرلەرى بويىنشا تىركەۋ, ازاماتتىق قارۋدى تىركەۋ, جەكە كۋالىكتەر مەن پاسپورتتاردى رەسىمدەۋ سياقتى 1 ملن 245 مىڭ قىزمەت ءتۇرى كورسەتىلدى.
ازاماتتارعا ىڭعايلى بولۋ ءۇشىن جانە سىبايلاس جەمقورلىق كورىنىستەرىنە جول بەرمەۋ ماقساتىندا 91% قىزمەت ءتۇرى ەلەكتروندىق تۇرگە اۋىستىرىلعان. الداعى ۋاقىتتا جۇيەنى 95%-عا دەيىن اۆتوماتتاندىرۋ جوسپارلانىپ وتىر.
