باقىتجان مالىباەۆ, استانا قالاسى ءىىد جەرگىلىكتى پوليتسيا قىزمەتىنىڭ باسشىسى: تۇرعىندارمەن تىكەلەي بايلانىسقان ءتيىمدى

استانا قالاسى ءىىد جەرگىلىكتى پوليتسيا قىزمەتىنىڭ باسشىسى, پوليتسيا پولكوۆنيگى باقىتجان مالىباەۆ ەلوردا تۇرعىندارىنىڭ ساۋالدارىنا ينتەرنەت-كونفەرەنتسيا ارقىلى جاۋاپ بەردى. ەكى ساعات ىشىندە قالالىق دەپارتامەنتتىڭ سايتىنا جانە تەلەفون ارقىلى ەلۋگە جۋىق ساۋال كەلىپ تۇسكەن. تۇرعىنداردىڭ كوبى قالانىڭ قاۋىپسىزدىك ماسەلەسىنە الاڭدايدى. كەيبىرى ۋچاسكەلىك ينسپەكتورلاردىڭ جۇمىسىن سىنعا الدى. ول ءوز كەزەگىندە قىزمەتتىك تەكسەرىس جۇرگىزۋگە ۋادە بەردى.

«تۇرعىنداردىڭ بەلسەندىلىگىن ەسكەرە وتىرىپ, الداعى ۋاقىتتا پايدالى كونفەرەنتسيانى ءجيى وتكىزۋ كەرەك. ءاربىر باسشىعا حالىقپەن تىكەلەي بايلانىسقان ءتيىمدى. ماسەلەنى ءبىرىنشى بولىپ انىقتاعان سوڭ, جۇمىستى ۇيىمداستىرۋ جەڭىل بولادى» دەدى كونفەرەنتسيا قورىتىندىسىندا ءسوز العان باقىتجان مالىباەۆ. نازارلارىڭىزعا كونفەرەنتسيادا كوتەرىلگەن كەي­بىر ساۋالداردىڭ جاۋابىن ۇسىنامىز.

ەلوردادا 795 باقىلاۋ كامەراسى بار

ءاليا: استانا جولدارىندا قانشا بەينەكامەرالار جۇمىس ىستەيدى؟ جىل باسىنان بەرى قانشا جول كولىك وقيعاسىن تىركەدى؟ قۇقىق بۇزۋشىلاردى جازالاۋعا نە كەدەرگى؟
جاۋاپ: ەلوردامىزدا 795 بەينەباقىلاۋ ورناتىلعان. جىل باسىنان بەرى 30 مىڭنان استام قۇقىق بۇزۋشىلىق تىركەلدى. بۇعان قوسا, جەرگىلىكتى پوليتسيا قىزمەتكەرلەرى كۇن سايىن 100-گە جۋىق قۇقىق بۇزۋشىلىقتى انىقتايدى. بارىنە زاڭ اياسىندا شەشىم قابىلدانادى.

كۇلجامال جامالدينوۆا: مەن ون جىلعا جۋىق ءوتىلى بار جۇرگىزۋشىمىن. ماعان باع­دار­شام توقتاپ قالعان كەزدە, جول قوزعالىسىن رەتتەيتىن قىز­مەتكەرلەردىڭ جۇمىسى ۇنا­مايدى. ۇنەمى كەپتەلىس تۋدىرادى. ماسەلەن, قابانباي با­تىر كوشەسىندەگى تسيرك پەن «قازمۇنايگاز» اراسى – ءبىت­پەيتىن كەپتەلىس. ون جىل ىشىندە تەك ءبىر عانا جول رەتتەۋ­شىنىڭ جۇمى­سى ۇنادى. جالپى, ولاردىڭ بىلىكتىلىگىن ارتتىرۋعا نازار اۋدارىڭىزشى.
جاۋاپ: جول پوليتسياسىنىڭ قىزمەتكەرلەرى تەك شۇعىل جاع­دايدا عانا جول قوزعالىسىن قولمەن رەتتەۋگە شىعادى. ولاردىڭ كاسىبي بىلىكتىلىگىن ارتتىرۋ ۇنەمى جۇرگىزىلەدى.

