كاسىپكەرلەر قۇقىعىن قورعاۋ جانە سىبايلاس جەمقورلىققا قارسى ءىس-قيمىل كەڭەسىنىڭ كەزەكتى وتىرىسىندا وتاندىق اۋەن اۆتورلارى مەن كاسىپكەرلەردىڭ قۇقىعىن قورعاۋ ماسەلەلەرى قارالدى.
ءتيىستى سىياقى تولەنبەيدى
جيىنعا كەڭەس مۇشەلەرى مەن زاڭگەرلەر, قازاقستاندىق اۆتورلار قاۋىمداستىعىنىڭ وكىلدەرى, سونىمەن قاتار, قازاق ەستراداسىنىڭ جۇلدىزدارى قىدىرالى بولمانوۆ پەن ەرلان كوكەەۆ قاتىستى. مامانداردىڭ مالىمەتىنشە, ەلىمىزدەگى مەيرامحانا, كاراوكە-كلۋب جانە ساۋدا-ويىن-ساۋىق ورتالىقتارى مەن الاڭداردا, جالپى كوپشىلىك ورىنداردا وتاندىق 3,5 مىڭ, ال شەتەلدىك 4 ميلليونعا جۋىق اۆتوردىڭ اۋەنى اۋەلەيدى. بىراق اندەرى پايدالانىلعانىمەن, قازاقستاندىق اۆتورلارعا ءتيىستى دەڭگەيدە سىياقى تولەنبەيتىن كورىنەدى. ماسەلەن, سىياقى تولەۋ ءتىپتى قاپەرىندە بولماعان قالاداعى «LA STRADA» كاراوكە-كلۋبىنىڭ قوجايىنى دانيار كەنكەنوۆكە 6 ملن تەڭگە كولەمىندە ايىپپۇل سالىنىپتى. الايدا بيزنەسىن باستاعانىنا كوپ بولا قويماعان جاس كاسىپكەر سىياقى تولەۋ جونىنەن مۇلدە بەيحابار بولعانىن تىلگە تيەك ەتىپ, قۇزىرلى ورگانداردان ايىپپۇل سالۋ جونىندە الدىن الا ەسكەرتۋ حاتتىڭ كەلمەگەنىن ايتادى. بۇدان بىلاي بارلىق تالاپتى ورىنداۋعا نيەت تانىتقان كلۋب قوجايىنى يىعىنا تۇسكەن اۋىر جۇكتى جەڭىلدەتۋ جونىندە كاسىپكەرلەر پالاتاسىنان كومەك سۇراۋدا. بۇل ماسەلە ساراپشىلار تاراپىنان قىزۋ تالقىعا ءتۇسىپ, كەڭەس مۇشەلەرى جاس كاسىپكەرگە قولداۋ كورسەتەتىندەرىن ءبىلدىردى. ءوز كەزەگىندە ءسوز العان ەرلان كوكەەۆ: «مەن دە كاسىپكەرمىن. جەكە مەيرامحانا بيزنەسىن دوڭگەلەتىپ وتىرمىن. وندا كوپتەگەن اندەردى ورىنداعانىم ءۇشىن شەتەلدىك جانە وتاندىق اۆتورلارعا زاڭعا سايكەس سىياقىسىن مىندەتتى تۇردە تولەيمىن. بىراق تۇسىنبەيتىنىم, ماعان دا نەگە سولاي تولەنبەيدى؟ كاراوكە-كلۋبتاردا, كوپشىلىك ورىنداردا كوپ جىلدان بەرى ءبىرشاما اندەرىم ورىندالىپ ءجۇر عوي» دەيدى.
بۇل تۇيتكىلدى تالقىلاعان قاتىسۋشىلار اۆتورلاردىڭ قۇقىعىن قورعايتىن كوميسسيا قۇرۋ كەرەك دەگەن ۇسىنىس ايتتى. ءوز كەزەگىندە كەڭەس مۇشەسى, ەكس-دەپۋتات زەينوللا الشىنباەۆ وسىدان 10 جىل بۇرىن قابىلدانعان «اۆتورلار قۇقىعىن قورعاۋ» تۋرالى زاڭىنىڭ قازىرگى ۋاقىتتا ورىندالۋ مەحانيزمى ءماز ەمەسىن ايتا كەلىپ, قۇزىرلى ورگاندار اتالمىش ماسەلەنى قاتاڭ باقىلاۋعا الىپ, ولقىلىقتىڭ ورنىن تولتىرۋ كەرەكتىگىن ءسوز ەتتى. وسى ورايدا ادىلەت مينيسترلىگىنىڭ وكىلى بۇل زاڭعا وزگەرتۋ مەن تولىقتىرۋ ەنگىزۋ قاراستىرىلىپ جاتقانىن جەتكىزدى.
