اۋىلعا مامان بارا ما؟
اۋىل شارۋاشىلىعى سالاسىندا بىلىكتى ماماندار جەتىسپەيدى. ەندەشە كادرلاردى دايىنداۋ جۇيەسىنە قانداي وزگەرىس كەرەك؟ بۇل تۋرالى استانادا وتكەن «ەكونوميكانىڭ ناقتى سەكتورى ءۇشىن ماماندار دايىنداۋداعى ۋنيۆەرسيتەت پەن جۇمىس بەرۋشىلەردىڭ سەرىكتەستىگى» اتتى رەسپۋبليكالىق فورۋمدا تالقىلاندى.
س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە وتكەن جيىنعا قر پارلامەنتى دەپۋتاتتارى, 150-دەن استام وتاندىق جانە شەتەلدىك اگروبيزنەس وكىلدەرى مەن قوعامدىق ۇيىمدار قاتىستى. باسقارما توراعاسى اقىلبەك كۇرىشباەۆ ءوز سوزىندە الەمنىڭ الدىڭعى قاتارلى ۋنيۆەرسيتەتتەرىنىڭ تاجىريبەسى نەگىزىندە كادرلاردى دايارلاۋ جۇيەسىن جاڭعىرتۋ بويىنشا ءبىلىم ورداسىندا اتقارىلىپ جاتقان جۇمىستار تۋرالى باياندادى. ايتۋىنشا, وقۋ ورنى سەرىكتەستىڭ قولداۋىمەن, اتاپ ايتقاندا الەمدە اگرارلىق ءبىلىمنىڭ ورداسى سانالاتىن كاليفورنيا ۋنيۆەرسيتەتىنىڭ ۇلگىسىندە كادرلار دايارلاۋدى جۇزەگە اسىرۋدا.
بۇعان دەيىن ستۋدەنتتەر ءۇشىن وندىرىستىك ءىس-تاجىريبە نەبارى ءۇش اي بولسا, ۋنيۆەرسيتەت بۇل تالاپتى سەگىز ايعا دەيىن سوزىپ وتىر. وسىلايشا بولاشاق ماماننىڭ ەگىننىڭ سەبىلۋ كەزەڭىنەن باستاپ ونى باپتاۋ, ورۋ ناۋقاندارىنا دەيىن تولىق قاتىسۋىنا مۇمكىندىك بەرىپ وتىر.