استانا راديوسى مەن «Elorda Aqparat» اقپارات مەديا-رەسۋرسىنىڭ بىرلەسكەن جوباسى – «ەلوردا تىنىسى» باعدارلاماسى اياسىندا ستۋدياعا, بيىلعى اقپان ايىندا باس قالادا ءتورتىنشى اۋدان بولىپ شاڭىراق كوتەرگەن بايقوڭىر اۋدانىنىڭ اكىمى ەرلان قاناليموۆ كەلىپ, جاڭا اۋداننىڭ تىنىس-تىرشىلىگى تۋرالى تىڭدارماندارعا ايتىپ بەردى. حاباردى قايسار جۇمابايۇلى جۇرگىزدى.
جىل ساناپ ەلوردا حالقىنىڭ سانى مەن قالا اۋماعى ۇلكەيىپ كەلەدى. بۇگىندە باس قالا جۇرتىنىڭ سانى 1 ميلليوننان استى. سوندىقتان تىعىز ورنالاسقان تۇرعىنداردىڭ ماسەلەسىن شەشۋ ءۇشىن جاڭا مەكتەپ, بالاباقشا, ەمحانا, كولىك جۇيەسى مەن ينجەنەرلىك ينفراقۇرىلىمدار سالۋ ماقساتىندا ءتورتىنشى اۋدان قۇرىلدى. جاڭا اۋداننىڭ شىعىس بولىگى الماتى اۋدانىمەن, باتىس جانە وڭتۇستىك بولىگى سارىارقا اۋدانىمەن, ال ەسىل وزەنى ارناسىمەن ەسىل اۋدانى شەكارالاسادى. جالپى العاندا, قالا اۋماعى 79 مىڭ 733 گەكتاردى قۇراسا, سونىڭ ىشىندە جاڭا اۋدان 18, 1 مىڭ گەكتاردى الادى. ال ادام سانى 211 مىڭعا جەتەدى.
«ءبىزدىڭ قالا 123 سەكتورعا ءبولىنگەن. ءاربىر سەكتوردا 10 مىڭ ادام بار. سونىڭ ىشىنەن 34 الەۋمەتتىك ستاندارت انىقتالعان. بۇل – ءاربىر تۇرعىن باسقا كۆارتالعا بارماي پايدالانۋعا بولاتىن قاجەتتى نارسەلەر. ال ءبىزدىڭ اۋداندا 17 سەكتور بار. ونىڭ 5-ءۋى – جوبالىق. قالعان 12 سەكتوردىڭ دەڭگەيى ءبىز ايتقان تالاپتىڭ 80 پايىزىن قۇرايدى. باسقالارى 20-60 پايىزدىق الەۋمەتتىك ستاندارتتارمەن قامتاماسىز ەتىلگەن» دەدى اۋدان اكىمى.
ەرلان ەرمەكۇلىنىڭ ايتۋىنشا, اۋدانعا, اسىرەسە, الەۋمەتتىك نىساندار جەتىسپەيدى ەكەن. ماسەلەن, مەكتەپ, بالاباقشا, ەمحانالار سانى وتە از. ءتىپتى, ادامداردىڭ قاراپايىم سپورت تۇرىمەن اينالىساتىن ورىندار دا سيرەك. اۋدان اۋماعىندا كوپقاباتتى اپاتتى ۇيلەر مەن جەكە سەكتور كوپ كەزدەسەدى.
«اۋداندا 17 مەكتەپ جۇمىس ىستەيدى. ولاردىڭ دەنى كەڭەس ۇكىمەتى كەزىندە سالىنعان. ونىڭ 7-ەۋىندە وقۋشىلار ءۇش اۋىسىممەن وقيدى. ءتورت مەكتەپ عيماراتىن كەڭەيتۋ ءۇشىن قوسىمشا قۇرىلىس جۇمىستارى جۇرگىزىلۋ قاجەت. قىسقاسى, ءبىلىم وردالارىنىڭ تەڭ جارىمى كۇردەلى جوندەۋدى تالاپ ەتەدى. قازىر اۋدان كولەمىندە 1200 ورىندىق ەكى مەكتەپتىڭ قۇرىلىسى ءجۇرىپ جاتىر. اماندىق بولسا, الداعى جىلى پايدالانۋعا بەرىلەدى» دەدى ە.قاناليموۆ.