كاسىپكەرگە كىم كەدەرگى؟
كەڭەس وتىرىسىندا سونىمەن قاتار ەلورداداعى جەرۇيىق ساياباعىنان ورىن تەپكەن «Balbala Land» جشس-ءتىڭ يەلىگىندەگى بالالارعا ارنالعان كەشەن جۇمىسىنىڭ بەلگىلەنگەن ۋاقىتتان بۇرىن توقتاتىلۋ ماسەلەسى دە تالقىلاندى. «Balbala Land» جشس قۇرىلتايشىسى, بەلگىلى ءانشى قىدىرالى بولمانوۆ ماسەلەنىڭ ءمان-جايىن بۇگە-شىگەسىنە دەيىن ايتىپ بەردى. ونىڭ ايتۋىنشا, جەرۇيىق ساياباعىنداعى بوس جاتقان 500 شارشى مەتر جەردى جالعا الۋ جونىندە وتكەن جىلدىڭ 1 ماۋسىمىنان باستاپ بيىلعى 30 قىركۇيەككە دەيىن «استانا قالاسى مەنشىگىندەگى كوممۋنالدىق قور» مكك-مەن كەلىسىمشارت جاساسقان. ناتيجەسىندە بىرنەشە اي كولەمىندە توپىراقتى جەرگە الدىمەن ينفراقۇرىلىمدىق جوندەۋ جۇرگىزىپ, ودان كەيىن بالالارعا ارنالعان كەشەن سالعان. جالپى, بۇل جۇمىسقا 100 ملن تەڭگەگە جۋىق قارجى جۇمسالعان ەكەن. الايدا اعىمداعى جىلدىڭ 10 ساۋىرىندە «استانا قالاسى مەنشىگىندەگى كوممۋنالدىق قور» مكك تاراپىنان كەلىسىمشارتتى بۇزۋ تۋرالى, جالعا بەرىلگەن جەردى 30 كۇن ىشىندە بوساتۋ كەرەكتىگى جايلى رەسمي حات كەلگەن. ونىمەن قوسا ەكى كۇننەن سوڭ «Balbala Land» جشس-ءتىڭ يەلىگىندەگى مۇلىكتەردىڭ بارلىعىن سول جەردەن كوشىرىپ تاستاعان. «بۇل جەرگە ءبىز تەك قارجىمىزدى عانا ەمەس, قانشاما التىن ۋاقىتىمىزدى سارپ ەتىپ, جانىمىزدى سالدىق. قازاقستانعا تۇڭعىش رەت ساپالى ەتنوباتۋت اكەلىپ, بۇلدىرشىندەرىمىزدىڭ ءورىسىن كەڭەيتۋ جولىندا جۇمىستار جۇرگىزدىك. جالعا بەرۋ اقىسى مەن سالىقتى دا كەشىكتىرمەي تولەپ تۇردىق. بىراق ءمورالدى جانە زاڭدى تۇرعىدا قۇقىعىمىز تاپتالىپ وتىر» دەدى ق.بولمانوۆ. الايدا «استانا قالاسى مەنشىگىندەگى كوممۋنالدىق قور» مكك ماماندارىنىڭ ءوز ءۋاجى بار. ساياباقتاعى بۇل جەردىڭ الماتى اۋدانى اكىمدىگىنىڭ قاراماعىنا قارايتىنىن ايتقان مەكەمە باسشىسى ەركىن ەردەنبەكوۆ ولاردىڭ مىندەتى تەك دەمالىس ورنىنا ادامداردى شاقىرۋ ەكەنىن, ال «Balbala Land» جشس زاتتارىنىڭ رۇقساتسىز كوشىرىلىپ تاستالۋىنا وزدەرىنىڭ قاتىسى جوق ەكەنىن ايتىپ, اعىنان جارىلدى. قوس تاراپتىڭ پىكىرىن تىڭداعان كەڭەس مۇشەلەرى بۇل داۋلى ماسەلەگە نۇكتە قويىپ, كاسىپكەردىڭ قۇقىعىن قورعاۋ ءۇشىن «الدىمەن قىلمىستىق ءىس قوزعاپ, كىنالىنى زاڭ جۇزىندە جازالاۋ كەرەك» دەگەن پىكىرلەرىن ءبىلدىردى.
