«نۇرلى جەر» باعدارلاماسىنىڭ جۇزەگە اسىرىلۋ بارىسى قارالعان ۇكىمەت وتىرىسىندا ەلوردالىقتار ءۇشىن جاعىمدى جاڭالىقتىڭ كۋاسى بولدىق. ينۆەستيتسيالار جانە دامۋ مينيسترلىگى 2018 جىلدىڭ 5 ايىندا ەلىمىزدە 4,6 ملن شارشى مەتر تۇرعىن ءۇي پايدالانۋعا بەرىلگەنىن حابارلادى. سونىڭ ىشىندە 1 ملن-نان استام شارشى مەتر پاتەرلەر استانانىڭ ۇلەسىنە تيەدى.
ينۆەستيتسيالار جانە دامۋ ءمينيسترىنىڭ ورىنباسارى رومان سكلياردىڭ ايتۋىنشا, ەلىمىزدەگى 40,3 مىڭنان اسا وتباسىلار قونىس تويىن تويلاعان, سونىڭ ىشىندە 2 مىڭعا جۋىعى مەملەكەت قاراجاتى ەسەبىنەن باسپانالى بولعان. ول ءۇي سالۋدان استانا, الماتى قالالارىنىڭ جانە ماڭعىستاۋ وبلىسىنىڭ كوش باسىندا كەلە جاتقانىن جەتكىزدى. ايتا كەتەرلىگى, بۇعان دەيىن سالالىق بولىپ كەلگەن «نۇرلى جەر» باعدارلاماسى مەملەكەتتىك مارتەبەگە يە بولدى.
«2018 جىلدىڭ قاڭتار-مامىر ايلارىندا استانادا 1 ملن-نان استام شارشى مەتر پاتەرلەر پايدالانۋعا بەرىلدى. جىلدىق جوسپار – 2,3 ملن-نان استام شارشى مەتر. قازىرگى كەزدە بارلىق جوبالار ساتىمەن جۇزەگە اسىرىلۋدا. ەكىنشى جارتىجىلدىقتا ءتيىستى كورسەتكىشتەرگە قول جەتكىزەمىز» دەپ مالىمدەدى قالا باسشىسى اسەت يسەكەشەۆ ۇكىمەت وتىرىسىندا.
ەلوردا اكىمدىگىنىڭ رەسمي سايتى حابارلاعانداي, تۇرعىن ءۇي سالۋدىڭ جالپى كولەمىندەگى استانانىڭ ۇلەسى 23%-دى قۇرايدى. وسى كورسەتكىشپەن باس قالا ايماقتار اراسىندا 1-ورىندى يەلەندى. «نۇرلى جەر» باعدارلاماسى اياسىندا استانا اكىمدىگىنە بيىل 18,7 ملرد تەڭگە مەملەكەتتىك ينۆەستيتسيالار ءبولىندى. سونىڭ ىشىندە, تۇرعىن ءۇي قۇرىلىسى باعدارلاماسىن ىسكە اسىرۋعا – 12,9 ملرد تەڭگە, ينجەنەرلىك-كوممۋنيكاتسيالىق ينفراقۇرىلىمدى دامىتۋعا – 5,8 ملرد تەڭگە ءبولىندى.
ناقتىراق ايتساق, 2018 جىلدىڭ قاڭتار-مامىر ايلارىندا ەلوردادا 1072,9 مىڭ شارشى مەتر تۇرعىن ءۇي پايدالانۋعا بەرىلدى. جىلدىق جوسپار – 2 362 مىڭ شارشى مەتر. تۇرعىن ءۇي قۇرىلىسىنا تارتىلعان ينۆەستيتسيالاردىڭ شامامەن 26,4%-ى استانانىڭ ۇلەسىنە تيەدى. ماسەلەن, قاڭتار-مامىردا وسى ماقساتقا 103,4 ملرد تەڭگە ينۆەستيتسيا باعىتتالعان, بۇل كورسەتكىش 2016 جىلدىڭ 5 ايىمەن سالىستىرعاندا 92,8% ارتىق. تۇتاستاي العاندا, استانادا پاتەرلەردىڭ جالپى سانىنىڭ 42,2%-ى پايدالانۋعا بەرىلىپ, تۇرعىن ءۇي قورىنا ەنگىزىلگەن.
تولەن تىلەۋباي
