كەشە «اۋىل» پارتياسىنان پارلامەنت ماجىلىسىنە ۇمىتكەرلەر – پارتيا توراعاسىنىڭ ءبىرىنشى ورىنباسارى تولەۋتاي راقىمبەكوۆ پەن بەلگىلى تەلەجۋرناليست زەيىن الىپبەك باس رەداكتورلار كلۋبىنىڭ مۇشەلەرىمەن كەزدەستى. اتالمىش جۇزدەسۋ ونلاين فورماتتا ۇيىمداستىرىلدى.
جيىنعا قاتىسۋشىلار باق-تاعى قازاق ءتىلدى كونتەنتتى ۇلعايتۋ ماسەلەسى بويىنشا پىكىر الماستى. تالايىمىزعا التىن بەسىك بولعان اۋىلداردىڭ وزەكتى ماسەلەلەرىن تالقىلادى. قازىر قالاعا قاراعاندا, اۋىل تۇرعىندارى ازشىلىققا اينالدى. وتكەن عاسىردىڭ توقسانىنشى جىلدارى اۋىل حالقىنىڭ باسىنا تۇسكەن ءتۇرلى اۋىرتپالىقتار, سونىڭ ىشىندە جۇمىسسىزدىق ولاردى شاھارلارعا كوشۋگە ماجبۇرلەدى. ت.راقىمبەكوۆتىڭ پىكىرىنشە, وسى كۇندەرى تۇتاستاي اۋىلدىق وكرۋگتەر جابىلىپ, قاڭىراپ قالىپ جاتىر. سونىڭ ىشىندە كەڭشارلار, ۇجىمشارلار بوس قالۋدا. قالاعا كوشتىڭ قارقىنى ءالى باسەڭدەگەن ەمەس.
– قازىرگى باستى پروبلەمانىڭ ءبىرى – اۋىل شارۋاشىلىعى ءوندىرىسىنىڭ تيىمدىلىگىن ارتتىرۋ بولىپ وتىر. اۋىلدارداعى شاعىن جانە جەكە ءۇي شارۋاشىلىقتارىنا ناقتى كومەك كورسەتىلسە, اۋىلدا جۇمىس ورىندارى كوبەيىپ, تاۋار ءونىمى ەسەلەپ ارتىپ, باسەكەلەستىكتە ەڭبەكاقى كولەمى دە ءوسىپ, حالىقتىڭ اعىنى اۋىلدان قالاعا ەمەس, كەرىسىنشە بولار ەدى. قالادان اۋىلعا باراتىن جاستارعا شاعىن بيزنەس قۇرۋىنا مۇمكىندىك بەرىپ, وندىرگەن تاۋارىن تاراتۋعا مەملەكەت تاراپىنان جاردەم جاسالىپ, ءتۇرلى ماتەريالدىق قولداۋ بەرىلسە, اۋىل بيزنەسى دامىپ, ەلدەگى قالالاردىڭ ءبارىن ازىق-تۇلىكپەن جانە كيىم-كەشەكپەن تولىق قامتاماسىز ەتۋىنە جاعداي بار, – دەدى ت.راقىمبەكوۆ.
كەزدەسۋدە باق-تاردا اۋىل ماسەلەسىن كوتەرۋ جايى اڭگىمە بولدى. «بۇقارالىق اقپارات قۇرالدارى اۋىلدار ماسەلەلەرىن كوتەرۋدەي-اق كوتەرىپ جاتىر. ودان قانداي ناتيجە شىعىپ جاتىر؟ بۇل ءتيىستى جەرىنە جەتىپ جاتىر ما؟ ءتيىستى ورگاندار وعان قۇلاق اسىپ جاتىر ما؟ ماسەلە سوندا. وسى جاعى ويلاندىرادى» دەدى ز.الىپبەك.
سونداي-اق كەزدەسۋدە اۋىلداردى ينتەرنەتپەن قامتۋ, اۋداندىق گازەتتەردى قولداۋ, ولارعا كادر تارتۋ ماسەلەلەرى دە ءسوز بولدى.