باس قالاداعى قۋىرشاق تەاترىنىڭ كورەرمەندەرى «جاڭعىرىق تۋرالى ەرتەگى» قويىلىمىن تاماشالادى. جاپون ەرتەگىسى نەگىزىندە قۇرىلعان سپەكتاكلدە ۋريكو ەسىمدى كىشكەنتاي قىز اتا-اناسىمەن بىرگە زۇلىمدىق يەسى امادزياكاعا قارسى تۇرىپ, جاماندىق اتاۋلىسىن جەڭىپ شىعادى.
«دەمالىس كۇندەرى بالالارىمدى قۋىرشاق تەاترىنا الىپ كەلەمىن. سەبەبى بالالاردىڭ دامۋى ءۇشىن وسىنداي رۋحاني ورتا كەرەك. ش.ايمانوۆ «تەاتر – ادامداردى تۋىستىراتىن شىعارماشىلىق وتباسى, ساحنا ونەرى – ءتىل جەتپەس قۇدىرەتتى ءومىر شىندىعىن ءبىلۋ, ياعني ادامنىڭ ساحنانى سۇيمەۋى مۇمكىن ەمەس» دەگەن بولاتىن. بالالار ءتىلىن دامىتۋدا, ولاردىڭ ومىرگە دەگەن كوركەمدىك كوزقاراستارىن قالىپتاستىرۋدا تەاترلاندىرىلعان قويىلىمدار ەرەكشە ءرول اتقارادى. سوندىقتان ءار جەكسەنبىدە وتباسىمىزبەن تەاترعا كەلەمىز» دەدى قالا تۇرعىنى گۇلزات وماربەكوۆا.
تەاتر ءار بالاعا قۋانىش, قىزىق, ۇمىتىلماس اسەر سىيلايدى. بالالاردىڭ ەستەتيكالىق تالعامىن, قيالىن دامىتادى.
«مەن ءۇشىن كىشكەنتاي كورەرمەندەردىڭ ىقىلاسىنا بولەنۋ, ولارعا قۋانىش سىيلاۋ قىزمەتتەن بۇرىن باقىت سىيلايدى. مۇنداي قويىلىمداردى تاماشالاۋ بالالاردىڭ وي-ءورىسىن كەڭەيتەدى, اڭگىمەگە ارالاسۋعا, اشىلۋعا, ويىن ەركىن جەتكىزۋگە بەيىمدەيدى. ءبىزدىڭ كورەرمەندەرىمىز وتە شىنايى, سوندىقتان بالالاردىڭ كوڭىلىنەن شىعۋ ءۇشىن بارىمىزدى سالامىن» دەيدى تەاتر ءارتىسى ايجان سادىقوۆا.
