ايالداما دا استانا اجارى
ەلوردامىز كۇننەن-كۇنگە كوركەيىپ, قۇلپىرىپ كەلەدى. استانا قاي جاعىنان العاندا دا كۇللى ەلىمىزگە ۇلگى بولۋى ءتيىس. ەلوردامىزعا قىدىرىپ كەلگەن ادام اۋەلگىدە باسىن كوتەرىپ ەڭسەلى عيماراتتارعا قاراپ تامسانادى, كەيىن باسىن تومەن ءتۇسىرىپ الدىنا قاراعاندا, ايالدامالاردىڭ سۇرەڭسىزدىگىنە تاڭعالادى. استاناعا جاراسپاي, اسەم قالانىڭ اجارىن كەتىرىپ تۇرعان ايالدامالار كىمدى دە بولسا قىنجىلتادى.
ءيا, اۆتوبۋستار ايالدامالارىنىڭ اباتتاندىرىلۋى ۇساق ماسەلە سياقتى كورىنگەنىمەن, كۇندەلىكتى تىرشىلىكتە اۆتوبۋس كولىگىنە مىنەتىن اركىمنىڭ-اق الدىنان شىعاتىن ەلەۋلى ءجايت ەكەنى ءسوزسىز. وسى تۋرالى ويىمدى ايتپاقپىن.
جاقىندا ايالدامالارعا اۆتوبۋس باعىتتارىنىڭ سىزباسى ءىلىندى. بۇل كەرەك-اق ەدى. سول ايالداماعا توقتايتىن قاي اۆتوبۋستىڭ قايدا باراتىنى, قاي جەردەن باسقاسىنا اۋىسىپ مىنۋگە بولاتىنى انىق كورىنىپ تۇر. بىراق جاقسى ويلاستىرىلعان وسىناۋ وڭدى ءىس جەرىنە جەتكىزىلە ورىندالماعان ەكەن-اۋ دەگەن وي كەلەدى. وسى ىلىنگەن قالىڭ قاعاز سىزبالار شۇقىپ ۇستاعان ادام قولىنىڭ, نە جەل, جاۋىن-شاشىننىڭ اسەرىنەن تەز توزىپ, جىرتىلىپ قالۋى مۇمكىن. سول ءۇشىن سىزبالاردى اينەكتەلگەن قاسەكىلەرگە سالىپ ءىلىپ قويسا, ومىرشەڭ بولار ەدى.
ايالدامالارعا قاتىستى تاعى ايتارىمىز, استانانىڭ شاقىرايعان كۇنىنەن, ءجيى بولىپ تۇراتىن جەلىنەن, جاۋىن-شاشىنىنان قورعايتىن ىقتاسىن باستىرمالاردىڭ سۇرەڭسىز كۇيى. جەل گۋلەگەن, جاۋىن-شاشىن سورعالاعان شۇرق-تەسىك باستىرمالار تولىپ جاتىر. باستىرماسى شاعىن, ورىندىقتارى شولاق, سىنعاندارى دا از ەمەس. ادامدار سيماي, اۋا رايىنىڭ قولايسىز كۇندەرىندە ءابىرجىپ تۇرعاندارى. ىقتىرما ورناتىلماعان ايالدامالار دا كەزدەسەدى. مىسالى, ابىلايحان داڭعىلىندا «جىبەك جولى» ساۋدا ءۇيىنىڭ, عابيت مۇسىرەپوۆ كوشەسىندە «ايتولقىن» ساۋدا ءۇيىنىڭ الدىنداعى ايالدامالاردا توقتايتىن اۆتوبۋس تا, مىنەتىن جولاۋشىلار دا كوپ, بىراق ول جەرلەردىڭ ايالداما ەكەندىگىن اۆتوبۋستاردىڭ توقتاپ وتەتىندىگىنەن عانا بىلەسىز, ەشتەڭە جاسالماعان.
وسى ماسەلەگە جاۋاپتى مەكەمەلەر وسى كەمشىلىكتەردى ەرتەرەك تۇزەسە, نۇر ۇستىنە نۇر بولار ەدى.
نۇراي قالىشبەكوۆا