قالالىق «IKomek» ساراپتاما جۇرگىزۋ ورتالىعىنىڭ مالىمەتىنە سۇيەنسەك, جاڭا اۋداننىڭ تۇرعىندارىنان جەكە ۇيلەردى سۋ باسۋ تۋرالى – 198, كوشەلەردى جارىقتاندىرۋ 106 جانە قوقىسقا قاتىستى 90 شاعىم تۇسكەن.
«ءبىز وسىنداي كۇردەلى ماسەلەلەر قوردالانىپ قالعان 19 ايماقتى انىقتادىق. ولاردىڭ كوبى جەكە تۇرعىن ءۇي اۋماعىنان شىعىپ وتىر. ۇيلەردى سۋ باسۋ قاۋپى – كارىز جەلىسىنىڭ جوقتىعىنان. مۇنداي جاعداي لەسوزاۆودتاعى جەكە سەكتورلاردا كوبىرەك ۇشىراستى. جەرى ساز باتپاق. سۋ كوپكە دەيىن كەپپەيدى. ونى تەك سورىپ الۋ قاجەت. وسى ماسەلەلەردى شەشۋ ءۇشىن كوممۋنالدىق شارۋاشىلىق باسقارماسىمەن بىرلەسىپ, 5-6 ساتىلى جەلىلىك كارىز جەلىسىنىڭ قۇرىلىسىن اياقتاۋ ماسەلەسىن قولعا الدىق. بۇل لەسوزاۆود پەن كيرپيچنىي تۇرعىن ءۇي كەشەنىنىڭ ءبىر بولىگىن قامتيدى» دەدى اكىم.
اۋدانداعى تاعى ءبىر وزەكتى دۇنيەنىڭ ءبىرى – كوشەلەردى جارىقتاندىرۋ ماسەلەسى. اۋدان اكىمدىگىنىڭ زەرتتەۋى بويىنشا, جەكە تۇرعىن ۇيلەر ورنالاسقان 87 كوشەگە جارىق تارتىلۋ قاجەت ەكەن. بۇعان شامامەن 200 مىڭ شام جانە 1600 باعانا كەرەك. بۇل ماسەلەلەر قىركۇيەككە دەيىن اياقتالادى دەپ سەندىردى اكىم. سونداي-اق, ەرلان ەرمەكۇلى الاش تاسجولى بويىنداعى ورتالىق بازار اۋماعىندا ينجەنەرلىك جەلى جوقتىعىن ايتتى. بيىل ەلوردا باسشىسىنىڭ تاپسىرماسىمەن اتالعان تاسجول بويىنا ينجەنەرلىك جەلىلەردىڭ كەشەنى قۇرىلىسىن باستاۋ جوسپارلانىپ وتىرعانىن جەتكىزدى.
جەكە تۇرعىن ۇيلەرى كوپ اۋماقتا قوقىس ماسەلەسى دە قوردالانىپ قالعان. ەندى ول ءبىر رەتكە كەلتىرىلمەك. بۇعان دەيىن پايدالانىلعان ەسكى قوقىس كونتەينەرلەرى ەۋروپالىق ستاندارتتاعى كونتەينەرلەرمەن اۋىستىرىلماق. سونىمەن قاتار, بيىل اۋدان كولەمىندەگى 17 كوشەگە جوندەۋ جۇمىستارى جۇرگىزىلمەك. كيرپيچنىي پەن ءوندىرىس تۇرعىن الابىندا 15 جاڭا كوشە پايدالانۋعا بەرىلەدى. 41 كوشەگە قيىرشىق تاس توسەۋ جۇمىستارى جوبالانعان.
قىسقاسى, ەرلان قاناليموۆ تىڭدارمانداردى جاڭا اۋداننىڭ قۇرىلىمى مەن اتقارىپ جاتقان جۇمىستارىمەن تانىستىرىپ, الداعى جوسپارىمەن ءبولىستى.
