ارقادا قىس 4-5 اي بويى كوشپەي جاتىپ الادى. ۇسكىرىك ايازدىڭ كەيدە اپتالاپ بەت قاراتپايتىن كەزدەرى بولادى. تابيعاتتىڭ بۇل دولى مىنەزى دالا تۇرماق, قالا حالقىنا دا وڭاي تيمەيدى. سوندىقتان قىسقى ماۋسىمعا تىڭعىلىقتى قام جاساماساق, وپىق جەپ قالۋىمىز كادىك.
استانا بيلىگى قىسقى ماۋسىمعا جاز ورتاسىنان دايىندىق جۇمىستارىن باستاپ كەتەدى. جىلۋ-ەلەكتر ورتالىقتارىنىڭ قازاندىقتارىن جاماپ-جاسقاپ, قۇبىر جەلىلەرىن بۇتىندەپ, قاجەتتى وتىندى جەتكىزىپ الادى. سونداي-اق تۇرعىن ۇيلەرمەن بىرگە, كوشەدەگى اۆتوبۋس ايالدامالارىن دا جىلىلاپ قويادى.
ايازدى كۇندەرى بالالار, ناۋقاس ادامدار, جالپى اۆتوبۋس كۇتكەن جولاۋشىلار توڭىپ قالماس ءۇشىن, اسىرەسە, مەكتەپتەرگە, بالاباقشالارعا, مەديتسينالىق مەكەمەلەرگە تاياۋ ورنالاسقان جەرلەردە جىلى ايالدامالاردىڭ تۇرۋى ماڭىزدى. رەسمي دەرەككە سۇيەنسەك, استانادا 1100 ايالداما بولسا, ونىڭ 730-ىندا پاۆيلون بار. ونىڭ 100-ءى جىلى ايالداما. جىل سوڭىنا دەيىن تاعى وسىنداي 30 ايالداما ورناتۋ جوسپارلانعان. بۇل جونىندە «استانا LRT» جشس توراعاسىنىڭ ورىنباسارى باۋىرجان سەيىتوۆ ءمالىم ەتكەن بولاتىن.
كەشە عانا ەلوردا اكىمى التاي كولگىنوۆ قالا كوشەلەرىن ارالاپ, بىرقاتار ايالدامالاردىڭ جاي-كۇيىمەن ءجىتى تانىسىپ قايتقان بولاتىن. بۇل جونىندە اكىمبىلاي دەپ جازدى:
– بۇگىن قالاداعى جىلى ايالدامالاردىڭ بىرقاتارىنا باردىم. جىلۋى جوق ايالدامالار انىقتالدى. سونىڭ ءبىرى – رەسپۋبليكا داڭعىلىمەن قيىلىساتىن سەيفۋللين كوشەسىندەگى «جاستار سارايى» ايالداماسى. قالا بويىنشا وسىنداي ايالدامالاردى تەكسەرىپ شىعۋ اۋدان اكىمدەرىنە تاپسىرىلدى. جىلۋى ىستەمەي تۇرعان ايالدامالاردى بايقاپ جاتساڭىزدار, ناقتى ورنالاسقان جەرىن ايتۋلارىڭىزدى سۇرايمىن. قالا تۇرعىندارىنا جايلى بولۋى ءۇشىن جىلى ايالدامالاردى كوبىرەك سالۋدى جوسپارلادىق, – دەپتى اكىم Facebook-تەگى پاراقشاسىندا.
قالا باسشىسىنىڭ جازباسى الەۋمەتتىك جەلىنى پايدالانۋشىلاردىڭ كوپشىلىگىن بەيجاي قالدىرماپتى. ا.كولگىنوۆتىڭ جازباسىنىڭ استىنا 379 ادام پىكىر ءبىلدىرىپ, 34-ءى ونى ءوز پاراقشالارىندا بولىسكەن.
بەلگىلى جۋرناليست بەيبىت وسپاننىڭ «ساتپاەۆ كوشەسىندە, «ەۋرازيا» اۋماعىندا جىلى ايالداما جوق. ادامدار تاڭەرتەڭ بۇرسەڭدەپ تۇرادى» دەگەن پىكىرىنە «Astana» الەۋمەتتىك-كاسىپكەرلىك كورپوراتسياسى» اق جاۋاپ جولداپتى. مۇندا «اكك ينۆەستورلارمەن بىرلەسە وتىرىپ, 2019 جىلدىڭ جەلتوقسانى مەن 2020 جىلدىڭ قاڭتار ايلارىنا ق.ساتپاەۆ كوشەسى, 13 مەكەنجايىنا جىلى ايالداما پاۆيلونىن ورناتۋدى جوسپارلانعانى, بۇگىنگى تاڭدا ايالداما پاۆيلونىنىڭ كونسترۋكتسيالىق قۇرىلىمىن جيناۋ جۇمىستارى جۇرگىزىلۋدە» ەكەندىگى ايتىلعان.
