قوعامنىڭ تسيفرلانۋىمەن بىرگە جاڭا مەدياعا سۇرانىس ارتىپ, اقپارات تاراتۋدا مۋلتيمەديالىق ەلەمەنتتەر پايدا بولۋدا. وسىنداي وتپەلى كەزەڭدە باق-تىڭ نەگىزگى قۇندىلىقتارىن سارالاپ, مازمۇنى مەن ميسسياسىن ايقىنداۋ ماڭىزدى بولىپ تۇر. بارىنەن بۇرىن ايماقتىق جانە ۇلتتىق بۇقارالىق اقپارات قۇرالدارىنىڭ بۇگىنى مەن كەلەشەگىن باعامداپ, شىعارماشىلىق ۇجىمنىڭ دامۋىنا قاجەتتى باعىت-باعدار بەرۋ كەرەك. مىنە, وسىنىڭ ءبارى Astana Media Week 2022 مەديا اپتالىعىندا تارازىلاندى.
«جاڭا ءداۋىر – جاڭا مەديا» پلەنارلىق سەسسياسىنا قازاقستاننىڭ قوس ۆەدومستۆو باسشىسى – اقپارات جانە قوعامدىق دامۋ ءمينيسترى دارحان قىدىرالى مەن عىلىم جانە جوعارى ءبىلىم ءمينيسترى ساياسات نۇربەك جانە قىرعىز رەسپۋبليكاسىنىڭ مادەنيەت, اقپارات, سپورت جانە جاستار ساياساتى ءمينيسترى التىنبەك ماقسۇتوۆ قاتىستى. سونداي-اق شىعىس ەۋروپاداعى TikTok Global Business Solutions ديرەكتورى جانە TikTok Kazakhstan كومپانياسىنىڭ بولاشاق باسشىسى اناستاسيا پانينا بوي كورسەتىپ, شارانىڭ ماڭىزىن ارتتىرا ءتۇستى.
مەديا اپتالىقتىڭ ماڭىزى نەدە؟
ساراپشىلار مەن ماماندار اقپاراتتىق تەحنولوگيانىڭ كوشباسشىسى سانالاتىن اقش-تان ءبىز جارتى عاسىرعا قالىپ قويعانىمىزدى العا تارتادى. ءبىز بلوك-سفەرا مەن ءداستۇرلى مەديانى نەمەسە جۋرناليستەردى, بلوگەرلەردى سالىستىرىپ جۇرگەنىمىزدە, ەۋروپا مەن اقش اقپارات تاراتۋدىڭ زاماناۋي جولىن قاراستىرۋدا.
قازىر سمارتفون مەن پلانشەتى بار كەز كەلگەن ادامنىڭ اقپارات تاراتۋدا مۇمكىندىگى مول. الەۋمەتتىك جەلىلەردە جەلدەي ەسكەن اقپاراتتىڭ ىشىندە جاعا ۇستاتار فەيك تە كوپ. جالعان اقپاراتپەن كۇرەسۋدىڭ ءبىر ءتاسىلى – ادامداردىڭ اقپاراتتى تاني بىلۋگە قاسيەتىن شىڭداۋ. ياعني جالعان جانە شىن اقپاراتتىڭ اراجىگىن اجىراتا بىلۋگە ۇيرەتۋ, مەديا ساۋاتتى بولۋى ماڭىزدى.
سپيكەرلەر اراسىندا جاڭا مەديانىڭ پروبلەماسى مەن پەرسپەكتيۆاسىنا توقتالىپ, جاھاندانۋ جاعدايىندا جاڭالىق تاراتۋدىڭ ءتيىمدى جولى ساندىق تەحنولوگيادا ەكەنىن دالەلدەپ باقتى. كينووندىرىستى يدەولوگيانىڭ قۇرالى ەتۋدى جاقتاعاندار دا بولدى.
اپتالىق اياسىندا «كريزيس كوممۋنيكاتسيالار جانە سەنىمدى نىعايتۋ», «قازاقستانداعى جارناما مەديا-نارىعى: قازىرگى جاعدايى, پەرسپەكتيۆالار جانە دامۋ درايۆەرلەرى», «سەريال يندۋسترياسىنىڭ جاڭا كەزەڭى», «پودكاستتار نارىقتى قالاي جاۋلاپ الىپ جاتىر؟», «تابىس فورمۋلالارى, جۋرناليستەردىڭ كاسىبي قۇزىرەتىنىڭ وزگەرۋى», «ءباسپاسوز باسىلىمدارىنىڭ ترانسفورماتسياسى», «قازىرگى راديوحابار تاراتۋدىڭ ماسەلەلەرى», «YouTube مۇمكىندىكتەرى مەن پەرسپەكتيۆالارى» جانە ت. ب. تاقىرىپتا وتكەن پانەلدىك سەسسيادا جۋرناليستيكانىڭ نەگىزگى ماسەلەرى جان-جاقتى تالقىلانىپ, زاماناۋي ترەندتەردى, تەحنولوگيانى مەڭگەرۋدىڭ ماڭىزىنا توقتالدى.