مايرا: جىل باسىنان بەرى ەلوردادا قانشا ايەل كۇيەۋىنەن نەمەسە باسقا ازاماتتاردان تۇرمىستىق زارداپ شەكتى؟ ەگەر كۇيەۋى ايەلىن قورقىتىپ, ۇنەمى قوڭىراۋ شالىپ, ءار باسقان قادامىن اڭدىپ جۇرسە, پوليتسيا شىن مانىندە ونىڭ ايەلىن قورعاي الا ما؟
جاۋاپ: جىل باسىنان بەرى كۇيەۋى نەمەسە بىرگە تۇراتىن ادامىنان زورلىق كورگەن 3000-داي ايەل حابارلاسقان. بارلىق دەرەك بويىنشا زاڭ اياسىندا شەشىم قابىلداندى.

اكىمشىلىك جاۋاپقا 20 مىڭ ادام تارتىلدى

ساۋلە: برۋسيلوۆسكي كوشە­سىندەگى «امانگەلدى» تۇرعىن ءۇي كەشەنىندە تۇرامىن. سۇرايىن دەگەنىم, سوڭعى كەزدە اۋلاعا شلاگباۋم ورناتتى. ونىڭ باسقارۋ ءپۋلتىن 10 مىڭ تەڭگەگە ساتىپ الۋ كەرەك. ونى الۋعا اركىمنىڭ جاعدايى كەلە بەرمەيدى. ءبىزدىڭ ۇيدە كوپتەگەن زەينەتكەرلەر تۇرادى, ولارعا جەدەل جاردەم كولىگى ءجيى كەلەدى. ارمەن قاراي نە بولادى؟
جاۋاپ: اتالمىش كەدەرگىنىڭ زاڭدى نەمەسە زاڭسىز ەكەنىن انىقتاۋ ماقساتىندا كورسەتىلگەن مەكەنجايعا اكىمشىلىك پوليتسيا قىزمەتكەرلەرى بارادى.

بولات: قالادا كولىگى ەسكى نەمەسە نورمادان تىس ءتۇتىن شىعاراتىن اۆتوكولىكتەردى ءجيى كورەمىن. ولار قالانىڭ سىرتقى كەلبەتىن عانا قۇرتپاي, ەكولوگياعا دا زيانىن تيگىزبەي مە؟
جاۋاپ: بۇل بويىنشا جۇ­مىستار اتقارىلۋدا. كولىك­تىڭ تەحنيكالىق جاعدايى, بەل­گى­لەنگەن سو تالاپتارىن ساق­تاماۋ ءجىتى قاداعالانادى. وسى ماسەلەگە بايلانىستى 20 مىڭعا جۋىق جۇرگىزۋشى اكىمشىلىك جاۋاپكەرشىلىككە تارتىلدى. بۇل شارا جالعاسىن تابادى.

ايجان: اۆتوبۋسقا ءجيى مىنە­مىن. بايقاعانىم, كەيبىر جۇرگىزۋشىلەر اۆتوبۋس ىشىندە تەمەكى تارتا بەرەدى. قايدا حابار­لاسقان ءجون؟
جاۋاپ: ءسىز «102» تەلەفونىنا حابارلاسىڭىز نەمەسە استانا قالاسى ءىىد جانە قالا اكىمدىگىنىڭ سايتىنداعى «حالىقتىق باقى­لاۋ» ايدارىنا كۇنىن, ۋاقىتىن, قۇقىق بۇزۋشىلىق ورىن العان مەكەنجاي, سونداي-اق اۆتوبۋس باعىتى مەن مەملەكەتتىك ءنومىرىن كورسەتىڭىز.

