بايقوڭىر اۋدانىنىڭ اكىمدىگى حالىقارالىق قارتتار كۇنىنە ارنالعان مەرەكەلىك شارالاردى باستاپ جىبەردى.
قارۋلى كۇشتەردىڭ ۇلتتىق اسكەري-پاتريوتتىق ورتالىعىندا وتكەن شاراعا اۋدان اۋماعىندا تۇراتىن 300 سوعىس جانە ەڭبەك ارداگەرى شاقىرىلدى. اۋداندىق اكىمدىكتىڭ قىزمەتكەرلەرى ءاربىر قوناقتى گۇل شوقتارىن ۇسىنىپ قارسى الدى. مەرەكەلىك شاراعا جينالعان قاۋىمدى العاشقى بولىپ كەڭەس وداعىنىڭ باتىرى, حالىق قاھارمانى توقتار اۋباكىروۆ قۇتتىقتادى. قازاقتىڭ تۇڭعىش عارىشكەرى مايدانگەرلەر مەن زەينەتكەرلەرگە زور دەنساۋلىق تىلەپ, ومىردە بەلسەندى بولا بەرۋگە شاقىردى.
ساحنا تورىنە استانا قالالىق ارداگەرلەر كەڭەسىنىڭ توراعاسى مەن بايقوڭىر اۋدانىنىڭ اكىمى ەرلان قاناليموۆ كوتەرىلىپ, ءبىر توپ ازاماتتارعا «قۇرمەت گراموتاسىن», «العىس حاتتار» جانە باعالى سىيلىقتار تابىس ەتتى. ولاردىڭ قاتارىندا «ايدار» باستاۋىش ۇيىمى توراعاسىنىڭ ورىنباسارى ەسليام ءابجانوۆ, «استاناتەلەكوم» باستاۋىش ۇيىمىنىڭ باسشىسى ليۋدميلا ليتۆينوۆا, «استانا سۋ ارناسى» باستاۋىش ۇيىمىنىڭ توراعاسى يبراگيم الىمباەۆ, «جانگەلدى» باستاۋىش ۇيىمىنىڭ توراعاسى قايىربەك شايمەردەنوۆ, «ۆەرحوۆينا» باستاۋىش ۇيىمىنىڭ جەتەكشىسى ۆيكتور شۆيدكو جانە ارداگەرلەر قوعامىنىڭ بەلسەندىسى نينا پريحودكو بولدى. قوعامدىق نەگىزدە جۇمىس جۇرگىزىپ وتىرعان وسى ازاماتتارعا دەمەۋشىلەر اتىنان تەلەۆيزورلار بەرىلدى.
مەرەكەلىك شارانىڭ شىرايىن, ارينە, انشىلەر مەن كۇيشىلەر كەلتىردى. تۇپتەپ ايتقاندا, بايقوڭىر اۋدانى اكىمدىگىنىڭ ۇيىمداستىرۋىمەن, استانا قالالىق ارداگەرلەر كەڭەسىنىڭ قولداۋىمەن وتكەن «قارتتارىم امان جۇرسە ەكەن…» اتتى مەرەكەلىك شارادان مايدانگەرلەر مەن ارداگەرلەر مەرەيى ءوسىپ قايتتى.
