ەلىمىزدە بالالارعا ارنالعان جالعىز ارنا «Balapan» تەلەارناسى جاڭا ماۋسىمدا كىشكەنتاي كورەرمەندەرگە ارناپ 9 جوبا ۇسىنباق. «قازمەديا ورتالىعىندا» وتكەن تانىستىرۋ راسىمىنە قر اقپارات جانە كوممۋنيكاتسيالار ءمينيسترى داۋرەن اباەۆ باستاعان مەملەكەت جانە قوعام قايراتكەرلەرى, زيالى قاۋىم وكىلدەرى مەن جۋرناليستەر بالالارمەن بىرگە قاتىستى.
سالتاناتتى شارانىڭ باستى ەرەكشەلىگى – جاڭا جوبالاردى «168 ساعات» اقپارات حابارىنىڭ اياسىندا جاس جۇرگىزۋشىلەر وزدەرى تانىستىردى. كوكتەمگى ماۋسىمدا تەلەارنا كونتەنتى عىلىمي-تانىمدىق, اقپاراتتىق, وتباسىلىق باعدارلامالارمەن جانە تىكەلەي ەفيردەگى توك-شوۋ سەكىلدى ىشكى ونىمدەرمەن جاڭارعان. اتاپ ايتقاندا, «Balapan» تاريحىندا تۇڭعىش رەت اتا-انالارعا ارنالعان تىكەلەي ەفيردەگى «Bala time» باعدارلاماسىنىڭ تۇساۋى كەسىلدى. جينالعان كوپشىلىك كۋا بولعان حاباردىڭ العاشقى تۇسىرىلىمىنە قوعام قايراتكەرى ورازكۇل اسانعازى قوناق رەتىندە قاتىسىپ, بالاعا قاتىستى ماڭىزدى ماسەلەلەردى تالقىلادى. ەرەكشە اتاپ وتەرلىگى, بۇل ماۋسىمدا «Balapan» ارناسى عىلىم سالاسىنا دەن قويىپ وتىر. ماسەلەن, IT تەحنولوگيالاردىڭ قىر-سىرى مەن عىلىمي تاجىريبەلەر «جاس عالىم» اتتى جاڭا تانىمدىق باعدارلامادا كورىنىس تابادى. ال اكەسى مەن ۇلىنىڭ اراسىنداعى قىزىقتى ويىنعا قۇرىلعان «بالا بوپ», تانىمال بلوگەر انالار مەن بالالارى قاتىساتىن «ۇيدەمىز – ۇيرەنەمىز» جوبالارى كورەرمەندەرگە ۋاقىتتى ءتيىمدى ءارى پايدالى وتكىزۋدىڭ ۇلگىسىن كورسەتەدى. سونىمەن قاتار, ونەر-ءبىلىم, سپورت سالالارىنداعى ۇزدىك بالالاردىڭ جەڭىسكە جەتۋ جولىن باقىلايتىن «كۇندەلىك» باعدارلاماسى كورەرمەنگە جول تارتادى.
«مەيماندارعا تانىستىرىلعان كەزەكتى ءبىر جوبا «قالامگەر كىتاپحاناسى» دەپ اتالادى. بۇل حابار تانىمال اقىن-جازۋشىلاردىڭ كىتاپحانالارى مەن ۇزدىك تۋىندىلارىنىڭ جازىلۋ تاريحىن تانىستىرادى. جاڭا ماۋسىمداعى ەرەكشە باعدارلامالاردىڭ ءبىرى – «مۇمكىندىك». بۇل جوبادا بالالار ءبىر كۇنىن ءتۇرلى كاسىپ يەلەرىمەن, ولاردىڭ جۇمىس بارىسىمەن تانىسۋعا ارنايدى.
تاعى ءبىر ايتا كەتەرلىگى, كوكتەمگى ماۋسىمدا ارنانىڭ كىشكەنتاي جيھانكەز كورەرمەندەرى «ساياحاتشى balapan» جوباسىنا وزدەرىنىڭ شەت ەلگە ساياحاتى جايلى شاعىن بەينەۇزىكتەر ءازىرلەپ, جولداي الادى. وسىلايشا, بالالار دا ارنانىڭ كونتەنتىن جاساۋعا تىكەلەي اتسالىسادى» دەيدى «بالاپان» ارناسىنىڭ باسشىسى ماقپال جۇماباي.
گۇلميرا ايماعانبەت
