ەلوردا سيمۆولى «بايتەرەك» مونۋمەنتىنە كەلۋشىلەر سانى رەكوردتىق كورسەتكىشكە جەتتى. كۇردەلى جوندەۋدەن كەيىن كەلبەتىن وزگەرتكەن نىساندى بۇگىنگە دەيىن 263500 ادام تاماشالادى. شامامەن 90 ميلليونعا جۋىق تابىس تۇسكەن.
ەكسپو كورمەسى كەزىندە «بايتەرەكتىڭ» ءتۇبى كەزەكتەن ارىلمادى. كىشكەنتاي بالادان ەڭكەيگەن كارىگە دەيىن ەلوردا سيمۆولىن قىزىقتاۋ ءۇشىن ۇزىن-سونار كەزەككە تۇردى. مەكەمە قىزمەتكەرلەرى كۇننەن قورعايتىن ارنايى شاتىرلار تىگىپ, ورىندىقتار ورناتىپ, حالىقتى اۋىز سۋمەن قامتاماسىز ەتتى.
«ءبىر كۇندە 3000-عا جۋىق ادام كىردى. قاۋىپسىزدىك شارالارىنا ءمان بەردىك. ارناۋلى تەرمينالدار ورناتىپ, كاسسانىڭ جۇمىسىن جەڭىلدەتتىك. ارنايى مامانداندىرىلعان كۇزەت قىزمەتى مەن پوليتسيا وكىلدەرى كۇنى بويى كەزەكشىلىك جاسادى. تاڭعى 09.00-دەن تۇنگى 11.00-گە دەيىن ادام قاراسى ۇزىلمەدى. كەلۋشىلەردىڭ قاتارىندا شەتەلدىك قوناقتار, تۋريستەر جانە ءار وڭىرلەردەن كەلگەن مەكتەپ وقۋشىلارى بولدى. ال كوپ بالالى وتباسىنىڭ, بالالار ءۇيىنىڭ شاكىرتتەرى تەگىن تاماشالادى. «بايتەرەك» مونۋمەنتىنە كەلگەندەر الاڭ شەتىندە قۇرىلعان ساحنادا ايماقتاردان كەلگەن ونەر شەبەرلەرىنىڭ كونتسەرتىن تاماشالادى. قازىرگى ۋاقىتتا ەكسپو كورمەسى اياقتالىپ, جاڭا وقۋ جىلى باستالعان سوڭ كەلۋشىلەر قاتارى سايابىرسىدى. حالىقارالىق شارا كەزىندە قوناقتاردى جىلى قارسى الىپ, شىعارىپ سالعان قىزمەتكەرلەرگە العىسىم شەكسىز» دەيدى «استانا-بايتەرەك» جشس ديرەكتورى مۇرات ساپارعاليەۆ. ونىڭ ايتۋىنشا, كورمە كەزىندە «بايتەرەك» مونۋمەنتىنىڭ 150 مىڭىنشى قوناعى رەسەيدىڭ تۇمەن وبلىسىنان كەلگەن ساۋلەتشى ەلەنا ميحايلوۆاعا ەسكەرتكىش سىيلىق تابىس ەتىلگەن.
ايتا كەتەيىك, ەكسپو قارساڭىندا كۇردەلى جوندەۋدەن كەيىن «بايتەرەكتىڭ» كەلبەتى زامانعا ساي وزگەردى. اپپاق ءمارماردان جاسالعان ەدەن, التىن تۇستەس باسپالداقتار, ىشكى بەزەندىرۋلەر كەرەمەت ۇيلەسىم تاپقان. كوفەحانا, كادەسىيلار سالونى مەن كيىم شەشەتىن ورىندار دا جاڭاشا كەلبەتكە يە.
تاعى ءبىر جاڭاشىلدىق – LED ەكرانى بار ونەر گالەرەياسى. مونۋمەنتتىڭ فويەسىنە گاباريتتى يىلگەن الىپ ەكراننان ەلىمىز تۋرالى مالىمەتتەرمەن تانىسۋعا بولادى. ال مونۋمەنتتىڭ ەڭ جوعارى قاباتىندا اسپاندا سامعاپ جۇرگەن اسپالى شام تۇرىندەگى سامۇرىق قۇستار كەلۋشىلەردىڭ نازارىن ەرىكسىز اۋدارادى. يتاليالىق تەحنولوگيامەن ازىرلەنگەن شىنى ۆيتراجدار قاقاعان اياز بەن اپتاپ ىستىققا ءتوزىمدى. بيلەت باعاسىنا كەلسەك, ۇلكەندەرگە – 700, بالالارعا – 300 تەڭگە.
گۇلميرا ايماعانبەت
