اللو, «استانا اقشامى»!
ينديرا ايتمۇحامەتوۆا, ەلوردا تۇرعىنى:
– «نان بولسا, ءان بولادى» دەيدى. جالپى, ناننىڭ حالىقتىڭ جاپپاي تۇتىناتىن تاعامى ەكەنى بەلگىلى. بۇل تۇرعىدا قالاداعى ناۋبايحانالاردىڭ جۇمىسى, سانيتارلىق تازالىعى قانشالىقتى قاداعالانادى؟
وقىرمان ساۋالىنا قوعامدىق دەنساۋلىق ساقتاۋ دەپارتامەنتى باسشىسىنىڭ ورىنباسارى ايگۇل شاعالتاەۆانىڭ جاۋابىن ۇسىنامىز.
– ناۋبايحانالار قوعامدىق دەنساۋلىق ساقتاۋ دەپارتامەنتى تاراپىنان قاتاڭ قاداعالانادى. كاسىپورىندارعا جىلىنا ءبىر رەت ادەتتەگى تەكسەرىس جۇرگىزىلسە, تۇتىنۋشىلاردىڭ ارىز-شاعىمى بويىنشا سانيتار-ەپيدەميولوگ ماماندار بەلگىلەنگەن نىساندى كەز كەلگەن ۋاقىتتا تەكسەرە الادى. تەكسەرىس كەزىندە سانيتارلىق تالاپتاردى بۇزۋ فاكتىلەرى انىقتالعان جاعدايدا «اكىمشىلىك قۇقىق بۇزۋشىلىق تۋرالى» كودەكسكە سايكەس كاسىپورىن قوجايىندارىنا ايىپپۇل سالۋ, باسقا دا اكىمشىلىك شارالار قولدانىلادى. مىسالى, وتكەن جىلى بولكە قۇرامىنان بوگدە زاتتىڭ تابىلۋى, كوگەرۋى, ساقتاۋ مەرزىمىنىڭ ءوتۋى سياقتى ماسەلەلەر بويىنشا نان ساپاسىنا قاتىستى ءتورت شاعىم ءتۇستى. ناتيجەسىندە ونىڭ ەكەۋى راستالىپ, ولارعا, تيىسىنشە, اكىمشىلىك شارالار قولدانىلدى.