اسەت: جۇمابەۆ, تاحا حۋسەين كوشەلەرىندە تۋرا جولدىڭ ۇستىندە قايىر سۇرايتىندار كوبەيىپ بارادى. بۇل ولاردىڭ ومىرىنە قاۋىپتى ەمەس پە؟
جاۋاپ: قوعامدىق ورىنداردا قايىر سۇرايتىندارعا كۇندەلىكتى باقىلاۋ جۇرگىزىلەدى. 2000-عا جۋىق قۇقىق بۇزۋشى اكىمشىلىك جاۋاپقا تارتىلدى.

وقۋشىلاردى قاققان «لەكسۋس» كىمدىكى؟

ساۋال: وتكەندە «لەك­سۋس» ماركالى كولىك وقۋشى­لاردى قاعىپ كەتكەن ەدى. جۇرگىزۋشىنىڭ كىم ەكەنى انىقتالدى ما؟ ونى قانداي جازا كۇتىپ تۇر؟
جاۋاپ: جۇرگىزۋشىنىڭ اتى-ءجونى انىقتالدى. قازىر سوتقا دەيىنگى تەرگەۋ جۇرگىزىلۋدە. سوت-مەديتسينالىق ساراپتاما قورىتىندىسى دايىن بولعاننان كەيىن, پروتسەسسۋالدى شەشىم قابىلدانادى.

گۇلجان: تىلەنديەۆ كوشە­سىنىڭ ۋچاسكەلىك ينسپەكتورى ەرلان شايمەردەنوۆتىڭ جۇمىسىنا كوڭىلىمىز تولادى. جاۋاپكەرشىلىگى مول, ادال, ءوز ءىسىن جەتىك بىلەتىن قىزمەتكەرىڭىزگە العىس ايتامىز.
جاۋاپ: ءسىزدىڭ العىسىڭىز جەكە قۇرامعا جەتكىزىلەدى. قىز­مەتتىك مىندەتىن ادال اتقارعان ينسپەكتور ىنتالاندىرىلادى.

بەرىك: استانانىڭ اينالاسىندا جەكەمەنشىك تۇرعىن ۇيلەر كوپ. قۇقىق قورعاۋ ورگاندارىنا شەتكى اۋدان تۇرعىندارىنا نازار اۋدارۋىن سۇرايمىن.
جاۋاپ: «ۋچاسكە» ءىس-شاراسى اياسىندا پوليتسيا ينسپەكتورلارى وزدەرىنە ءتيىستى اۋماققا ءتۇ­گەل تەكسەرۋ جۇمىستارىن ءجۇر­­گىزەدى. ونىڭ ىشىندە قالا­نىڭ سىرتىنداعى ءاربىر جەكە ۇيلەر مەن ساياجايلار تەكسەرىلەدى.

سەرىك: جەدەلدىك جانە تۇر­عىندارمەن تىعىز بايلانىس ءۇشىن پوليتسيا ينسپەكتورى ءوزى تۇراتىن اۋماقتا قىزمەت ىستەيدى دەگەن ماسەلە كوتەرىلگەن ەدى. بۇل مۇمكىن بە؟
جاۋاپ: بۇل ماسەلە ءالى كۇنگە دەيىن وزەكتى. وسىعان بايلانىستى جەرگىلىكتى اتقارۋشى ورگانمەن بىرلەسە قاراستىرۋدامىز.

تەمەكىگە تىيىم بولسا…

ساۋال: بالالار وينايتىن الاڭداردا ۇلكەندەر تەمەكى ءجيى تارتادى. وسىنى كورگەن 4 جاستاعى بالام ۇلكەيگەندە تەمەكى تارتامىن دەيدى. بالالار ءجيى باراتىن ورىنداردا تەمەكى تارتۋعا زاڭ بويىنشا تىيىم سالۋعا بولماي ما؟
جاۋاپ: جەرگىلىكتى پوليتسيا قىزمەتى استانا قالاسىنىڭ اكىمدىگىنە بالالار الاڭدارىندا, سكۆەرلەر مەن ساياباقتاردا تەمەكى تارتۋعا تىيىم سالاتىن ۇسىنىس جولداعان بولاتىن. ىشكى ساياسات باسقارماسى وسىعان بايلانىستى الەۋمەتتىك ساۋالناما جۇرگىزگەن. تۇرعىنداردىڭ باسىم بولىگى بۇل ارەكەتتى قولدايتىندىقتارىن بىلدىرگەن. قازىرگى ۋاقىتتا زاڭ اكتىلەرىنە وزگەرىس ەنگىزۋ جۇمىستارى قولعا الىندى.

