دينارا سەيسەنحانقىزى, قالا تۇرعىنى:
– «شاپاعات» كوممۋنالدىق بازارىندا جارمەڭكە بولعان كۇندەرى بازار الدىندا پوليتسيا قىزمەتكەرلەرى تۇرىپ الادى دا, كوشەدەن كولىك توقتاتۋعا مۇمكىندىك بەرمەيدى. ەگەر ازىق-تۇلىگىمىزدى ماشينامىزعا ارتىپ كەتە المايتىن بولساق, جاي كۇندەرى توقتاعان ماشينا كەرەك كەزىندە توقتامايتىن بولسا, جارمەڭكە نە ءۇشىن ۇيىمداستىرىلادى؟
وسى ماسەلەگە بايلانىستى استانا قالاسىنىڭ ءىىب كەزەكشى بولىمىنەن تومەندەگىدەي جاۋاپ الدىق.
– بوگەنباي داڭعىلىندا جولدىڭ وڭ جاعىنداعى شەتكى جولاق قوعامدىق كولىكتەرگە ارنالعان. «شاپاعاتتىڭ» ءدال جانىندا ايالداما بار. اۆتوبۋستار سول جەرگە توقتايدى. ال جارمەڭكە كۇندەرى بازاردىڭ اۋلاسىنا كولىك كىرگىزىلمەيدى. بۇل كۇنى بازاردا كىسى كوپ بولاتىندىقتان, «شاپاعاتتىڭ» الدىنداعى ۇيلەردىڭ اۋلاسىنا كىرىپ كەتەتىن كىشكەنتاي جول دا كەپتەلىس استىندا قالادى. سوندىقتان, نەگىزگى جولدار – بوگەنباي داڭعىلى مەن ءۋاليحانوۆ كوشەسىندە كەپتەلىس تۋىپ, قوسىمشا جايسىزدىقتار بولماۋى
ءۇشىن, جول پوليتسياسى قىزمەتكەرلەرى بۇل كۇندەرى بەلسەندى جۇمىس ىستەيدى. ەگەر جارمەڭكە كەزىندە بارلىق ازاماتتاردىڭ بازاردىڭ الدىنا كولىكپەن كەلىپ, كولىگىن توقتاتۋىنا ەرىك بەرەتىن بولساق, وندا بوگەنباي داڭعىلىندا قوزعالىس قيىنداپ, قالالىق اۆتوبۋستار دا جۇرە الماي, ولار ەكىنشى, ءۇشىنشى جولاققا توقتاۋعا ءماجبۇر بولار ەدى. سوندىقتان, ەڭ باستىسى, پوليتسيا قىزمەتكەرلەرى جارمەڭكە سالدارىنان جولداردىڭ كەپتەلىسكە ۇشىراپ, قوزعالىسقا كەدەرگى كەلتىرمەۋىن, اسىرەسە, قوعامدىق كولىكتەردىڭ الدىندا توسقاۋىل بولماعانىن قاداعالاۋدى مىندەت سانايدى.
