ەلوردا ىرگەسىندەگى «ەتنواۋىل» ۇلتتىق-مادەني كەشەنىندە بايلانىس جانە اقپارات قىزمەتكەرلەرىنىڭ كۇنىنە وراي قر مادەنيەت جانە سپورت ءمينيسترى ارىستانبەك مۇحامەديۇلى «مەملەكەتتىك ءتىل جانە باق» اتتى رەسپۋبليكالىق كونكۋرستىڭ جەڭىمپازدارىن ماراپاتتادى.
شارانىڭ اشىلۋ سالتاناتىندا مينيستر مەملەكەتتىك ءتىلدىڭ مەرەيىن ۇستەم, مارتەبەسىن بيىكتەتۋدە بۇقارالىق اقپارات قۇرالدارى وكىلدەرىنىڭ ءرولى زور ەكەندىگىنە توقتالىپ, ولاردى ءتول مەرەكەسىمەن قۇتتىقتادى.
بيىلعى ءداستۇرلى بايقاۋعا ءتورت نوميناتسيا بويىنشا 200-گە جۋىق ماتەريال ءتۇسىپ, 80-نەن استام ۇمىتكەر تۇلپارلارىن ۇكىلەپ بايگەگە قوسقان. بۇل وتكەن جىلدارمەن سالىستىرعاندا بىرنەشە ەسە كوپ. جۇلدە قورى دا مولايعان.
سونىمەن, كونكۋرستىڭ قورىتىندىسى بويىنشا «ۇزدىك ماقالا» اتالىمىندا ءبىرىنشى ورىندى نۇرلىبەك سافين السا, ەكىنشى ورىندى «ەگەمەن قازاقستان» گازەتىنىڭ شىعىس قازاقستان وبلىسىنداعى مەنشىكتى ءتىلشىسى ازامات قاسىم يەلەندى. ءۇشىنشى ورىن م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ دەكانى ءازىمحان ىبىرايىمعا بۇيىردى. «ۇزدىك تەلەباعدارلاما» نوميناتسياسىندا «Qazaqstan» ۇلتتىق تەلەارناسىنىڭ قىزمەتكەرى سەرىك جۇمابەك توپ جارسا, ەكىنشى ورىن وسى تەلەارناداعى «ماسەلە» باعدارلاماسىنىڭ جۇرگىزۋشىسى, جۋرناليست نارتاي ارالبايۇلىنا بەرىلدى. ءۇشىنشى ورىندى «سارىارقا» تەلەارناسىنىڭ ءتىلشىسى گۇلباقشا اقاجانوۆا ەنشىلەدى. «ۇزدىك راديوباعدارلاما» اتالىمىندا قازاق راديوسىنىڭ ءجۋرناليسى ەربول الشىنبايدىڭ اسىعى الشىسىنان ءتۇستى. ەكىنشى ورىن جۋرناليست اسەمگۇل امانجولعا تابىس ەتىلسە, ءۇشىنشى ورىندى «شالقار» راديوسىنىڭ ءتىلشىسى تالانت ارعىنعالي الدى. «ۇزدىك سايت ماقالاسى» نوميناتسياسىندا ماديار ارىستانباەۆتىڭ باعى ورلەسە, ەكىنشى ورىندى بەلگىلى جۋرناليست, اقىن ەركەعالي بەيسەنوۆ يەلەندى. ءۇشىنشى ورىن قىمبات ەلتايقىزىنا بەرىلدى.
ال بايقاۋدىڭ باس جۇلدەسى قازاق جۋرناليستيكاسىنىڭ قارا نارلارىنىڭ ءبىرى, كەزىندە رەسپۋبليكالىق «انا ءتىلى» باسىلىمىنىڭ العاشقى باس رەداكتورى بولعان تۇستا مەملەكەتتىك ءتىلدىڭ مۇڭىن مۇڭداپ, جىرىن جىرلاعان پاراساتتى پۋبليتسيست, عيبراتتى عالىم, زەردەلى زەرتتەۋشى جارىلقاپ بەيسەنبايۇلىنا بۇيىردى. قازىلار القاسى ونىڭ «ەلىمىزدەگى العاشقى لاتىنشا سايت قالاي اشىلدى؟» جانە «تەرمينولوگيالىق تاجىريبە تالىمدەرى» اتتى ويلى دۇنيەلەرىن ۇزدىك تانىعان. جەڭىمپازعا 1 ميلليون تەڭگەنىڭ سەرتيفيكاتىن قوعام قايراتكەرى ورازكۇل اسانعازى تاپسىردى.
سونداي-اق, مەرەكەلىك كەش اياسىندا مادەنيەت جانە سپورت ءمينيسترى ءتىل, مادەنيەت, سپورت جانە تۋريزم سالاسىن باق-تا جانجاقتى ناسيحاتتاپ جۇرگەن ءبىر توپ جۋرناليسكە العىس حات تابىس ەتتى.
ازامات ەسەنجول
