ەلوردالىق ساۋلەت, قالا قۇرىلىسى جانە جەر قاتىناستارى باسقارماسىندا «قازاقستان» سپورت سارايىنىڭ ەسكيزدەرى كورسەتىلدى, وندا نىساندى جاڭعىرتۋ بويىنشا اۋقىمدى جۇمىستار جۇرگىزىلىپ جاتىر.
جاڭعىرتۋ جوباسى اياسىندا ءموبيلدى جابىننىڭ كومەگىمەن ساحناعا ترانسفورماتسيالاۋ مۇمكىندىگى بار حوككەي الاڭى قاراستىرىلعان. الاڭنىڭ اينالاسىندا 6000 كورەرمەنگە ارنالعان تريبۋنالار جوبالانعان. جۇرگىزىلىپ جاتقان جوندەۋ جۇمىستارىنىڭ ەسەبىنەن حالىقتىڭ ءجۇرىپ-تۇرۋى شەكتەۋلى توپتارىنا ارنالعان مىنبەلەردەگى ورىندار سانى ۇلعايۋدا.
حوككەي الاڭىنان باسقا, ءجۇزۋ بويىنشا وقۋ-جاتتىعۋ ساباقتارىن, ونىڭ ىشىندە بالالارعا ارنالعان, اكۆااەروبيكا, سۋ دوبىن وتكىزۋ ءۇشىن رەسپۋبليكالىق جانە حالىقارالىق دەڭگەيدەگى جارىستاردى, ساۋىقتىرۋ ءجۇزۋىن وتكىزۋ ءۇشىن باسسەيندەر جاڭعىرتىلادى. بۇل رەتتە تريبۋنا 1260 ادامعا ەسەپتەلگەن.
مۇنداعى 50ح25 م باسسەيننىڭ وتكىزۋ قابىلەتى – 120 ادام; كولەمى 12,5 ح 6 م باسسەيندە 10 ادامعا ەسەپتەلگەن.
سونىمەن قاتار, ءبىرىنشى جانە ەكىنشى قاباتتارداعى جاتتىعۋ زالدارىندا, تورەشىلەرگە ارنالعان جانە تەحنيكالىق بولمەلەردە تۇبەگەيلى وزگەرىستەر قاراستىرىلعان. ەكىنشى قاباتتا كورەرمەندەرگە ارنالعان گاردەروبتار مەن تاماقتانۋ ورىندارى بار زالدار جوسپارلانعان.
«ەلوردادا سپورتتىڭ دامۋىنا ۇلكەن كوڭىل بولىنۋدە. نۇر-سۇلتان قالاسىنىڭ ءاربىر اۋدانىندا دەنە شىنىقتىرۋ-ساۋىقتىرۋ كەشەندەرى سالىنۋدا, ولاردىڭ 4-ەۋى – بىزدە. سونداي-اق ق.مۇڭايتپاسوۆ اتىنداعى ورتالىق ستاديون ورنىندا جاڭا سپورت كەشەنىنىڭ قۇرىلىسى جوسپارلانۋدا. جاقىندا زاماناۋي تەننيس ورتالىعى دا سالىنادى» دەدى نۇر-سۇلتان قالاسىنىڭ ساۋلەت, قالا قۇرىلىسى جانە جەر قاتىناستارى باسقارماسىنىڭ باسشىسى نۇرلان ۇرانحاەۆ.
قۇرىلىس جۇمىستارىنىڭ باستالۋى 2022 جىلدىڭ باسىنا, ال اياقتالۋى 2024 جىلعا جوسپارلانعان.
