بيىل وتان قورعاۋشىلار كۇنى مەن ۇلى جەڭىستىڭ 73 جىلدىعىنا ارنالىپ, «وتار» اسكەري پوليگونىندا وتكەن جاۋىنگەرلىك شەرۋگە قاتىسقان استانا قالاسى اۋماقتىق قورعانىس بريگاداسىنىڭ 25 جاۋىنگەرى قالا اكىمى اسەت يسەكەشەۆتىڭ العىس حاتىمەن ماراپاتتالدى.
قالا باسشىسىنىڭ اتىنان جاۋىنگەرلەردى استانانىڭ قورعانىس ىستەرى دەپارتامەنتىنىڭ باسشىسى ارداق قۇقاتوۆ قۇتتىقتادى.
«مەملەكەتتىك ماڭىزى بار شاراعا سىزدەردىڭ قوسقان ۇلەستەرىڭىز زور. قازاقستان پرەزيدەنتى – قر قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ قارۋلى كۇشتەر بولىمدەرى مەن اۋماقتىق قورعانىس بريگادالارىنىڭ قيمىلىنا ءوزىنىڭ جوعارى باعاسىن بەردى. مەملەكەت باسشىسى اۋماقتىق قورعانىس بريگادالارىنا اسكەري تۋدى تاپسىردى. سىزدەر بۇل تاريحي وقيعانىڭ كۋاگەرى اتاندىڭىزدار. بۇل – مەملەكەت باسشىلىعى مەن حالىق تاراپىنان سىزدەرگە ارتىلعان زور سەنىم. ءبىز بۇل جوعارى سەنىمدى اقتاۋىمىز كەرەك. قالا اكىمى اتىنان سىزدەرگە ەلىمىزدىڭ قورعانىس قابىلەتىن جوعارىلاتۋ ىسىندە تابىس پەن ساتتىلىك تىلەيمىن» دەدى ول.
«قارۋلى كۇشتەرى ارداگەرلەرى» رەسپۋبليكالىق قوعامدىق بىرلەستىگى ورتالىق كەڭەسى توراعاسىنىڭ ورىنباسارى, گەنەرال-مايور مارات نۇعىمانوۆتىڭ ايتۋىنشا, استانا قالاسى اۋماقتىق قورعانىس بريگاداسىنا وتان الدىندا اسكەري بورىشىن وتەگەن, بۇگىنگى تاڭدا زاپاستاعى جاۋىنگەرلەر قابىلداندى.
