نۇر-سۇلتان قالاسىندا «بىرگە جاسىل قازاقستان» شاراسى اياسىندا كوگالداندىرۋعا ارنالعان سەنبىلىك ۇيىمداستىرىلدى.
سەنبىلىككە شىققان ەلوردالىق تۇرعىندار اراسىندا مەملەكەت باسشىسى قاسىم-جومارت توقاەۆ بولدى. پرەزيدەنت بوتانيكالىق باقتا اعاش وتىرعىزىپ, سەنبىلىككە قاتىسۋشىلارمەن سۇحباتتاستى.
جاپپاي اعاش وتىرعىزۋ شاراسىنا پرەمەر-مينيستر اسقار مامين, ۇكىمەت مۇشەلەرى, دەپۋتاتتار, نۇر-سۇلتان قالاسىنىڭ اكىمى التاي كولگىنوۆ, سپورتشىلار جانە وقۋشىلار قاتىستى.
كوگالداندىرۋعا ارنالعان سەنبىلىك بارىسىندا بوتانيكالىق باقتا 300 كوشەت وتىرعىزىلدى. ال جالپى ەلوردا كوشەلەرى مەن ساياباقتارىندا 5 مىڭعا جۋىق اعاش ەگىلدى. بيىل كۇزدە «ەكولوگيالىق ساعات» شاراسىنىڭ شەڭبەرىندە ەلىمىز بويىنشا قوسىمشا 1 ميلليونعا جۋىق كوشەت ەگىلەتىن بولادى.
