باياعىدا ءبىر بالاسى ەتەگىنەن تارتىپ, ءبىرى اياعىنا ورالىپ, ابدەن مازاسىن قاشىرعان جەڭگەمە جانىم اشىپ: «ءبارىن توبەدەن ءبىر-ءبىر قويىپ, نەگە وتىرعىزىپ قويمايسىز؟» دەگەنىم بار. بالالىقپەن ايتقان سوزىمە ءبىر جىميعان جەڭگەم: «ەرتەڭ بالالى بولعاندا سەنى دە كورەرمىن» دەگەنى ەسىمدە. راسىمەن, كەيىن ءوزىمىز وتباسىلى بولعاندا, ىشتەن شىققان بالاڭنىڭ ىستىق, ءار جاساعان بۇزىقتىعىنىڭ ءوزى ءتاتتى بولاتىنىن سەزىنگەن ەدىك. ءتىپتى, وزگەنىڭ كىشكەنتايىن كورسەك, وزىمىزدىكىدەي ەركەلەتەتىن بولدىق.
ءيا, بار باقىتىمىز دا, قىزىعىمىز دا, كۇيبەڭ تىرشىلىكتىڭ كولەڭكەلى ساتتەرىن ۇمىتتىراتىن دا – بالالارىمىز. قازاق بايلىعىن قوراسىنداعى مالىمەن ەمەس, باۋىرىنداعى بالاسىمەن ولشەگەنى بەكەر ەمەس. بالا كوبەيسە, بۇل ءبىر وتباسىنىڭ قۇت-بەرەكەسى عانا ەمەس, كۇللى ەلدىڭ بايلىعى, ۇلت دەموگرافياسىنا دەم بەرەر جەمىسى.
بالانىڭ بوتەنى جوق. جەر بەتىندەگى بارلىق جەتكىنشەك باقىتتى بولۋعا لايىق. ال باقىتتىڭ كىلتى – الدىمەن اتا-انانىڭ قولىندا. ءار اكە-شەشە باۋىر ەتى بالاسىنا مەيىرىمىن توگىپ, ءبىلىم بەرىپ, جۇرەگىنە يماندىلىق ءنارىن قۇيىپ, سانالى ازاماتتار ەتىپ تاربيەلەۋگە مىندەتتى.
1 ماۋسىم – حالىقارالىق بالالاردى قورعاۋ كۇنى. وسى كۇنى عانا ەمەس, ءبىز بالاپاندارىمىزعا ءومىر بويى قورعان بولۋعا ءتيىسپىز. سەبەبى, ءار بالانىڭ ساناسى – جازىلماعان اپپاق پاراق سەكىلدى. ولار قاتىگەز قوعامنىڭ قۋلىق-سۇمدىعىنان بەيحابار. جۇرتتىڭ ءبارىن دە جاقسى ادامدار دەپ قابىلدايتىن پەرىشتە كوڭىل بالالارىمىزدىڭ جۇرەگىنە تيتتەي دە جارىقشاق تۇسىرۋگە جول بەرمەۋىمىز كەرەك.
ەڭ باستىسى, بالالاردىڭ ءبارى امان بولسىن! قازاقتىڭ ءار شاڭىراعىنا قىلىقتارى بالداي ءتاتتى سابيلەردى ءناسىپ ەتىن! بالالارعا قۋانىشتىڭ تورەسىن سىيلايتىن مەرەكە قۇتتى بولسىن!
