ينتەرۆيۋەرلەر, ەرىكتىلەر ەلوردالىق ساۋدا ويىن-ساۋىق ورتالىقتارى مەن بازارلاردا ۇلتتىق حالىق ساناعى تۋرالى ءتۇسىندىرۋ جۇمىستارىن جۇرگىزدى. ولار «حان شاتىر» سوو جانىنداعى الاڭدا جارمەڭكەگە كەلۋشىلەرمەن, سونىمەن قاتار «Big شانحاي», «ارتەم», «تۇلپار», «ەۆرازيا» سىندى ساۋدا-ساتتىق ورىندارىنىڭ كەلۋشىلەرىنە دە ساناقتان ونلاين جانە وفلاين ءوتۋدىڭ جاي-جاپسارى ءتۇسىندىرىلدى.
ۇلتتىق ستاتيستيكا بيۋروسىنىڭ نۇر-سۇلتان قالالىق دەپارتامەنتىنىڭ قىزمەتكەرلەرى, ينتەرۆيۋەرلەر, ەرىكتىلەر بۋكلەتتەر تاراتىپ, سۇراقتارعا جاۋاپ بەردى. تۇرعىندارعا حالىق ساناعىنان رەسمي سايت ارقىلى ءوتۋدىڭ جولدارىن كورسەتتى.
«حالىق ساناعى قاجەتتى جۇمىس ورىندارىن قۇرۋ, ەڭبەك رەسۋرستارىنا تالداۋ جاساۋ, بالاباقشالاردا, الەۋمەتتىك مەكەمەلەردە ورىندار قۇرۋ جانە مەملەكەتتىك باعدارلامالاردى ازىرلەۋ ءۇشىن ەلىمىزدىڭ دەموگرافيالىق كورىنىسىن كورۋگە مۇمكىندىك بەرەدى. بۇگىنگى تاڭدا ەلوردانىڭ 600 مىڭنان استام تۇرعىنى حالىق ساناعىنان ءوتتى» دەدى قالالىق ستاتيستيكا دەپارتامەنتىنىڭ باس مامانى ايبەك قاليەۆ.
بۇعان دەيىن ەلوردالىقتى قازاقستان حالقى اسسامبلەياسى مەن ۇكىمەتتىك ەمەس ۇيىمداردىڭ وكىلدەرى قالا تۇرعىندارىن ساناققا بەلسەنە اتسالىسۋعا شاقىرعان ەدى. 30 قازانعا دەيىن ساناقتان ونلاين وتپەگەندەردىڭ ۇيلەرىن 1,5 مىڭعا جۋىق ينتەرۆيۋەر-ساناۋشى ارالاپ شىعادى. حالىق ساناعىن ونلاين وتكىزۋ مۇمكىندىگى توقتاتىلعاننان كەيىن ونى قايتا ىسكە قوسۋ بويىنشا وتىنىشتەردىڭ كوپتەپ ءتۇستى. ناتيجەسىندە sanaq.gov.kz سايتىنداعى ونلاين-ساۋالناما فۋنكتسياسى قايتا قولجەتىمدى بولدى.
