ەلوردادا «اتامەكەن» قر ۇكپ تورالقا توراعاسى تيمۋر قۇلىباەۆتىڭ توراعالىعىمەن جانە نۇر-سۇلتان قالاسى اكىمى التاي كولگىنوۆتىڭ قاتىسۋىمەن VI كاسىپكەرلەر كونفەرەنتسياسى ءوتتى. كونفەرەنتسياعا «اتامەكەن» قر ۇلتتىق كاسىپكەرلەر پالاتاسىنىڭ تورالقاسى جانە باسقارما مۇشەلەرى, ۇلتتىق كومپانيالار, دامۋ ينستيتۋتتارى, اۋماقتىق ورگاندار, ەكىنشى دەڭگەيلى بانكتەر جانە قالا كاسىپورىندارىنىڭ وكىلدەرى قاتىستى.
مۇنداي ماڭىزدى كەزدەسۋلەر تىڭ يدەيا, جاڭا باستامالارعا مۇرىندىق بولادى. بۇدان بۇرىن نۇر-سۇلتان قالاسى اكىمدىگى «اتامەكەن» پالاتاسىمەن بىرگە شاعىن بيزنەسكە ارنالعان «1 مىڭ ورىن» دەپ اتالاتىن الەۋمەتتىك جوبانى باستاعان بولاتىن. ا.كولگىنوۆ جوبانىڭ ءجۇرۋ بارىسىنا جوعارى باعا بەردى. وسى ماقساتتا ارنايى ەكونوميكالىق ايماق تا كەڭەيتىلمەك. «بۇل بيزنەسكە, اسىرەسە, قالامىزدىڭ نەگىزگى ەكونوميكالىق درايۆەرى سانالاتىن قۇرىلىس سەكتورىنىڭ دامۋىنا قوسىمشا مۇمكىندىك بەرەدى. №1 يندۋستريالىق پارك تە جاقسى جۇمىس ىستەپ تۇر. ول 97 پايىز تولعان. ەندى «اتامەكەن» پالاتاسىمەن بىرىگىپ, ونى كەڭەيتۋ ماسەلەسىن قاراستىردىق. ياعني, 400 گەكتار جەرگە №2 جاڭا يندۋستريالىق پارك قۇرامىز» دەدى نۇر-سۇلتان قالاسىنىڭ اكىمى التاي كولگىنوۆ.
اكىمنىڭ ايتۋىنشا, سوڭعى 10 جىلدا ەلورداداعى شاعىن جانە ورتا بيزنەس سۋبەكتىلەرىنىڭ سانى 5 ەسەگە ارتىپ, 130 مىڭعا جەتكەن. «ەكونوميكالىق تۇرعىدان بەلسەندى قالالىقتاردىڭ 68 پايىزى جۇمىس ىستەيدى. بۇل – 360 مىڭ ادام. شاعىن جانە ورتا بيزنەس ونىمدەرىنىڭ كولەمى دە ارتىپ كەلەدى. 2009 جىلعى 800 ملرد تەڭگە وتكەن جىلى 5 ترلن تەڭگەگە جەتتى. بىزدە حالىق سانى وسكەندىكتەن, الەۋمەتتىك ينفراقۇرىلىمعا تۇسەتىن سالماق تا تيىسىنشە ارتىپ كەلەدى. بۇگىنگى كۇنى تۇرعىندار سانى 1 ميلليون 100 مىڭ ادامعا جەتىپ وتىر. ياعني, بۇل – جاقسى نارىق پايدا بولىپ كەلە جاتىر دەگەن ءسوز. جانە بۇل شاعىن جانە ورتا بيزنەستىڭ دامۋى ءۇشىن مۇمكىندىك» دەدى ەلوردا اكىمى.
جالپى وڭىرلىك ءونىم قۇرىلىمىندا شوب ۇلەسىنىڭ 58,8 پايىزعا جەتكەنىن ايتىپ وتكەن اكىم كورسەتكىشتىڭ وسىنداي جاعىمدى سيپات الۋىنا مەملەكەت تاراپىنان ۇلكەن قولداۋدىڭ بولۋى اسەر ەتىپ وتىرعانىن باسا ايتتى. مەملەكەت قولداۋ تانىتىپ وتىرعاننان كەيىن بيزنەستىڭ دە بەلسەندىلىگى دە ارتقان. بەلسەندىلىك بولعان جەردە باسەكە بولادى, باسەكە دامۋعا جول اشادى. اكىمنىڭ ايتۋىنشا, ينۆەستيتسيانىڭ 90 پايىزى – جەكە سەكتوردىڭ ۇلەسىندە. بۇدان بولەك, جەكەمەنشىك بالاباقشالاردىڭ دا سانى كوبەيىپ, بۇگىندە ەلوردادا 22590 ورىنعا ارنالعان جەكەمەنشىك بالاباقشا مەن مەكتەپتەر جۇمىس ىستەپ جاتىر.
«اتامەكەن» قر ۇكپ تورالقا توراعاسى تيمۋر قۇلىباەۆ «كاسىپتىك-تەحنيكالىق ءبىلىم بەرۋدىڭ وزىنە قالا 6 ملرد تەڭگە شىعىندايتىنىن جۇمىس بەرۋشى رەتىندە كورىپ وتىرمىز. بۇل ماسەلەدە سۇرانىستى ءتۇسىنۋ ماڭىزدى. قالا ءوسىپ, دامىپ جاتىر. ماسەلەن, قازىرگى تاڭدا ەلوردادا ءتۋريزمدى دامىتۋ جونىندە جول كارتاسى جاڭارتىلۋدا. ءتۋريزمنىڭ ءار سالالارىنا ماماندار دايىنداۋ ءۇشىن «اتامەكەن» ءبىلىم مينيسترلىگى جانە قالا اكىمدىگىمەن بىرىگىپ جۇمىس ىستەپ جاتىر» دەپ, نۇر-سۇلتان قالاسىنىڭ شەنەۋنىكتەر قالاسىنان بيزنەس جانە جاستارعا ارنالعان قالاعا اينالىپ كەلە جاتقانىن ايتتى.
جادىرا شامۇراتوۆا
