وتكەن اپتادا استانا قالاسى جەرگىلىكتى پوليتسيا قىزمەتىنىڭ يۋۆەنالدى پوليتسيا قىزمەتكەرلەرى كامەلەتكە جاسى تولماعاندار اراسىندا قۇقىق بۇزۋشىلىقتىڭ الدىن الۋ, ولاردىڭ اتا-اناسىنىڭ باقىلاۋىنان تىس قالىپ, قاڭعىباستىققا سالىنباۋىن قاداعالاۋ ماقساتىندا ءىرى ساۋدا ورتالىقتارى مەن كومپيۋتەرلىك كلۋبتاردا, ينتەرنەت-كافەلەر مەن بارلاردا رەيد جۇرگىزدى.
ءىلياس ەسەنبەرلين كوشەسىنىڭ بويىندا ورنالاسقان «Bootsamr» ينتەرنەت كلۋبىنا ءتارتىپ ساقشىلارى باس سۇققاندا ساعات تۇنگى ساعات 23:50 بولعان ەدى. بار ىنتاسى كومپيۋتەرگە اۋعان ون شاقتى ءجاسوسپىرىم يۋۆەنالدى پوليتسيا كاپيتاندارى اگەل بەسكەنتىروۆا مەن ەلميرا ايتبەكتى, پوليتسيا اعا لەيتەنانتى رايگۇل قۇرماشەۆا مەن پوليتسيا لەيتەنانتى تازاگۇل قايىرجانوۆانى ەلەگەن دە جوق. ال كەلەسى قاتاردا جايباراقات وتىرعان 13-14 جاسار شاماسىنداعى ەكى قىز بالا مەن ءۇش ءجاسوسپىرىم بۇل ءىس-ارەكەتتەرىنىڭ زاڭعا قايشى ەكەنىن تۇسىنەتىندىكتەرىن مويىنداي وتىرىپ, ءبىر دوسىنىڭ تۋعان كۇنىن اتاپ وتۋگە ءبىر-ەكى ساعاتقا عانا ويناۋعا كەلگەندىكتەرىن ايتىپ اقتالدى. بۇلاردىڭ ۇشەۋى مەكتەپ وقۋشىسى بولسا, ەكەۋى كوللەدج ستۋدەنتى ەكەن.
سونداي-اق, كەنەسارى كوشەسىنىڭ بويىنداعى كومپيۋتەرلىك كلۋبتاردىڭ بىرىنەن 2001 جىلى تۋعان ن. ەسىمدى جەتكىنشەكتىڭ تۇنگى ۋاقىتتا ساعات 22-دەن تاڭعى 06-عا دەيىن زاڭدى وكىلىنسىز ويىن-ساۋىق مەكەمەسىندە بولۋ فاكتىسى انىقتالدى. وسىعان بايلانىستى كومپيۋتەرلىك كلۋبتىڭ يەسى – ۆ. ەسىمدى ازامات قر اقبتك-ءنىڭ 132-بابىنىڭ 1-بولىگى بويىنشا اكىمشىلىك جاۋاپكەرشىلىككە تارتىلدى.
«مۇنداي جاعدايدا كامەلەتتىك جاسقا تولماعان جاسوسپىرىمدەردىڭ اكە-شەشەلەرىن شاقىرتىپ, حاتتاما تولتىرامىز. وسىنداي العاشقى ەسكەرتۋدەن كەيىن ولار مۇنداي كەلەڭسىزدىكتىڭ ەندى قايتالانبايتىنى تۋرالى بىزگە قولحات بەرەدى. ءسويتىپ, تۇندە باقىلاۋسىز جۇرگەن بالالارىن زاڭدى اتا-اناسىنىڭ قولىنا تاپسىرامىز. الايدا انت-سۋ ءىشىپ, پەرزەنتتەرىن قاتاڭ جونگە سالاتىن بولىپ كەتكەن كەيبىر اتا-انالار ءبىزدىڭ الدىمىزعا ەكىنشى قايتارا كەلىپ وتىراتىن كەزدەرى دە بولادى. مۇنداي جاعدايدا اكىمشىلىك ءىس جينالىپ, يۋۆەنالدىق سوتقا جىبەرىلەدى» دەيدى استانا قالاسى پد جپق يۋۆەنالدى پوليتسيا باستىعى, پوليتسيا پودپولكوۆنيگى اسەت سىزدىقوۆ.
جىل باسىنان بەرى زاڭدى بەلىنەن باسىپ, بالالارىنىڭ تۇنگى ۋاقىتتا ويىن-ساۋىق مەكەمەلەرىندە نەمەسە تۇرعىن جايدان تىس ورىنداردا زاڭدى وكىلدەرىنسىز جۇرۋىنە جول بەرگەن 300-دەن اسا اتا-انا مەن زاڭدى وكىل اكىمشىلىك جاۋاپكەرشىلىككە تارتىلىپتى. الايدا مۇنىمەن بالالاردىڭ كوشە كەزىپ, قاڭعىباستىققا سالىنۋى تىيىلماي تۇر. ءتارتىپ ساقشىلارى باس سۇققان كەز كەلگەن ينتەرنەت-كلۋبتاردان بەيساۋات ۋاقىتتا زاڭدى وكىلدەرىنسىز جۇرگەن ءجاسوسپىرىمدى كورۋگە بولادى. ال مۇندايدا كلۋب يەلەرى «جاڭا عانا كەلىپ ەدى, ەندى ءوزىمىز دە شىعارىپ جىبەرگەلى جاتىر ەدىك» دەپ كوپە-كورىنەۋ وتىرىك ايتا باستايدى.
رەيد جۇرگىزىلگەن ەكى كۇننىڭ ىشىندە يۋۆەنالدى پوليتسيا قىزمەتكەرلەرى سارىارقا اۋدانى بويىنشا 13 كومپيۋتەر كلۋبى مەن 9 مەيرامحانانى, 7 ءدامحانا مەن 5 ويىن-ساۋىق ورتالىعىن تەكسەرىپ, ەرەسەكتەرسىز ءوز بەتىمەن جۇرگەن 14-تەن 16 جاسقا دەيىنگى 43 بالانىڭ اتا-اناسى مەن 21 جاسقا دەيىنگىلەرگە الكوگول ونىمدەرىن ساتقان 4 ادامدى اكىمشىلىك جاۋاپكەرشىلىككە تارتتى. سونىمەن قاتار تۇنگى ۋاقىتتا تىنىشتىقتى بۇزعانى, تۇرعىلىقتى جەرى بويىنشا تىركەۋسىز تۇرعانى ءۇشىن كامەلەتكە تولماعان 2 جاسوسپىرىمگە ەسكەرتۋ جاسالسا, 10 بالا استانا قالاسى اكىمدىگىنىڭ كامەلەتكە تولماعانداردى بەيىمدەۋ ورتالىعىنا ورنالاستىرىلىپ, 50-گە تارتا جەتكىنشەك پوليتسيا بولىمدەرىنە جەتكىزىلدى.
