اۋدان اۋلالارىن ارالادى

ەلوردالىق ءماسليحات دەپۋتاتتارى بايقوڭىر اۋدانىندا اباتتاندىرىلعان اۋلالار مەن قوعامدىق كەڭىستىكتەردى ارالادى.

مەملەكەت باسشىسى قاسىم-­جومارت توقاەۆ استانا قالاسىن دامىتۋ ماسەلەلەرى جونىندە كەڭەس­تە ەلوردالىقتار سەرۋەندەيتىن جانە دەمالاتىن ورىنداردى كوبەيتۋدى تاپسىرعان-دى.

– رەسەيدىڭ قازان قالاسىنىڭ تاجىريبەسىن زەرتتەپ كورۋگە بولادى. بۇل قالانىڭ كوشەلەرى, ساياباقتارى جانە جاعالاۋ الاڭدارى وتە ادەمى جانە تارتىمدى. ءبىزدىڭ ماقسات – استانانى جىلدىڭ كەز كەلگەن مەزگىلىندە تۇرعىندار مەن قوناقتارعا بارىنشا قولايلى ەتۋ, قالانىڭ كەلبەتىن مەيلىنشە جاقسارتۋ, – دەگەن ەدى پرەزيدەنت.

بۇگىندە قالالىق كەڭىستىكتى جاڭعىرتۋ جانە اباتتاندىرۋ جۇمىستارى قارقىن الدى. حالىق قالاۋلىلارى وسى باعىتتاعى جۇمىستاردى كوزبەن كورىپ, ماسەلەلەردى تالقىلاۋ ءۇشىن جولعا شىقتى.

بايقوڭىر اۋدانى اكىمىنىڭ ورىنباسارى دوسحان تۇياقپاەۆ جول باستاپ, اتقارىلعان جۇمىستارمەن تانىستىردى. ولار الدىمەن اقبۇلاق وزەنىنىڭ بويىنداعى دەمالىس ورنىنا توقتادى. جاڭا كەلبەتكە يە بولعان سكۆەردە دەمالۋشى ادامداردىڭ قاراسى قالىڭ. اقىن جامبىل جاباەۆتىڭ ەسكەرتكىشىنەن باستاۋ العان كەڭىستىك «الاتاۋ» سپورت كەشەنىنە دەيىن سوزىلىپ جاتىر. بۇل جەر قالا تۇرعىندارى مەن قوناقتارىنا بارىنشا قولايلى ەتىپ جابدىقتالعان ەكەن.

– بيىل بايقوڭىر اۋدانىندا 25 اۋلا, 7 قوعامدىق كەڭىستىك اشىلادى. 11 اۋلانى اباتتاندىرۋ جۇمىسى اياقتالدى. قازىر 4 اۋلاداعى جۇمىس قارقىن الىپ, تامىز ايىنا پايدالانۋعا بەرىلەدى. ال 10 اۋلا اۋماعى 15 قىركۇيەككە دەيىن اياقتالاتىن بولادى. قوعامدىق كەڭىستىكتەردىڭ 6-ۋى اباتتاندىرىلدى. بۇدان بولەك, بىرقاتار اۋلادا اعىمداعى جوندەۋ-قالپىنا كەلتىرۋ جۇمىسى جۇرۋدە, – دەدى د.تۇياقپاەۆ.

«اقبۇلاق» وزەنىنىڭ جاعالاۋىن­داعى اباتتاندىرۋ جۇمىسى مۇنىمەن شەكتەلمەيدى. ابىلاي حان داڭعىلىنان شاكارىم قۇدايبەردىۇلى داڭعىلىنا دەيىنگى ارالىقتى دا قامتيدى. بۇل اۋماقتا ل.گۋميلەۆ اتىنداعى ەۋرازيالىق ۇلتتىق ۋنيۆەرسيتەتتىڭ وقۋ كورپۋستارى مەن ستۋدەنتتەر ءۇيى ورنالاسقاندىقتان ادامدار ءجيى سەرۋەندەپ جۇرەدى. سالاۋاتتى ءومىر سالتىن ۇستانعان ازاماتتار جۇگىرەدى, ءارى سپورت الاڭدارىندا جاتتىعۋ جاسايدى. سەنبى, جەكسەنبى كۇندەرى ستۋدەنت جاستار جاعالاۋداعى ساحنادا مادەني-كوپشىلىك ءىس-شارالاردى وتكىزىپ, ءان ورىنداپ جاتادى. سوندىقتان جاعالاۋ كورىكتى ءارى تازا بولعانى دۇرىس.

ءارى قاراي, جاياۋ ارالاۋ – «جۋرناليستەر» اللەياسى.دەپۋتاتتار كەنەسارى كوشەسى №73, №77 مەكەنجايىنداعى جاياۋ جۇرگىنشىلەر كەڭىستىگى مەن بىرقاتار اۋلا الاڭدارىن كوردى.

شىنىندا, باس قالادا ساياباقتار, سكۆەرلەر, جاياۋ ادامعا ارنالعان كوشەلەر, ويىن الاڭدارى جانە تاعى باسقا قوعامدىق كەڭىستىكتەر وركەن جايىپ, تۇرعىندارعا قولايلى جاعداي جاسالۋدا. دەپۋتاتتارمەن ارالاۋ بارىسىندا وسىعان كوز جەتكىزە تۇستىك.