قالا تۇرعىنى اينا
كارىموۆا «ا.بايتۇرسىنوۆ كوشەسىندەگى №83 مەكتەبىنىڭ ماڭىنا جىلى ايالداما كەرەك. 32-ءشى اۆتوبۋس مۇلدەم ۋاقىتىندا كەلمەيدى!!! ادامدار ءۇسىپ-توڭىپ تۇرادى. جانە ەڭ وزەكتى ماسەلە – بۇل جەردەگى باعدارشام, جول وتپەسى دۇرىس قويىلماعان. №83-ءشى ايالدامادان تۇسكەننەن كەيىن قاراما-قارسى 83-ءشى مەكتەپ تۇر. ال باعدارشام ەكى جاقتا الىستا جاتىر. ەسكەرىڭىز: وتە الىستا!!! باعدارشام الىستا بولعاندىقتان, بالالار تۇگىلى ۇلكەندەر بۇل جەردى اينالىپ وتپەي, جولدى كەسىپ وتەدى. بىرىنشىدەن, جول ەرەجەسى بۇزىلىپ وتىر. ەكىنشىدەن, بۇل جەردە ماشينالار وتە قاتتى جىلدامدىقپەن جۇرەدى (سەبەبى قالانىڭ ءبىر شەتى). مەن بالالارىمىزدىڭ قاۋىپسىزدىگى ءۇشىن قاتتى الاڭدايمىن!!! ءوتىنىش, وسى جازعانىمىزدى قاپەرىڭىزگە الىپ, ءبىر جولاق ورناتۋعا مۇمكىندىك جاساڭىزشى! مەن بۇل تۋرالى بىرنەشە رەت 109-عا زۆونداپ, جازىپ (بەينە, فوتو) سالىپ ءوتىنىشىمدى بىلدىرگەنمىن. وكىنىشكە قاراي, جاۋاپسىز قالۋدا. وسى ءوتىنىشىمدى جاۋاپسىز قالدىرماۋىڭىزدى ءوتىنىپ سۇرايمىن!» دەپتى.
ريتا تولىسباي «رەسپۋبليكا داڭعىلىنداعى سامال ايالداماسى ەشقانداي جىلۋسىز, ىشىنە كىرىپ, كەرىسىنشە, توڭىپ قالدىم. قالانىڭ قاق ورتاسىندا تۇرعان ايالداما جىلۋعا قوسىلماعان. نەگە ەشكىم تەكسەرمەيدى ەكەن وسى جاعدايدى» دەپ جازادى.
جاسۇلان وماروۆ
دوسمۇحامەدوۆ كوشەسىندەگى «سوتسيۋم» تۇرعىن ءۇي كەشەنىنە جىلى ايالداما تۇرماق, اۆتوبۋستىڭ مۇلدەم جۇرمەيتىنىن ايتادى. بۇل ماسەلە قاشان شەشىلەدى دەپ سۇراق قويىپتى.
اينۇر قوزىباەۆا ورىنبور كوشەسىندەگى, مينيسترلىكتەر ۇيىندەگى, جاستار تەاترىنداعى (بۇرىنعى ك.بايسەيىتوۆا), قارجى ورتالىعىنداعى جابىق ايالدامالار جىلۋعا قوسىلماعان دەپ تىزبەلەپ شىققان.
Ainur Eshanova قابانباي باتىر داڭعىلى بويىندا بىردە-ءبىر جىلى ايالداما جوقتىعىن ايتىپ شاعىمدانعان. Aizhan Ait-Myrza ەسىل اۋدانىنىڭ كوپتەگەن جەرلەرىندە جىلى ايالدامالار تاپشىلىعىن جەتكىزەدى. «اسىرەسە, جاعالاۋ ىقشام اۋدانىندا
ايتماتوۆ كوشەسىنەن باستاپ ورتالىققا دەيىن كوپ جەرلەردە جوق. جاستار كوپ تۇرادى, كىشكەنتاي بالالار كوپ. قازىرگى قىستا اۆتوبۋس كولىكتەرىن دە كوبەيتسە ەكەن دەگەن تىلەك» دەگەن ءوتىنىشىن جولداعان.
گاۋحارتاس شوليموۆا №73 مەكتەپ-ليتسەيىنىڭ جانىنداعى اقىرتاس ايالداماسىندا ايازدا بالاباقشادان الىپ شىققان كىشكەنتاي بالاسى ەكەۋى №4 اۆتوبۋستى 50 مينۋت كۇتىپ, اقىرى تاكسيگە مىندىك دەپ شاعىمدانىپ جازىپتى.
ايتا كەتەيىك, ەلوردا اكىمى التاي كولگىنوۆ Facebook پاراقشاسىندا جىلى ايالدامالار ماسەلەسىن قوزعاعانىمەن, تۇرعىندار قوسالقى باسقا دا كوپتەگەن پروبلەمالاردى كوتەردى. ونىڭ ىشىندە اۆتوبۋس قاتىناسى, كوشە تازالىعى, جولدىڭ تايعاناقتىعى مەن مۇزقاتقاق, ءتىپتى تاكسي قىزمەتى باعاسىنىڭ قىمباتشىلىعىن دا ايتىپتى. ءبىر جاقسىسى, حالىقتىڭ ارىزى ەسكەرۋسىز قالماي, وعان نۇر-سۇلتان قالاسى اكىمدىگىنىڭ iKomek ورتالىعىنىڭ, «استانا LRT» جشس كەڭەسشىلەرى, بايقوڭىر اۋدانىنىڭ ءباسپاسوز قىزمەتى, قالانىڭ ساۋلەت, قالا قۇرىلىسى جانە جەر قاتىناستارى باسقارماسى, ت.ب. رەسمي ورگاندار لەزدە جاۋاپ بەرگەن. ياعني, اكىمنىڭ Facebook پاراقشاسىنداعى جازباسى ويلاماعان جەردەن تۇرعىنداردىڭ ارىز-شاعىمدارىن قاراعان اشىق ەسىك شاراسىنا اينالىپ كەتتى دەسە دە بولادى.