باسەكەگە قابىلەتتى, كرەاتيۆتى مامانداردى دايىنداۋ ماسەلەسى نازاردان تىس قالماي, شەتەل تاجىريبەسىندە كەزدەسەتىن جاڭاشىل قادامدار – لونگريد, داتا-جۋرناليستيكا ءبىزدىڭ ەلدە ءالى كەڭ ءورىس الماعانى ايتىلدى.
وتاندىق جوعارى مەكتەپتەردە لونگريدت دايىنداۋ تەحنولوگياسى ۇيرەتىلە مە, فەيك اقپاراتتىڭ راس-وتىرىگىن اجىراتۋ جولدارى وقىتىلا ما دەگەن ساۋالعا جاۋاپ الدىق.
ساپالى كادرلار دايىنداۋعا, جاۋاپتى مينيستر ساياسات نۇربەكتىڭ سوزىنشە, ەلدەگى 24 جوو «جۋرناليستيكا جانە اقپارات» باعىتىندا 4588 ءبىلىم الۋشى بار (باكالاۆريات – 4276, ماگيستراتۋرا – 266, دوكتورانتۋرا – 46). «مەدياكوممۋنيكاتسيا», «Big Data جۋرناليستيكا», «سپورت جۋرناليستيكاسى», «عىلىمي جۋرناليستيكا», «تسيفرلى مەديا مەنەدجمەنتى», «بيزنەس جۋرناليستيكا SMM, PR» جانە ت. ب. 110 ءبىلىم بەرۋ باعدارلاماسى بەكىتىلگەن. قىسقاسى, مەديا اپتالىقتا سان الۋان ماسەلەلەر قامتىلىپ, ولاردىڭ شەشىلۋ جولدارى سارالاندى.
باس رەداكتورلار نە ايتتى؟
اپتالىق اياسىندا «باس رەداكتورلار كلۋبى» رەسپۋبليكالىق قوعامدىق بىرلەستىگىنىڭ مۇشەلەرى باس قوسىپ, ءداستۇرلى جانە جاڭا مەديانىڭ سەرىكتەستىگى مەن باسەكەلەستىگى, ايماقتىق باق: بۇگىنى مەن بولاشاعى, جۋرناليستەر اراسىنداعى مەدياساۋاتتىلىق ماسەلەلەرىن تالقىلادى.
فورۋمنىڭ اشىلۋىندا باس رەداكتورلار كلۋبىنىڭ ۆيتسە-پرەزيدەنتى مۇراتبەك توقتاعازين اتالمىش قوعامدىق بىرلەستىكتىڭ قۇرىلعانىنا 15 جىل تولعانىن اتاپ ءوتتى.
– 2007 جىلعى قازان ايىنان بەرى جۇمىس ىستەپ كەلە جاتقان قوعامدىق بىرلەستىكتە 300-دەن استام مۇشە بار. ولاردىڭ اراسىندا اقپارات قۇرالدارىنىڭ باس رەداكتورلارى مەن جەتەكشىلەرى بەلسەندى قوعامدىق جۇمىسقا ارالاسىپ كەلەدى. باس رەداكتورلار كلۋبىنىڭ نەگىزگى ماقساتى – مەملەكەتتە شىعارماشىلىق اتموسفەراسىن نىعايتۋ, بۇقارالىق اقپارات قۇرالدارى اراسىندا ءتيىمدى باسەكەلەستىكتى ارتتىرۋ, – دەدى بىرلەستىكتىڭ ۆيتسە-پرەزيدەنتى.
«استانا اقشامى» گازەتىنىڭ باس رەداكتورى ەركىن قىدىر مەديا سالانىڭ, سونىڭ ىشىندە ءباسپاسوز سالاسىنىڭ اۆتورلىق قالاماقىسىن قايتارۋ جانە جۋرناليست ستاتۋسى سەكىلدى وزەكتى ماسەلەلەرگە توقتالدى.
وڭتۇستىك جانە شىعىس قازاقستان, الماتى مەن استانا قالاسىنداعى مەديا سفەرانىڭ باسشىلارى وڭىرلىك جوعارى وقۋ ورىندارىنداعى جۋرناليستيكا كافەدرالارى جابىلماۋ كەرەگىن اتاپ ءوتتى.
كادر تاپشىلىعىنا قاتىستى ءوز پىكىرىن «ەگەمەن قازاقستان» اق باسقارما توراعاسى ديحان قامزابەكۇلى ءبىلدىردى.
باس رەداكتورلار فورۋمى بارىسىندا ايتىلعان بارلىق وزەكتى ماسەلەلەر مەن ولاردى شەشۋ ءۇشىن باعىتتالعان ۇسىنىستار پىسىقتالىپ, حاتتاما تۇرىندە اقپارات جانە قوعامدىق دامۋ مينيسترلىگىنە جولداندى.
مەديا اپتالىقتىڭ ءۇشىنشى كۇنى «Urker-2022» ۇلتتىق بايگەسىن تاپسىرۋ سالتاناتىمەن جالعاستى.