ءمانسيا: استانادا قانشا ۋچاسكەلىك ينسپەكتور بار, ولاردىڭ جالاقىسى قانداي؟ ءبىر ۋچاسكەلىك ينسپەكتور ءبىر ورىندا قانشا ۋاقىت ىستەيدى؟ ولاردىڭ جۇمىسى قالاي باعالانادى؟
جاۋاپ: ۋچاسكەلىك ينسپەكتور­لاردىڭ جۇمىسىنا قىزىعۋشىلىق تانىتقانىڭىزعا العىس ايتامىن. جالاقىنىڭ ازدىعىنان كادر تاپشىلىعى بايقالادى. بۇل بويىنشا ءىىم مەن قالا اكىمدىگىنە ماسەلە كوتەردىك. قازىرگى تاڭدا قارالۋدا. جالپى, ولاردىڭ جۇمىسى ۇنەمى باقىلاۋدا.

الماگۇل: جاڭا وقۋ جىلى باستالعاندا سىرتتان ستۋدەنتتەر مەن جۇمىسشىلار كوپ كەلەدى. بۇگىندە ءاربىر ءۇي سىرتتان كەلگەن ازاماتتارعا پاتەرىن جالعا بەرەدى. ولاردىڭ قاتىسۋىمەن قۇقىق بۇزۋشىلىق ءجيى تىركەلە مە؟
جاۋاپ: بۇل – وزەكتى ماسەلە. قۇقىق بۇزۋشىلاردىڭ تەڭ جارتىسى – وزگە قالادان كەلگەندەر. ءوز تاراپىمىزدان قۇقىق بۇزۋشىلىقتىڭ الدىن الۋ ءۇشىن تۇرعىندارعا ءتۇسىندىرۋ جۇمىستارىن جۇرگىزەمىز, اسىرەسە, جاستارمەن بولعان كەزدەسۋلەردە ءجيى كوتەرەمىز.

ساۋال: اپكەمنىڭ ۇيىندە كۇندە قىرعىن. جەزدەم ءتىپتى قول كوتەرۋگە دەيىن بارادى. بىرنەشە رەت ۋچاسكەلىك ينسپەكتورعا حابارلاستىق. ول ارىز جازۋدى سۇراپتى. كۋاگەر رەتىندە ءوزىم شاعىمدانسام بولا ما؟
جاۋاپ: استانا قالاسى ءىىد جەرگىلكتى پوليتسيا قىزمەتىنىڭ ايەلدەردى تۇرمىستىق زورلىقتان قورعاۋ بولىمىنە حابارلاسىپ, اقپارات الىڭىز. تەل: 71-60-63.

ساۋال: ءۇيدىڭ ءبىرىنشى قابا­تىندا كافە ورنالاسقان. ول جەردە ىشىمدىك ىشەتىندەر ءجيى جينالادى. تۇنگى تىنىشتىعىمىزدى بۇزادى. جالپى, ءبىرىنشى قا­باتتاعى وسىنداي كافەلەردى جا­ۋىپ تاستاۋعا بولا ما؟
جاۋاپ: جەرگىلىكتى پوليتسيا قىزمەتى قالا اكىمدىگىنە تۇنگى 23.00-دەن كەيىن وسىنداي ورىنداردىڭ جۇمىسىن شەكتەۋ تۋرالى ۇسىنىس جولدادى, قازىرگى ۋاقىتتا قارالۋدا.

دايىنداعان:
گۇلميرا ايماعانبەت