تاۋەلسىزدىك سارايىندا جاس سۋرەتشى, «شابىت» حالىقارالىق فەستيۆالىنىڭ لاۋرەاتى, «دارىن» مەملەكەتتىك جاستار سىيلىعىنىڭ يەگەرى نۇربولات اسقاردىڭ «ءومىر» اتتى جەكە كورمەسى ءوتىپ جاتىر. 21 قازانعا دەيىن جالعاساتىن كورمەگە تاڭداۋلى كارتينالارى قويىلدى.
ەكسپوزيتسيا نەگىزىن تاقىرىپتىق كارتينالار مەن پەيزاج باعىتىندا سالىنعان سۋرەتتەر قۇرايدى. ولاردان وتباسىلىق ءومىر, سونداعى قىزىقتار سەكىلدى كۇندەلىكتى ومىردە كەزدەسەتىن كورىنىستەردى تاماشالاۋعا بولادى. ءبىر سوزبەن ايتقاندا, كورمە اتاۋىنا ساي كەلەدى.
مامانداردىڭ پىكىرىنشە, سۋرەتشىنىڭ تاڭداعان تاقىرىپقا ەرەكشە كوزقاراسى بار. كارتينالاردان تەرەڭ وي دا, سۋرەتشى شەبەرلىگى دە بايقالادى. باستىسى, نۇربولات اكتسەنتتەردى دۇرىس قويا بىلەدى. سۋرەتشى كىبىرتىكتەمەي, قىلقالامدى ەركىن ۇستايدى. كومپوزيتسيا جانە تۇسپەن ەكسپەريمەنتتەرگە باتىل بارادى. بوياۋلاردى دا ۇيلەستىرە بىلەدى. ول سۇلۋلىقتى الىستان ىزدەمەي, جاقىننان كورە الادى.
«شىعارماشىلىق ادامعا تالانت قانا ازدىق ەتەدى. ءبىر بيىكتەرگە جەتۋ ءۇشىن ەڭبەك تە كەرەك. نۇربولاتتا وسىنىڭ ەكەۋى دە بار. كارتينالارىنان وتانعا, تۋعان جەرگە, حالقىنا دەگەن ماحابباتى ەسىپ تۇرادى. مەن ونىڭ بولاشاعىنا سەنەم. وسى باعىتىنان تايماسا, جاس سۋرەتشىنى الدا ۇلكەن بيىكتەر كۇتىپ تۇر» دەيدى بالالار كوركەمسۋرەت مەكتەبىنىڭ ديرەكتورى گۇلزيا يسەنوۆا.
