وسىدان تۋرا 20 جىل بۇرىن ەلىمىزدىڭ استاناسى اقمولاعا كوشىرىلەتىنىن ەستىگەندە, وبلىس تۇرعىندارى ەرەكشە قۋاندى. مەن سول تۇستا اقمولا وبلىسىنداعى اۋداندىق ءماسليحاتتىڭ حاتشىسى بولىپ قىزمەت اتقاردىم. ەلوردانى كوشىرۋگە قاتىستى تاريحي وقيعالارعا كۋاگەرى بولدىم.
اسىرەسە, 1997 جىلدىڭ جەلتوقسان ايى ءدال كەشەگىدەي كوز الدىمدا. سول كەزدە قازاقستان رەسپۋبليكاسى ۇكىمەتىنىڭ اقمولاعا كوشىرىلۋ سالتاناتىنا قاتىستىق.
ال 1998 جىلدىڭ 6 مامىرىندا ەلباسىنىڭ جارلىعىمەن اقمولا قالاسىنا استانا ەسىمى بەرىلدى. ءبىز قالامىزدىڭ مارتەبەسىنىڭ وسۋىمەن بىرگە ومىرىمىزدە دە جاڭا بەلەستەرگە جول اشىلاتىنىن ىشتەي سەزدىك. سوعان قۋاندىق. جۇرەگىمىزدى ماقتانىش سەزىمى كەرنەدى. بىراق ەندىگى جەردە ءوزىمىزدىڭ جاي عانا قالا تۇرعىنى ەمەس, ەلوردالىق ەكەنىمىزدى ۇمىتپاي, جۇمىسىمىزعا جۇكتەلگەن زور جاۋاپكەرشىلىكتى سەزىنىپ, استانالىق مارتەبەگە ساي بولۋ كەرەكتىگىن ءبىر ساتكە دە ەستەن شىعارمادىق.
ول كەزدە قالا تىم كىشكەنتاي بولاتىن. پرەزيدەنت ءوزىنىڭ اپپاراتىمەن وبلىستىق اكىمدىك عيماراتىنا, ال پارلامەنت بۇرىنعى جوبالاۋ ينستيتۋتىنا كەلىپ ورنالاستى. ال مينيسترلىكتەر بولسا, وبلىستىق مەكەمەلەر وتىرعان تار بولمەلەرگە جايعاستى. مىنە, استانا تاريحى وسىلاي باستالعان بولاتىن.
ارادا 20 جىل ۋاقىت ءوتتى. سول كەزدە دۇنيەگە كەلگەن ءسابي بۇگىندە 20 جاسقا تولىپ, وقۋ وقىپ, ءبىر ماماندىقتىڭ تىزگىنىن ۇستايتىنداي ازامات بولىپ وتىر. قالا كەلەشەگىنە ادال ەڭبەگىمەن ءوز ۇلەسىن قوسىپ, ەڭبەك ەتەتىن جاسقا جەتتى. ارينە, استانانى بۇگىن جاستار دا, ولاردىڭ اكە-شەشەلەرى دە جاقسى كورەدى, «بالام – استانالىق» دەپ ماقتانىشپەن ايتادى.
استانا 20 جىلدا ادام تانىماستاي وزگەردى. ەسىلدىڭ سول جاعالاۋىندا كورسەڭ كوز تويمايتىن اسەم شاھار بوي كوتەردى. كوز الدىمىزدا كوركەيىپ كەلە جاتقان تاماشا تۇرعىن ءۇي كەشەندەرى, ەڭسەلى اكىمشىلىك عيماراتتار, گۇلزارلار مەن فونتاندار, اسەم مونۋمەنتتەر مەن ساۋلەت ەسكەرتكىشتەرىن كورگەن ادام تامسانباي, تاڭداي قاقپاي قالمايدى.
بۇگىندە تورتكۇل دۇنيەگە تانىلعان ەۋرازيا كەڭىستىگىندەگى عاجايىپ استانا – ەلباسى نۇرسۇلتان نازارباەۆتىڭ ءتول تۋىندىسى. اجارى اق ساۋلەمەن جارقىراعان, نازارى كۇن نۇرىنداي سارقىلماعان, التىن كۇمبەزدى استانامىزدىڭ ءار داڭعىلى گۇل اشىپ, باياندى بولاشاققا باستاپ كەلەدى. ايبارىمەن الاشتىڭ ارقاسىن قوزدىرىپ تۇرعان استانامىز جارقىراي بەرسىن دەمەكپىن!
زۋرا جاقيانوۆا
استانا قالاسى ادىلەت
دەپارتامەنتىنىڭ مامانى
